Memleket basshysy 2025 jylǵy 10 sáýirde Ǵylym kúni qarsańyndaǵy ǵalymdarmen kezdesýinde álemde jasandy ıntellekt tehnologıalary qarqyndy damyp kele jatqanyna toqtaldy.
Toqaev jasandy ıntellekt salasynda Qazaqstannyń aldyńǵy qatardan kórinýine tolyq múmkindigi bar ekenin aıtty.
"Adam kapıtaly – elimizdiń bul baǵytta atqaratyn jumysynyń basty kepili. Iaǵnı talantty jáne bilimdi azamattarǵa arqa súıeımiz. Sondyqtan İT mamandaryn daıarlaýdy kúsheıtip, oqýshylar men stýdentterge jasandy ıntellekt daǵdylaryn úıretemiz. Otandyq ǵylymda mundaı keleshegi zor baǵyttar kóp. Jalpy, ǵylymnyń júıeli damýy úshin memleket pen bıznes, ýnıversıtetter men ǵylymı ortalyqtar kúsh biriktirýi qajet, – dedi Qasym-Jomart Toqaev.
Munymen qosa, otandyq ǵylymnyń aldynda turǵan birqatar mańyzdy mindetke nazar aýdardy.
"Strategıalyq mindetterdiń biri – ıadrolyq ǵylym men tehnologıany damytý. Bul salada Qazaqstannyń áleýeti zor. Almatydaǵy Iadrolyq fızıka ınstıtýty men Kýrchatovtaǵy Ulttyq ıadrolyq ortalyq sıaqty aldyńǵy qatarly ǵylymı mekemeler irgeli jáne qoldanbaly zertteýler júrgizip, mamandar daıarlap keledi. Atom energıasyn óndirý – turaqty energıa kózi ǵana emes, ekonomıka men ǵylymnyń jańa baǵyttaryn damytýdyń negizgi kilti. Bul rette ıadrolyq medısına, sýtegi energıasy, sýdy tushytý, sıntetıkalyq otyn óndirý, shaǵyn modýldi reaktorlar jáne taǵy basqalary týraly sóz bolyp otyr. Osy baǵytta zor tabysqa jetý úshin zertteý ınfraqurylymyn nyǵaıtý, ǵylymı jumysty kúsheıtý, ınjenerlik bilim berýdi jańǵyrtý qajet. Prezıdent janyndaǵy Ǵylym jáne tehnıka jónindegi ulttyq keńestiń aldaǵy otyrysynda atom energetıkasyn damytý kún tártibindegi basty másele bolýǵa tıis. Sondaı-aq men Ulttyq quryltaıda ǵylym qalashyqtaryn qurý máselesin kóterdim. Ulttyq keńes osy jumysqa aıryqsha nazar aýdarýy qajet, – dedi Prezıdent.
