AQSH kompanıalary Qazaqstandy sotqa bergen180 mln dollarlyq iske núkte qoıyldy dep habarlaıdy Qamshy.kz aqparat agenttigi Ádilet mınıstrliginiń baspasóz qyzmetine silteme jasap.

Qazaqstannyń energetıka mınıstrligi men amerıkalyq kompanıalar arasyndaǵy sot isi Qazaqstannyń paıdasyna sheshildi.

2019 jyly 26 sáýirde Kolýmbıa okrýginiń soty (AQSH) amerıkalyq kompanıalardyń - Turan Petroleum, Inc. (Delaver shtaty), Energyfund, Inc. (Kolýmbıa okrýgy) jáne Trustees for Trek Resources, Inc. (Nevada shtaty) – Qazaqstannyń energetıka mınıstrligine qarsy 180 mıllıon AQSH dollarynan asatyn talap aryzyn qabyldamady.

Talap-aryzǵa sáıkes Arys jáne Aral munaı-gaz ken oryndaryn ıgerý jáne paıdalaný týraly konsesıalyq kelisimsharttar talaptary buzylǵan, AQSH pen Qazaqstan arasyndaǵy Investısıalardy kótermeleý jáne ózara qorǵaý týraly kelisim («Ekijaqty ınvestısıalyq kelisim») boıynsha Talapkerlerdiń quqyqtary  buzylǵan, fıdýsıarlyq mindetter oryndalmaǵan, ádiletsiz túrde paıda tabylǵan, faktilerdi burmalaý jáne nemquraılylyq oryn alǵan.

Sot bul isti AQSH-tyń «Sheteldik táýelsiz ımýnıtetter týraly» zańyn negizge ala otyryp, ıýrısdıksıa bolmaǵandyqtan qaraýyna qabyl almady.

Osylaısha, Kolýmbıa okrýgtik sotynyń (AKSH) sheshimi Qazaqstan Respýblıkasynyń osy daýǵa qatysty ustanymynyń durystyǵyn tolyqtaı rastady jáne Qazaqstan Respýblıkasy aýmaǵynda sheteldik ınvestorlardy jan-jaqty qoldaý boıynsha Qazaqstan Respýblıkasynyń júrgizip otyrǵan saıasatymen úılesedi.

Osy daýda Qazaqstan Respýblıkasynyń múddelerin Qazaqstan Respýblıkasynyń Ádilet mınıstrligi jáne Qazaqstan Respýblıkasy Úkimetiniń konsýltanty  - «Reed Smith» kompanıasy qorǵady.

Usynǵan: Maqpal Sembaı