قازاقستاندىق ديپلوماتتار ازىق-تۇلىك دۇكەنىنەن تاعى ءبىر قازاقستان ازاماتىن بوساتىپ الدى، ول – شىمكەنت تۇرعىنى ەرتاي ەرەجەپوۆ. قازاقستاننىڭ ماسكەۋدەگى ەلشىلىگىنەن جابىرلەنۋشىنىڭ اناسى كومەك سۇراعان دەپ حابارلايدى "كتك" تەلەارناسى.
جۇمىس ىزدەدىم جۇك تاسۋشى قىزمەتى تۋرالى حابارلاندىرۋدى ەرتاي ەرەجەپوۆ جەرگىلىكتى گازەتتەن تاۋىپ الادى. حابارلاندىرۋدا كورسەتىلگەن تەلەفونعا حابارلاسىپ، ەرتاي ساراتوۆتا جۇمىس ىستەۋ كەرەكتىگىن بىلەدى.
"قاراسام جۇمىس ورنى بار ەكەن: "جۇك تاسۋشى كەرەك" دەپ تۇر. حابارلاستىم. تۇتقانى ءبىر قىز كوتەردى. ونىمەن سويلەسسەم، "وسىنداي ءبىر جۇمىس بار، ءبىراق قازاقستاندا ەمەس، رەسەيدە، ساراتوۆ قالاسىندا. جۇك تاسۋشى" دەيدى. مەن جارايدى، كەزدەسەيىك دەدىم. كەزدەستىك. ول: "دۇكەن اپكەمدىكى، كۇيەۋى دە سوندا، قازاقتار، قورىقپا! ءوزىمىزدىڭ شىمكەنتتىكتەر!" — دەدى. مەن كەلىستىم. سەنىپ قالدىم"، — دەيدى ەرتاي ەرەجەپوۆ تەلەارناعا. جىگىتپەن اڭگىمەلەسكەن قىز – ازىق-تۇلىك دۇكەنى يەسىنىڭ تۋىسى. ول ەرتايعا ماسكەۋگە دەيىن بيلەت الىپ بەرىپ، اۋەجايعا شىعارىپ سالادى. ماسكەۋدەن ساراتوۆ قالاسىنا ءوزى جەتۋگە ءتيىس بولاتىن، الايدا ماسكەۋلىك اۋەجايدا دۇكەن يەسى جانسۇلۋ يستانبەكوۆانىڭ كۇيەۋى كۇتىپ الادى. ول جىگىتتى گوليانوۆو اۋدانىنداعى دۇكەنگە الىپ بارىپ، قۇجاتتارى مەن تەلەفونىن تارتىپ الادى.
قاشۋ
قازاقستاندىق ون كۇننەن سوڭ عانا قاشىپ شىعا الدى، ول ءبىر اپتا بويى ماسكەۋ سوبورلىق مەشىتىندە تۇرعان. جانسۇلۋ يستانبەكوۆادان ەرتايدىڭ ءتولقۇجاتىن قايتارىپ الۋعا مەشىتتە تۇراتىن مىقتى جىگىتتەر كومەكتەسكەن. ەرەجەپوۆتىڭ ايتۋىنشا، ول قازاقستان ەلشىلىگىنە بارعانىمەن، ەشقانداي كومەك بولماپتى. الايدا سىرتقى ىستەر مينيسترلىگى بۇل اقپاراتتى تەرىسكە شىعارادى.
"ازاماتتىڭ وتىنىشىنەن سوڭ ءبىزدىڭ ديپلوماتتار كورسەتىلگەن دۇكەنگە بارىپ، پسيحولوگيالىق قىسىم كورسەتۋ ارقىلى ەرەجەپوۆتىڭ قۇجاتتارىن قايتارىپ الادى دا، وزىنە ۇستادى. بۇدان بولەك، قازاقستانعا قايتۋعا قاراجاتى بولماعاندىقتان، ديپلوماتتار جىگىتكە پويىزبەن وتانىنا ورالۋعا كومەكتەسكەن"، — دەپ ءتۇسىندىردى ق ر ءسىم باسپا ءسوز قىزمەتىنىڭ باسشىسى ءانۋار جايناقوۆ.
