پاۆلودارداعى «قازاقستان ءاليۋمينييى» زاۋىتىندا وندىرىستىك اپاتتان ەكى جۇمىسشى زارداپ شەكتى،-دەپ حابارلايدى Qamshy.kz حابار24 ارناسىنا سىلتەمە جاساپ.

وقىس وقيعا زاۋىتتىڭ گيدرو-مەتاللۋرگيالىق سەحىندا بولدى. №2 ۋچاسكەدە تۇتقىر سۇزگىنىڭ اقاۋىن جوندەپ جاتقان 37 جانە 43 جاستاعى ەكى ازاماتتىڭ دەنەسى مەن كوزدەرىن تەرمو-حيميالىق كۇيىك شالدى. ەكى جۇمىسشىعا دا شۇعىل مەديسينالىق كومەك كورسەتىلىپ، №1 قالالىق اۋرۋحاناعا جەدەل جەتكىزىلدى. العان جاراقات وتە اۋىر. بىرەۋىنىڭ دەنەسىنىڭ 85، ەكىنشىسىنىڭ 40 پايىزى كۇيىپ قالعان. ءقازىر ولار جانساقتاۋ بولىمىندە جاتىر. ەڭبەك ينسپەكتورلارى جۇمىسكەرلەردىڭ قاتەلىككە بوي الدىرۋى مۇمكىن ەكەنىن دە جوققا شىعارمايدى. ءقازىر اپاتقا قاتىستى تەرگەۋ ءجۇرىپ جاتىر. ارنايى كوميسسيا 10 كۇن ىشىندە ونىڭ ناقتى سەبەبىن انىقتاۋى ءتيىس.

ابىلاي سادىروۆ، مەملەكەتتىك ەڭبەك ينسپەكتورى:

- ءقازىر ولار جانساقتاۋ بولىمىندە جاتىر. بىزبەن سول حابارلاما تۇسكەن ساتتە زاۋىتقا بارىپ، وقيعا ورنى قاراستىرىلدى. جۇمىسكەرلەر كلاپانعا ريەۆيزيا جۇرگىزۋ ءۇشىن ناسوستى وشىرگەن، ءبىراق سول وشىرگەن ناسوستى ەمەس، قاسىنداعى جۇمىس ىستەپ تۇرعان ناسوستىڭ كلاپانىن شەشكەن. سول ۋاقىتتا سۇيىقتىق اتىلىپ، ولار كۇيىك العان.