پولشاداعى ۆروسلاۆ اۋرۋحاناسىنىڭ دارىگەرلەرى تۋماسىنان قولسىز تۋىلعان ەركەككە العاش رەت قول سالىپ، وتانىڭ ءساتتى وتكەندىگىن مالىمدەدى دەپ حابارلايدى vesti.ru ، مالىمەتتىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.

32 جاستاعى ءپوتر تۋماسىنان قولى جوق بولعان. وعان كوز جۇمعان دونوردىڭ قولىن الىپ سالعان.

«مۇنداي ءبىر مۇشەسى جوق ادامعا ءوز دەنەسىنىڭ بولشەگىندەي ەتىپ جاسالعان وتا الەمدە ءبىرىنشى رەت بولىپ وتىر»، - دەپ مالىمدەدى حيرۋرگتاردىڭ باسشىسى ادام دوماناسيەۆيچ.

وتا وتە كۇردەلى بولعاندىقتان 13 ساعاتقا سوزىلعان. بۇل ۋاقىتتىڭ ىشىندە دارىگەرلەر كوز جۇمعان دونوردىڭ قولىن الىپ، ونى ەمدەلۋشىنىڭ دەنەسىنە لايىقتاپ قويعان دا، تيتاندىق شتيفتارمەن سۇيەگىن جالعاپ، بۇلشىقەتتەرىن، تامىرلارىن تىگىپ قويعان.

دونوردىڭ قولىنداعى قاناينالىمدى رەتتەۋ بارىسىندا ونداعى قانتامىرلارى دا وسىپ-جەتىلۋى ءتيىس.

دەگەنمەن، وڭ ناتيجەلەر بايقالىپ جاتىر، وتا جاساعاننان سوڭ ءبىر اپتادان كەيىن ءپوتر ساۋساقتارىن قيمىلداتقان: باس بارماعىن تولىققاندى مايىستىرىپ، قالعان ساۋساقتارىن دا اقىرىنداپ قوزعالتۋدا.

«الايدا، جاڭادان سالىنعان قولدىڭ ەمدەلۋشىگە ەكى ءتۇرلى ماسەلە تۋىنداتۋى مۇمكىن: قولدى سالعان جەردىڭ سۇيەكتەرى دۇرىس دامىماعان، قانتامىرلارىنىڭ سانى جەتكىلىكسىز جانە دە جۇيكە جۇيەسى مەن بۇلشىقەتتەرى ءالسىز بولعان؛ سونىمەن قاتار جاڭا قولدىڭ باسقارىلۋى ادامنىڭ مييىنا تۇسىنىكسىز بولۋى مۇمكىن»، - دەپ مالىمدەدى دوماناسيەۆيچ.

ونىڭ ايتۋىنشا، وتا شىنىمەن دە ءساتتى ءوتتى دەپ ايتۋ ءۇشىن كەمىندە التى اي كەرەك ەكەن. ەگەر، ەمدەلۋشى ەكى قولىمەن دە بىردەي جۇمىس ىستەپ، ەكەۋىن بىردەي باسقارا السا، وندا ترانسپلانتاسيا ءساتتى بولدى دەپ ايتۋعا بولادى.

ايتا كەتەر بولساق، ادامعا ءبىر دەنە مۇشەسىن ترانسپلانتاسيا ارقىلى سالىپ بەرۋ ءۇشىن ول مۇشەسىنەن وقىستا ايىرىلىپ قالعان بولۋ كەرەك، ال تۋماسىنان ءبىر دەنە مۇشەسى جوق بولسا، وندا ونى سالۋ وسى ۋاقىتقا دەيىن مۇمكىن بولماعان. اسىرەسە، ەگەر ادام جاسقا كەلىپ قالعان ەرەسەك بولسا.

حيرۋرگتاردىڭ ايتۋىنشا، پوترگە جاسالعان وتانىڭ ءساتتى شىققانى كوپ ادامعا ءۇمىت وتىن سىيلايدى.