«Cumhurivet» وپپوزيسيالىق گازەتتەگى كافەنىڭ مەنەدجەرى ءوز ۇيىندە ستامبۋلدا تۇتقىندالدى دەپ حابارلايدى vesti.ru. وعان پرەزيدەنت رەدجەپ ەردوعاندى قورلادى دەگەن ايىپ تاعىلعان. تۇركيا زاڭى بويىنشا مەملەكەت باسشىسىنىڭ جەكە باسىنا ءتيىسۋ قىلمىستىق ءىس بولىپ تابىلادى جانە ول بويىنشا 4 جىلعا باس بوستاندىعىنان ايىرادى.

قازىرگى تاڭدا ۇستالعان ازامات سوتتىڭ شەشىمى بويىنشا قاماۋدا وتىر. سوت «مەنەدجەردىڭ ارەكەتىنەن قىلمىستىڭ نىشاندارىن» بايقاعان. ءىس ماتەريالى بويىنشا كافە باسشىسى سەنول بۋران رەداكسيانى كۇزەتەتىن پوليسيا قىزمەتكەرىمەن اڭگىمە بارىسىندا ەردوعانعا ءتىل تيگىزىپ، پوليسياعا قىزمەت كورسەتۋدەن باس تارتقان. سونىمەن قاتار، وعان ەشقاشان شاي ساتپايتىنىن جەتكىزگەن. كافە باسشىسىنىڭ ادۆوكاتى وزگۋر ۋرفا ونىڭ ەردوعانعا ەشقاشان شاي ساتپايتىنىن جانە تۇركيا پرەزيدەنتىنىڭ جەكە باسىنا تيىسەتىندەي  ەشقانداي جامان ءسوز ايتپاعانىن جەتكىزدى.

رەدجەپ تاييپ ەردوعان 10 جىل بويى تۇركيانىڭ پرەمەر-مينيسترى قىزمەتىن اتقارىپ، ودان كەيىن تۇركيا پرەزيدەنتى اتانعان. وسى ۋاقىت ارالىعىندا  ونىڭ زاڭگەرلەرى قورلاۋعا بايلانىستى 1،8 مىڭ  ارىز جازعان. ايىپتالۋشىلاردىڭ اراسىندا مەكتەپ وقۋشىلارى، مۋلتيپليكاتورلار ءتىپتى بۇرىڭعى تۇركيا ارۋى دا بار. ەردوعان باسقاراتىن بيلىكتى تارتىپ الۋ ارەكەتىنەن كەيىن، ول بارلىق ايىپتاۋلاردى قايتىپ الاتىنىن ايتقان. الايدا ءالى كۇنگە دەيىن ونى ىستەگەن جوق.

ءساتسىز توڭكەرىس جاساۋ ارەكەتىنەن كەيىن تۇركيانىڭ بارلىق مەكەمەلەرىندە جاپپاي قىزمەتكەرلەردى جۇمىسىنان بوساتقان. شىلدە ايىنىڭ ورتاسىندا 110 مىڭ ادام جۇمىسسىز قالىپ، 40 مىڭى تەمىر تورعا توعىتىلعان. كوبىسى اقش تۇراتىن فەتتۋللاح گۇلەن نەگىزىن سالىپ كەتكەن «حيزمەت» ءدىني قوزعالىسىنا قاتىسى بار دەگەن كۇدىكپەن وتىر. گۇلەننىڭ ءوزى قوزعالىسقا ەشقانداي قاتىسى جوق ەكەنىن ايتادى.