ۋنيۆەرسيادا ەرىكتىلەرىنىڭ ءبىرىنىڭ اناسى تاماققا بايلانىستى ارىزدانىپتى. ەرىكتىلەر كۇنىنە 12 ساعات جۇمىس ىستەيدى. كوبىسى ستۋدەنتتەر. ولار ۋنيۆەرسيادانىڭ جوعارى دەڭگەيدە وتكىزىلۋىنە مەملەكەتكە كومەكتەسىپ ءجۇر. ءتىپتى كەيبىرى تۇنگە دەيىن قالىپ جۇمىس جاساپ، ۇيىقتاۋعا عانا ۇيىنە بارادى. ەرىكتىنىڭ اناسىنىڭ ايتۋىنشا، نەگىزگى جۇمىس تازا اۋادا، تاۋ جاقتا وتەدى. ەندەشە مەملەكەتكە تەگىن قىزمەتىن ۇسىنىپ جۇرگەن ەرىكتىلەرگە قانداي تاماق بەرىلەتىندىگىن كورەيىك.

انانىڭ ايتۋىنشا، مۇنى جەۋ مۇمكىن ەمەس. «ۇلىم تاماقتى ۇيدەن الىپ كەتەدى. مەن وعان دايىنداپ قويامىن. الايدا ۇيلەرىنەن تاماق اكەلۋگە مۇمكىندىگى جوق قىز-جىگىتتەر دە بارشىلىق. سوندايدا مەنىڭ ۇلىم دوستارىممەن بولىسەدى» دەيدى ول.

ايەلدىڭ شاعىمىنا ۋنيۆەرسيادا ۇيىمداستىرۋشىلارى بىردەن جاۋاپ بەرۋگە اسىقتى. بەرگەن جاۋاپتارى مىنانداي:

«جۇمىس كۇنى سەگىز ساعاتتان تۇرادى. كەيدە ون ساعاتقا دەيىن سوزىلۋى مۇمكىن. ەرىكتىلەرگە الدىن-الا ءبارى ەسكەرتىلەدى. ولار ءۇشىن ءبىر رەتتىك تەگىن تاماق قاراستىرىلعان. سەگىز ساعاتتىق جۇمىس كۇنى ءۇشىن بۇل قالىپتى. تاماقتى لانچ-بوكسقا سالىپ بەرەمىز. ىشىندە مىندەتتى تۇردە بولۋى قاجەت: سالات (150 گرامم)، ەت قوسىلعان ىستىق تاماق (150 گرامم)، گارنير (150 گرامم). سونىمەن قاتار ەرىكتىلەرگە اقىسىز تۇردە ىستىق سۋسىن، كامپيت جانە پەچەنە بەرىلەدى. تاماقپەن مەردىگەر اينالىسىپ جاتىر. ەگەر نورماعا ساي ەمەس جاعداي انىقتالعان كۇندە مىندەتتى تۇردە شارا قولدانىلادى».

ايتا كەتەرلىگى، ۋنيۆەرسيادا دەپ تالماي ەڭبەك ەتىپ جۇرگەن ەرىكتىلەردىڭ سانى 3000.

يليا كوروليەۆتىڭ جەكە بلوگىنان