Bilim jáne ǵylym mınıstri Kúlásh Shámshıdınova Jańaózendegi birqatar nysandardy aralady. Bul týraly Mańǵystaý oblysy ákimdiginiń baspasóz qyzmetinen málim etti, dep habarlaıdy Qamshy.kz aqparat agenttigi inform.kz saıtyna silteme jasap.

«Vedomstvo basshysy mektep-gımnazıada pedagogıkalyq qurammen kezdesti. Sondaı-aq oǵan IT jáne robototehnıka synyptaryndaǵy oqýshylardyń jumysy tanystyryldy», - delingen baspasóz aqparatynda. Byltyr Mańǵystaýda 6300 oryndyq 9 mektep paıdalanýǵa berildi.

Jańaózen qalasynda 2018-2019 oqý jylynda 2 jańa mektep iske qosyldy. Jalpy, qalada 24 orta mektep jumys isteıdi, onda 30579 oqýshy bilim alady.

Kúlásh Shámshıdınova atap ótkendeı, 1 shildeden bastap búdjettik sala qyzmetkerleriniń jalaqysy 30% artady. Osylaısha, joǵary sanaty bar qala muǵaliminiń jalaqysy 158 034 teńge, aýyldyq jerlerde -180 908 teńgeni quraıtyn bolady.

Mınıstrdiń pikirinshe, jalaqynyń artýy muǵalimderdiń ómir súrý deńgeıin arttyryp, jumystyń sapasyna áser etedi jáne jas mamandar úshin jaqsy yntalandyrý bolmaq.  

Aıta ketsek, jańadan taǵaıyndalǵan Bilim mınıstri bilim salasyna birshama ózgerister engizedi, bilim salasyn jaqsartady degen úmit kóp. "Álippeni" qaıtaramyz degen jańalyqtyń ózi kópshiliktiń kóńilinen shyqty. 

Usynǵan: Maqpal Sembaı