ديماش قۇدايبەرگەن ازيانىڭ ەڭ تانىمال ءانشىسى نوميناسياسىنا ۇسىنىلدى، دەپ حابارلايدى tengrinews.kz. بۇل تۋرالى ءانشىنىڭ PR-ديرەكتورى الپامىس شاريموۆ كەشە، ياعني 26 ناۋرىز كۇنى حابارلادى.
«دوستار! تاعى دا تاقىم قىساتىن ءسات كەلدى. ەرتەڭ تىكەلەي ەفير 19:30-دا Dragon TV(东方卫视) ارناسىندا ازيانىڭ ەڭ ۇلكەن ماسشتابتاعى ماراپاتى China Top music Awards شاراسى وتەدى. ديماشىمىز Best Asia popular singer ("ازيانىڭ ەڭ تانىمال ءانشىسى") نوميناسياسىنا ۇسىنىلعانداردىڭ قاتارىندا. العاش قاتىسىپ وتىرعان xالىقارالىق ماراپاتتان ءۇمىتىمىز زور!!! وسى كەشتە ازيانىڭ انشىلەرىمەن بىرگە قىزىل كىلەمنەن ءوتىپ، ونەر كورسەتەتىن بولادى. ءبارى دە سىزدەردىڭ تىلەكتەرىڭىزبەن! ال، جاقسىلىققا جوريىق!!!»، - دەپ جازدى ءانشىنىڭ ديرەكتورى ءارى دوسى.
ال ديماش ءوزىنىڭ ينستاگرام پارقاشاسىندا بىلاي دەپ جازدى:
«شانحاي، Dears، ەرتەڭ 15:00 قىزىل كىلەمدە (red carpet)/ 19:30 Mercedes Bens Arena-دا كەزدەسكەنشە!!! ازيانىڭ ەڭ ۇلكەن ماسشتابتاعى China Top music Awards ماراپاتىندا ادەمى كوڭىل-كۇي سىيلاۋعا تىرىسامىن!!! جاقسى كورەمىن».
ەسكە سالا كەتەيىك، كەشە ديماش قۇدايبەرگەن I am a Singer بايقاۋىنىڭ 10-شى كەزەڭىندە 3-ورىن الىپ، بايقاۋدىڭ فينالىنا شىققان بولاتىن. بۇل كەزەڭدە قازاقستاندىق ءانشى «ۇمىتىلماس كۇن» ءانىن قازاق جانە جۇڭگو تىلىندە ورىندادى. ايتا كەتەيىك، ءاننىڭ اۆتورى ديماش قۇدايبەرگەننىڭ ءوزى. ال ءسوزىن ورال بايسەڭگىر جازعان.
