وتكەن ءبىر ەكى تاۋلىك ىشىندە جەرورتا تەڭىزىندە مىڭعا جۋىق ميگرانت قۇتقارىلدى دەپ حابارلايدى 24.kz.

دەنى – ليۆيادان يتالياعا جەتۋدى كوزدەگەن سولتۇستىك افريكا ەلدەرىنىڭ ازاماتتارى. ولار سيسيليا جاعالاۋىنا جەتكىزىلىپ، العاشقى كومەك كورسەتىلدى. ميگرانتتاردى قۇتقارۋ ءۇشىن يتاليا جاعالاۋ قىزمەتى ۇزىنسانى 9 وپەراسيا وتكىزدى. مالىمەتكە سۇيەنسەك، مىڭعا جۋىق بوسقىن التى رەزەڭكە جانە 2 اعاش قايىققا ءبولىنىپ مىنگەن. «رەيتەر» اگەنتتىگىنىڭ حابارلاۋىنشا، وتكەن جىلى جەرورتا تەڭىزى ارقىلى كارى قۇرلىققا جەتۋدى دىتتەگەن 4،5 مىڭ ميگرانت سۋعا كەتكەن. ەۋروپاعا ليۆيا ارقىلى اعىلعان بوسقىنداردىڭ دەنى سوعىس ايماعىنان ەمەس، ەكونوميكالىق جاعدايى ناشار ەلدەردەن شىققان. ولاردىڭ كارى قۇرلىقتان بوسقىن مارتەبەسىن الۋعا ەش مۇمكىندىگى جوق. سوندىقتان ەۋرووداق مۇنداي بوسقىنداردى كەلگەن ەلىنە قايتا جونەلتەدى.