اق جايىقتىڭ قوس ارۋىنا ۇيلەنگەن اقتاۋلىق ەگىزدەر ەسىڭىزدە مە؟ جاراسىمدى جانۇيالار بۇگىندە ءبىر شاڭىراق استىندا ءتاتۋ-تاتتى كۇن كەشىپ جاتىر دەپ جازادى 24.kz.

تورەبەك پەن اسىل قىز تاربيەلەسە، جولداسبەك پەن ايىم اۋلەتتىڭ ءىزىن جالعار ۇل ءوسىرىپ ءجۇر. ماڭعىستاۋعا كەلىن بولىپ تۇسكەن ەگىز قىزدار ەكىنشى پەرزەنتىن كۇتىپ ۇيدە وتىر. ال، مۇنايلى اۋداندىق اۋىل شارۋاشىلىعى ينسپەكسياسىنىڭ مامانى تولەپبەرگەن ۇزاقبايەۆتىڭ ۇلدارى اكە جولىن جالعاپ، قىزمەتكە جاراپ تۇر.

اراسى ون مينۋتتىق ەگىز ۇلداردى دا بىردەن اجىراتا قويۋ قيىن. اتا-اناسى ولاردىڭ وتىرىسىنا قاراپ انىقتايدى. داستارحانعا الدىمەن ۇلكەنى، سوسىن كىشىسى جايعاسادى. جالپى، تاربيەلى وتباسىدا ءۇش قىز بەن ۇل دۇنيەگە كەلگەن. ال، ەل نازارىن اۋدارعان كەنجەلەردىڭ ەگىزدەرمەن وتاۋ قۇرۋىنا ناعاشى اجەلەرىنىڭ وسيەتى سەبەپكەر ەكەن.

ليزا ساربالايەۆا، ەگىز ۇلداردىڭ اناسى:

- اۋىردى ءبىزدىڭ بالالار ۇشكە كەلگەندە. حال ۇستىندە جاتىر دەگەسىن بارىپ قاسىندا وتىر ەدىك: «ءاي، ليزا! تورەبەك پەن جولداسبەك ەكەۋى ءبىر ادام، سەن بولاشاقتا سولارعا ءبىر ءۇيدىڭ بالاسىن العانىڭ جاقسى-اۋ» دەپ قولىن باتىس جاققا قاراي سەرمەدى.

ەگىزدەر تاڭەرتەڭ جۇمىسقا بىرگە شىعادى. تورەبەك ءىنىسىن جولدان تاستاپ، قالاعا كورشىلەس اۋىلداعى قىزمەتىنە جەتەدى. قايتاردا ۇيگە الا كەلەدى. قالعان ۋاقىتتا جۇپتارى جازىلمايدى. باقىتتى اكە كەنجەلەرىنىڭ وڭىرلىك مال شارۋاشىلىعىنىڭ دامىتۋعا دەن قويۋىمەن شاتتانادى.

تولەپبەرگەن ۇزاقبايەۆ، ەگىز ۇلداردىڭ اكەسى:

- بىرەۋى زەرتحانادا جۇمىس جاسايدى، بىرەۋى ەلدى مەكەندە مال دارىگەر بولىپ جۇمىس ىستەيدى. جالپى، قازاقستان بويىنشا مال دارىگەرلىك جۇيەگە كوپ ادام بارمايدى. سەبەبى، ايلىعىن از كورەدى، جۇمىسىن قيىنسىنادى.

قازاقىلىق ساقتالعان وڭىردە بوساعا اتتاعان ەگىز قىزدار ۇيدە ۇلتتىق كيىممەن جۇرەدى. ۇلكەنى داستارحان جايىپ، اس دايارلاسا، كىشىسى شايدى شەبەر قۇيادى. تويدان سوڭ، ءبىر كەلىن ۇيگە ەسىكتەن، ەكىنشىسى باسقىش قويىلعان تەرەزەدەن كىرگەنى جۇرتقا اڭىز. ال، ەگىزدەر بەتاشاردان سوڭ كەلىنشەكتەرىن ايىرا الماي قالعانىن كۇلىپ ەسكە الادى.

تورەبەك تولەپبەرگەن ۇلى، ەگىزدىڭ ۇلكەنى:

- تانىسقاننان كەيىن كۇندە كورىپ جۇرگەن ادامدى ايىراسىڭ عوي. ەڭ قىزىق كەزى، ۇيلەنەتىن كەزدە بەتتەرىنە بوياۋ جاققان كەزدە ايىرا الماي قالدىق. تانىماي قالدىق، شىنىمىزدى ايتساق.

ەگىزدەر اتا-اناسىن باعىپ، ءۇش بولمەلى پاتەردە تۇرىپ جاتىر. بىر-بىرىنە ۇقساس بولمەلەر ومىرگە ەكىنشى ءسابي كەلسە، تارلاۋ بولارى راس.

سوندىقتان دا، قوس ۇل كەلەشەكتە قونىس اۋدارۋدى جوسپارلاپ ءجۇر.