«Facebookتە» الەۋمەتتىك ارازدىقتى قوزدىردى دەگەن ايىپپەن اقتوبە سوتى كاسىپكەر سانات دوسوۆتى ءۇش جىلعا سوتتادى دەپ حابارلايدى «دياپازون».
التى بالانىڭ اكەسى 46 جاسار سانات دوسوۆ «facebook» الەۋمەتتىك جەلىسىندەگى جەكە پاراقشاسىندا ءپۋتيننىڭ ساياساتى، سيرياداعى سوعىس، جەرگىلىكتى بيلىك پەن ءدىن جايلى پىكىر ءبىلدىرىپ وتىرعان. ونىڭ كەيبىر پىكىرى ەموسياعا تولى بولعان. تەرگەۋ يزولياتورىندا 4 ايىن وتكىزگەن دوسوۆتىڭ قورعاۋشىسى ءتورت اي بويى تاعىلعان ايىپتىڭ اقىلعا سىيمايتىندىعىن ايتۋمەن، دالەلدەۋمەن بولدى.
قورعاۋشى سانات دوسوۆتى اقتاپ شىعۋدى، سونىمەن قاتار ىسكە قاتىسى بار ءىىب، ۇقك، پروكۋراتۋرا قىزمەتكەرلەرىن جانە بايسالبايەۆا ەسىمدى ەكسپەرتتى قىلمىستىق ىسكە تارتۋدى ۇسىنادى. مەملەكەتتىك ايىپتاعۋشى بولسا ءوز كەزەگىندە تەرگەۋ بارىسىندا ەشقانداي قۇقىق بۇزۋشىلىق ورىن الماعاندىعىن، ايىپتالۋشىنىڭ كىناسى تولىق دالەلدەنگەنىن العا تارتى. ول سوتتان سانات دوسوۆتى 4 جىل باس بوستاندىعىنان ايىرۋدى سۇرادى.
ايىپتالۋشى سانات دوسوۆ ءوز كىناسىن مويىنداي وتىرا جازعان وي-پىكىرىندە ەشقانداي ارام پيعىل بولماعاندىعىن، ءوزىنىڭ قازاق ەلىنىڭ پاتريوتى ەكەندىگىن ايتتى. التى بالانىڭ اكەسى ءوزىن باس بوستاندىعىنان ايىرماۋدى ءوتىنىپ سۇرادى. سەبەبى دوسوۆتىڭ التى بالاسىنىڭ تورتەۋى ءالى كامەلەتتىك جاسقا تولماعان ەكەن.
27 جەلتوقساندا سوت سانات دوسوۆتى ءۇش جىلعا تەمىر تورعا قاماۋ جايلى شەشىم شىعاردى. ءسوز بوستاندىعى دەپ ەركىن پىكىر بىلدىرگەن وتاندىسىمىز ءسوز سوڭىندا سوت الدىندا بىلاي دەپتى: «باتۋ حان ۇلىنا بىرەۋىندە 1 قۇيرىق، 100 باسى بار، ەكىنشىسىندە 1 باس، 100 قۇيرىعى بار ەكى ايداھاردىڭ ءومىر سۇرگەندىگى جايلى ايتىپ بەرىپتى. كۇن سۋىعاندا 1 باستىڭ ارقاسىندا 100 قۇيرىق امان قالىپتى. ال، ەكىنشى ايداھاردىڭ 100 باسى داۋلاسىپ، كەلىسە الماي جاتقاندا ءولىپ قالىپتى دەسەدى. ءبىزدىڭ ەلدە ءبىر كوسەم بار. مەن ۇنەمى سونىڭ ارتىنان ىلەسىپ ءجۇردىم. ءوزىمدى ەلباسىنىڭ باعدارلاماسىنا قارسى شىعىپ جۇرگەن باس رەتىندە سەزىنگەن ەمەسپىن. باتىس ەلى جۋرناليستەرىنىڭ سۇراعىنا نازاربايەۆ قازاقستاندا ديكتاتۋرا جوق، تەك جاي عانا ايقىن جول تاڭداعانىمىزدى، ۋاقىت وتە ءبارى وزگەرەدى دەپ جاۋاپ قايتارعان بولاتىن. مەن سول كەزدە پرەزيدەنتتىڭ دۇرىس ايتقانىن ءتۇسىندىم. مەنىڭ ىستەگەنىم قاتەلىك بولدى. رەسەي-ۋكراينا سوعىسى ءبىزدىڭ مايدانىمىز ەمەس، سول سەبەپتى ول تۋرالى مەن عالامتوردا جازباۋىم قاجەت ەدى».
