Samsung kompanıasy týraly estimegen adamzat balasy az shyǵar, sirá. Búginde jer betindegi halyqtyń basym bóligi osy kompanıanyń gadjet, teledıdar, tońaztqysh, shańsorǵysh, kir jýǵysh mashına, planshet, smartfon sıaqty ónimderin tutynady. Tipti, adamdar bul quraldarsyz ózderiniń kúnderin elestete almaıtyn dárejege jetken.
Bári birdeı bile bermeýi múmkin, Samsung kompanıasy ejelgi káris brendteriniń biri. Kompanıa tarıhy alpaýyt eýropalyq jáne amerıkalyq kompanıalarmen salystyrǵanda, tym tereńde jatyr.
Biz búgingi materıalymyzda Samsung kompanıasynyń ishki jaǵdaıyn, alpaýyt káris kompanıasynyń qashan dúnıege kelgenin, qalaı jetistikke jetkenin, bolashaqqa qandaı josparlar jasap otyrǵanyn oqyrmanymyzǵa tolyqtaı jetkizýge tyrysamyz.
Kompanıanyń qurylýy jáne naryqtaǵy alǵashqy jyldar
Ońtústik Koreıada ornalasqan kishigirim Tegý qalashyǵy. 1938 jyl, kóktemniń alǵashqy kúni. Kúrish satýmen aınalysatyn jergilikti kásipkerlerdiń biri Lı Ben Chhol óziniń kishkene kásibin keńeıtý maqsatynda seriktesterimen birge jańa kompanıanyń negizin qalaıdy.
Tegý. 1938 jyl. Taǵy da sol Samsung Group negizi qalanǵan saýda lashyǵy
Seriktesterdiń ortalaı jınaǵan 2000 dollar qarajatymen kompanıanyń tarıhy bastaldy. Olar, aldymen, telekomýnıkasıalyq qurylǵylar (aýdıo jáne vıdeo qurylǵylar) shyǵarýmen jáne basqa da turmystyq qajettilikterdi óndirýmen aınalysty.
Kompanıanyń ataýy káris tilinde "Samson" dep atalady jáne bul qazaqshaǵa tárjimalasaq, "úsh juldyz" degen maǵyna beredi. Kópshiliktiń aıtýynsha, bul ataý kompanıanyń negizin qaaýshynyń úsh ulynyń qurmetine qoıylǵan.
Barlyǵy kishi saýdadan bastaldy. Siz tań qalmańyz! Samsung kompanıasy alǵashynda qant, lapsha, kúrish jáne keptirilgen balyq syndy azyq-túlik ónimderin eksporttaýmen aınalysqan. Arada jyl ótkennen keıin kompanıa syra qaınatatyn zaýyt ashýǵa qaýqarly boldy. Zaýyt kúrish araǵy jáne vıno sekildi alkogóldi ónimderdi naryqqa shyǵaryp, sodan qarajat túsire bastady. Kompanıa Ekinshi Dúnıejúzilik soǵys kezeńinde de eshqandaı zardap shekken joq, esesine nyǵaıa tústi.
Soǵys aqtalǵannan keıin kompanıanyń ónim assortımenti tigin mashınalarymen, bolatpen jáne tyńaıtqyshpen tolyqty. Al 1948 jyly amerıkalyq úlgidegi Samsung Trading Co ataýyn aldy.
Káris soǵysy jáne kásiptiń quldyraýy
Lı Ben Chhol úlken josparlarmen júrip kele jatyr edi. Onyń eń birinshi maqsaty – amerıkalyq naryqty "ustap" alý edi. Biraq kásipti 1950-53 jyldary oryn alǵan Koreıadaǵy soǵys quldyratyp ketti.
Káris soǵysy kompanıa jáne onyń ıesi úshin aýyr synaqtardyń biri boldy. Kúrish qory, barlyq qoımalar, kompanıanyń ofısine deıin otqa orandy. Tek bir ǵana jáshik qolda qaldy. Lı Ben Chhol aldaǵy ýaqytty sheber boljap, iraz qarajatty osy jáshikke salyp saqtaǵan eken.
Lı Ben Chhol toqyma fabrıkasyn ashty. Sonymen qatar, joǵary órleý úshin qant óndirýmen jáne saqtandyrý qyzmetimen aınalysty. Mine, ol osylaısha 60-jyldary Koreıanyń qurmetti kásipkerine aınaldy.
Órleý jáne quldyraý, quldyraý jáne órleý (Býrdj-Halıfanyń shyńyna deıin)
Elde bastalǵan revolúsıa kompanıa jumysyna da óz zalalyn tıgizbeı qoımady. Lı Ben Chhol túrmege otyrǵyzylyp, onyń múlki tárkilendi. Biraq bul barlyǵynyń sońy emes edi. Jańa bılik basyna Pak Chon Hı kelgennen keıin ol ekonomıkalyq reformalar jasap, túrmede jatqan talantty kásipkerdi esine alady.
Ony tek qana bosatyp qoımaı, oǵan kásippen aınalysýǵa ruqsat berdi. Sondaı-aq, ony memlekettik nesıelerdi berý arqyly qoldap otyrdy. Al Lı Ben Chhol bul joly jańa kásibin zamanaýı suranystardy qamatamasyz etetin elektronıka baǵytynda bastady. Osy ýaqytta, 1969 jyly, kompanıanyń aǵylshyn tilindegi alǵashqy logotıpi jasaldy.
1969-1979 jyldardaǵy kompanıa logotıpi
Elektronıkamen qatar Samsung kompanıasy saqtandyrý isimen, baspa isimen, sondaı-aq, ýnıversıtet, aýrýhana, qonaq úı, tipti, keme jasaýmen aınalysty.
Sizderdiń bilmeýlerińiz múmkin. álemdegi eń bıik ǵımarat sanalatyn BAÁ-degi Býrdj-Halıfa munarasy Samsung Engineering qurylysshylarynyń qolynan turǵyzylǵan.
Sonymen qatar, Malaızıadaǵy Petronas egiz munarasy da osy kompanıanyń qolynan shyqqan keremetter qataryna jatqyzylady.
Ýaqytynda álemdegi eń úlken keme dep eseptelgen Prelude FLNG tankeri de Samsung Heavy Industry kompanıasy bóliminiń jetistigi. Tankerdiń uzyndyǵy 500 metrdi quraıdy.
Jaryqta ómir súr. Samsung turmystyq tehnıkalary
Samsung tehnologıalyq kompanıasynyń tarıhy 1970 jyly jaryqqa shyqqan aq-qara tústi teledıdardan bastalady. Bul Sanyo-men birigip jasalǵan jumys edi. Biraq birneshe jyl ótkennen keıin seriktestikpen jasalǵan jumys bolashaq Samsung Electronics-tiń, ıaǵnı, Samsung Trading Co kompanıasynyń quramyna kiredi.
Arada kóp ýaqyt ótpeı 1977 jyly Samsung kompanıasy alǵashqy túrli-tústi teledıdardy jasap shyǵardy. Al on jyldan keıin kompanıa 10 mıllıon tústi teledıdardyń jaryqqa shyǵýyn toılady. Sandyq teledıdarlar 1998 jyldan bastap aýqymdy túrde shyǵaryla bastady. Osydan keıin juqa monıtorlar men ekrandar sánge aınaldy. Kompanıa monıtor jasaýdan sol aralyqta aldyna jan salmady.
1999 jyly kompanıany Forbes Global bedeldi baspasózi "Turmystyq tehnıka óndirýden úzdik kompanıa" atty ataqpen marapattady.
Mine, arada birneshe jyl ótti. Biraq koreıalyq kompanıa turmystyq tehnıka, gadjetter, smartfondar, kompúterler óndirýden aldyńǵy qatarda kórinýden jalyqpaýda.
Bul – úzdiksiz úderis, úzdiksiz damý.
