قازاقتىڭ جەرى جاتىر ساتىلعالى
بۇگىن بيلىك ءبىر ءىستى ماقۇلدادى،
«قازاق جەرى جاتىپتى ساتىلعالى».
ەستىمەگەندى ەستىپ-اق كەلەمىز عوي،
ءاليحان مەن احمەت اتىلعالى.
بۇگىن دالام تىم مۇقتاج ارىستارعا،
الباستىعا سەس بولار ارىستانعا.
الاقانداي پۇشپاعىن بەرمەپ ەدىك
ەكى ءجۇز جىل جوڭعارمەن الىسقاندا.
اقتابان بوپ ايالسىز شۇبىرعاندا،
اشتىقتان اق سۇيەك بوپ قىرىلعاندا
ايىرىلماعان ارشىن ءتوس دالامىزدى –
انامىزدى ساتارداي جىن ۇرعان با؟
جەرى جوقتى جەتەلى ەل جەتىم دەيدى،
جەرى جوقتىڭ جەتەسى جەتىلمەيدى.
ەسسىز ۇرپاق «ساتامىن» دەسىن مەيلى،
قاسيەتتى قارا جەر كەشىرمەيدى.
قۇيىڭا ءتۇسىردىڭ عوي شايىر باتپاق،
بالكىم باتىپ ولەرمىز بايىپ جاتساق.
سەبەبى، ەشبىر حالىق ماندىمايدى،
ءوز اناسىن اقشاعا ايىرباستاپ...
تاۋەلسىز ەل بولعان سوڭ تاققا ءمىندىڭ،
التى الاشتىڭ تورلادى اسپانىن مۇڭ.
جالعىز شاردى ويىنشىق ەتكەن ەلگە،
ءبىر جازاسى دايىن تۇر حاق ءتاڭىردىڭ...
ايتا المايمىن بۇل جەردى ساتپا دەپ مەن،
اقيقات تا جوق مۇلدە حاقتان وتكەن.
بۇگىن ءبىزدىڭ سيقىمىز ــ جاسىل جەردى
تاپتاپ وتكەن پەندەنى ماقتان ەتكەن.
وسى ما ەدى وردالى ەل بۇزىلعانىڭ،
باھادۇرلەر، قور بولدى قىز-ۇلدارىڭ.
ەگەي جەردى قورعاعان ەسىل بابام،
سەن ساتسىن دەپ توكپەگەن قىزىل قانىن.
وزەك كۇيەر ءورت جاتىر ولەڭىمدە،
ەندى وگەيلىك كورەمىن ءوز ەلىمدە.
قايران، قايران قارت قازاق قايداسىڭدار؟
جەرىن قويىپ ساتپاعان جەلەگىن دە.
ۋداي ۋايىم ەستىنى يەكتەدى،
ءوزىمدى ەمەس، ويلايمىن شيوكپەنى.
جەرمەن بىرگە ساتىلىپ بارا جاتىر،
ات كوتەرمەس اتالار سۇيەكتەرى.
جاۋتاڭ-جاۋتاڭ قارايسىڭ جارالى ەلىم،
قايمىقپايسىڭ بىلەمىن قارا جەرىم.
تەمىر تىرناق تىلەدى قىر ارقاڭدى،
ءبىز بىلمەيتىن بىرەۋلەر سالار ەگىن.
ەكى مىڭ جىل تۇرعان جەر ەسەن – امان،
بۇگىنگىنىڭ پيعىلى وتە جامان.
سەنى تۋعان قاستەرلى جەر ــ انانىڭ،
اپپاق ءسۇتىن ەمەدى بوتەن ادام...
بۇگىن بيلىك ءبىر ءىستى ماقۇلدادى،
“قازاق جەرى جاتىپتى ساتىلعالى”.
ەستىمەگەندى ەستىپ-اق كەلەمىز عوي،
ءاليحان مەن احمەت اتىلعالى...
ادىلەت احمەت ۇلى
ادىلەت احمەت ۇلى 1986 جىلى 25 قىركۇيەكتە جۇڭگو حالىق رەسپۋبليكاسى، التاي ايماعى، بۋرىلتوعاي اۋدانى، قارماعاي اۋىلى، تاڭبالى قىستاعىندا تۋعان. بالا كەزىنەن ادەبيەتكە اسا ءبىر اۋەسپەن كەلگەن ادىلەتتىڭ تىرناق الدى تۋىندىسى - «قارعالداق ماحاببات» اتتى ولەڭى 2008 جىلى شينجياڭداعى «قۇمىل القابى» جۋرنالىنان جارىق كورگەننەن بەرى، «شينجياڭ گازەتى»، «التاي گازەتى»، «ىلە جاستارى»، «شۇعىلا»، «مۇرا» سىندى ەل ءىشى-سىرتىنداعى ءتۇرلى باسىلىمداردا 50-گە جۋىق ولەڭى، 3 ماقالاسى، 5 اۋدارما شىعارماسى جاريالانعان. 2010 جىلى قاراشا ايىندا قازاقستان رەسپۋبليكاسى، قىزىلورادا وبلىسىنان شىعاتىن «سىر ديدارى» گازەتىندە «كوش»، «بولتىرىگىنەن بولىنگەن» سىندى ولەڭى باسىلسا، «دالا مەن قالا» گازەتىندە دە جاس اقىننىڭ ولەڭدەرىنە ورىن بەرىلگەن بولاتىن.
2012 جىلى جاز ايىندا قازاقستان «جازۋشى» باسپاسىنان اقىن ەسەنعالي راۋشان ۇلى قۇراستىرعان «سان عاسىرلىق ساعىنىش» اتتى جاس اقىندار جيناعىنا «ءداۋىر وسى»، «قارا جولدا قارت انا» قاتارلى ونشاقتى ولەڭى باسىلعان. اقىننىڭ «كوك بايراق»، «اۋىلعا باردىم» اتتى ەكى ولەڭى «baq.kz» اقپاراتتىق پورتالىنداعى «جاھان قازاقتارى» بولىمىندە جارىق كورگەن. «اق الا وردام قونعان جۇرت» اتتى پوەماسى استانانىڭ 15 جىلدىعىنا وراي «قازكونتەنت» اكسيونەرلiك قوعامى ۇيىمداستىرعان جىر ءمۇشايراسىنىڭ 2 دارەجەلى جۇلدەسىن ەنشىلەگەن. 2014 جىلى اتاجۇرتقا ورالعان.
پىكىر قالدىرۋ