جاس مەملەكەتكە الەم كەڭىستىگىندە قاناتتى ەركىن جايىپ، بيىككە سامعاۋ وڭاي شارۋا ەمەس. ەلىمىز ەگەمەندىك الىپ، حالقىمىز عاسىرلار بويى كوكسەگەن ارمانعا جەتكەن تۇستا ەل تاۋەلسىزدىگىنىڭ تۇعىرىن نىقتاۋ العىشارتتارىنىڭ ءبىرى – ول، ارينە، قاۋىپسىزدىك ماسەلەسى. وتانىمىزداعى كوپ سالالى قۇرىلىمداردىڭ ءبىرى رەتىندە دە قۇقىق قورعاۋ سالاسىنىڭ ورنى ەرەكشە. تاۋەلسىزدىك العان العاشقى جىلداردان باستاپ ەلىمىزدە قوعامدىق ءتارتىپتى قامتاماسىز ەتىپ، قىلمىسپەن كۇرەستى كۇشەيتۋدە پوليسيا قىزمەتكەرلەرى قاجىرلى ەڭبەك ەتىپ كەلەدى. ولار ءوز مىندەتتەرىن ادال اتقارىپ، قىلمىسكەرلەردى قۇرىقتاۋدا ومىرلەرىنە ءقاۋىپ تونسە دە، ايانعان ەمەس. سەبەبى، ەلدەگى قىلمىسقا توسقاۋىل قويىپ، ازاماتتارىمىزدىڭ بوستاندىعى مەن قۇقىقتارىن قورعاي وتىرىپ، ءتارتىپ پەن تىنىشتىقتى قامتاماسىز ەتۋىنىڭ ارقاسىندا حالىق بەيبىت تىرشىلىك ەتىپ، الاڭسىز ءومىر سۇرۋدە.
وسى جاۋاپتى قىزمەتتى جولعا قويۋدىڭ باسقى قادامى – 1992 جىلعى 23 ماۋسىمدا قازاقستان رەسپۋبليكاسى جوعارعى كەڭەسى «قازاقستان رەسپۋبليكاسى ىشكى ىستەر ورگاندارى تۋرالى» زاڭ قابىلدادى. بۇل قازاقستان پوليسياسىنىڭ قىزمەتى مەن مىندەتىن انىقتايتىن العاشقى قۇقىقتىق اكت بولاتىن. اسا ماڭىزدى جەتىستىككە قول جەتكىزگەن ساتتەردەن باستاپ-اق ىشكى ىستەر ورگاندارى قىزمەتكەرلەرىنە اۋىر دا جاۋاپتى جۇمىس جۇكتەلدى. تاۋەلسىزدىگىمىزدىڭ تۋىن كوتەرىپ، ونىڭ قازىعىنىڭ مىقتىلىعى مەن تۇراقتىلىعىن قامتاماسىز ەتۋ امانات بولدى.
ءقازىر مەملەكەتىمىز وركەندەۋدىڭ جاڭا جولىنا، الەۋمەتتىك دامۋدىڭ سونى كەزەڭىنە بەت الدى. ەلدىڭ قارقىندى دامۋىنا ەلباسىمىزدىڭ بەكىتكەن كوپتەگەن جاڭا ەكونوميكالىق باعدارلامالارى، جوبالارى، جوسپارلارى، جىل سايىنعى جولداۋلارى وڭ سەرپىن بەرىپ وتىرعانى بارشامىزعا ايان. ول قۇجاتتاردا ايقىن كورسەتىلگەن وركەنيەتتى، دامىعان وتىز ەلدىڭ قاتارىنا قوسىلۋدىڭ باعىتتارى جانە ناتيجەگە جەتۋ جولدارى ىشكى ىستەر ورگاندارىندا دا باسشىلىققا الىنىپ، قارقىندى جۇزەگە اسىرىلۋدا.
ولاردىڭ ءبىرى «ماڭگىلىك ەل» يدەياسى – حالىقتىڭ ءال-اۋقاتىن جاقسارتىپ، ىنتىماعىن ارتتىراتىن، ەلدى دامۋدىڭ جاڭا ساتىسىنا جەتەلەيتىن قارىمدى قادام. «ماڭگىلىك ەل» يدەياسىنىڭ ماڭىزدىلىعىن ەلباسى ن. نازاربايەۆ «قازاقستان جولى – 2050: ءبىر ماقسات، ءبىر مۇددە، ءبىر بولاشاق» اتتى جولداۋىنىڭ نەگىزى ەتىپ الىپ، «باستى ماقسات – قازاقستاننىڭ ەڭ دامىعان 30 مەملەكەتتىڭ قاتارىنا قوسىلۋى. ول – «ماڭگىلىك قازاقستان» جوباسى، ەل تاريحىنداعى ءبىز اياق باساتىن جاڭا ءداۋىردىڭ كەمەل كەلبەتى… وتكەن تاريحىمىزعا تاعزىم دا، بۇگىنگى باقىتىمىزعا ماقتانىش تا، گۇلدەنگەن كەلەشەككە سەنىم دە «ماڭگىلىك ەل» دەگەن قۇدىرەتتى ۇعىمعا سىيىپ تۇر» دەپ اتاپ ءوتتى. ال ەل تىنىشتىعى مەن بىرلىگى – ءتارتىپ ساقشىلارىنىڭ ۇستاناتىن باستى قاعيداسى دەسەم، ارتىق بولماس. قوعامدىق قاۋىپسىزدىك ماسەلەلەرى ەلدەگى ەكونوميكانىڭ دامۋىمەن، جۇمىسسىزدىق پەن كەدەيلىكتىڭ ازايۋىمەن، زاڭدى جوبالىق جۇمىستار ساپاسىن جاقسارتۋ بويىنشا يننوۆاسيالىق تەحنولوگيانى جانە جۇيەلى جۇمىسپەن ماتەريالدىق-تەحنيكالىق بازانى نىعايتۋمەن شەشىمىن تابۋدا.
ن.ءا.نازاربايەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىندا: «تابىستى وتكەن ەكى جاڭعىرۋ ارقىلى باعا جەتپەس تاجىريبە جيناقتادىق. ءبىز ەندى العا باتىل قادام باسىپ، ءۇشىنشى جاڭعىرۋدى باستاۋعا ءتيىسپىز»، – دەپ كورسەتتى. مەملەكەتىمىزدىڭ جاڭعىرۋ جولدارى وڭ ناتيجەسىن بەرگەندىگىنىڭ ەڭ باستى كورسەتكىشى – ەلىمىزدەگى بەيبىتشىلىك. جاھاندانۋ داۋىرىندە جاڭا دامۋ جولىنا تۇسۋدە ءاربىر ەلىن سۇيەتىن ازامات ۇلتتىق يدەيانى، تاريحي مۇرا قازىنالارىن ساقتاپ، قالىپتاسقان ءداستۇرىمىز بەن رۋحاني قۇندىلىقتاردىڭ قاسيەتىن جوعالتپاي، كەيىنگى ۇرپاققا امانات ەتۋگە اتسالىسۋى كەرەك. تاۋەلسىزدىگىمىزدى، اتا-بابامىزدىڭ مۇراسى، باستى بايلىعىمىز – جەرىمىزدى، ءتىلىمىزدى، ءدىلىمىزدى قورعاپ، كەلەشەككە جەتكىزىپ، ماڭگىلىك ەل جاسايتىن جاستاردى تاربيەلەۋ – ءبىزدىڭ ماقساتىمىز. سول ماقساتقا جەتۋ ءۇشىن، قازاق ەلىنىڭ ايبىنىن اسقاقتاتىپ، ەڭ الپاۋىت مەملەكەتتەرمەن باسەكەگە قابىلەتتىلەردىڭ قاتارىنا قوسىلۋدا جەرىمىزدەگى ۇلتارالىق كەلىسىم، ساياسي تۇراقتىلىق، ىنتىماقتاستىقتى ساقتاي وتىرىپ، كوپتەگەن ناتيجەگە جەتە الامىز.
ەلدiڭ iشكi iستەر ورگاندارىنىڭ تاريحى – بۇل قازاقستان تاريحىنىڭ ماڭىزدى بiر ءبولiگi. تاۋەلسىزدىك تاڭى اتقالى پوليسيا ساپىندا قىزمەت اتقاراتىن ازاماتتاردىڭ قاتارىن تولتىرۋدا ءىىم م. بوكەنبايەۆ اتىنداعى اقتوبە زاڭ ينستيتۋتىنىڭ دا ۇلەسى زور. ەگەمەندىگىنە بار-جوعى 5 جىل تولعان، قالىپتاسۋ جولىندا كوپتەگەن قيىنشىلاقتاردى باستان كەشىپ وتىرعان جاس مەملەكەتتە 1996 جىلى ءىىم قوستاناي جوعارعى مەكتەبىنىڭ اقتوبە فيليالىن جاساقتاۋ تۋرالى كۇردەلى شەشىم قابىلداندى. سەبەبى، جاس مەملەكەتتىڭ قاۋىپسىزدىگىن ساقتايتىن كاسىبي ماماندار سول كەزدەگى باستى قاجەتتىلىكتەردىڭ جانە مەملەكەت ىرگەتاسىن نىعايتۋدىڭ ماڭىزدى فاكتورلارىنىڭ ءبىرى ەدى. ينستيتۋت – ىشكى ىستەر مينيسترلىگىنىڭ، جەرگىلىكتى باسقارۋ ورگاندارى مەن جەكەلەگەن باسشىلاردىڭ وراسان زور قولداۋىمەن اشىلىپ، بىرنەشە رەت جوعارىلاۋ ساتىلارىنان وتكەن، ەلىمىزدىڭ باتىس وڭىرىندەگى قۇقىق قورعاۋ ورگاندارىنا كاسىبي مامان دايارلاپ شىعاراتىن بىردەن-بىر جوعارى وقۋ ورنى. بۇگىندە وقۋ ورداسى عىلىمنىڭ ۇزدىك داستۇرلەرىن جالعاستىرىپ، جوعارى ءبىلىمدى ىشكى ىستەر ورگاندارىنىڭ ماماندارىن دايىنداۋ مەن قىزمەتكەرلەردىڭ بىلىكتىلىگىن ارتتىرۋ جۇمىستارىنا سۇبەلى ۇلەس قوسىپ، قالىپتاسقان مەزگىلىنەن بەرى 4000-نان استام تۇلەك ۇشىردى. 20 جىل از ۋاقىت بولىپ كورىنگەنىمەن، وقۋ ورنى ءبىراز اسۋدان ءوتىپ، كوپتەگەن جەتىستىككە جەتتى.
قازىرگى تاڭدا ينستيتۋتتا ىشكى ىستەر مينيسترلىگىنىڭ زور قولداۋىمەن وقۋ ۇردىسىندەگى جاڭا تەحنولوگيالاردى جەتىلدىرۋ بويىنشا دا تولاسسىز جۇمىستار اتقارىلۋدا. وقىتىلىپ وتىرعان زاڭدىق ەمەس جوعارى بىلىمنەن كەيىنگى بەرىلەتىن 2 جىلدىق قىسقارتىلعان ءبىلىم بەرۋ باعدارلاماسىمەن وقىتۋ دا جاڭاشىلدىق بولىپ تابىلادى. ۇستىمىزدەگى جىلدان باستاپ ورتا بىلىمنەن كەيىنگى جوعارى ءبىلىمدى جۇزەگە اسىرماقپىز.
وقۋ ورنىمىزدىڭ بۇلجىماس باسىم باعىتى – ءىىو اۋماقتىق بولىنىستەرىنە ازاماتتاردىڭ بوستاندىعى مەن قۇقىقتارىن، مەملەكەت پەن قوعام مۇددەلەرىن ساۋاتتى قورعاي بىلەتىن، قوعامدىق ءتارتىپ جانە زاماناۋي بولمىستى ەسكەرە وتىرىپ، قىلمىسپەن كۇرەستى قامتاماسىز ەتۋگە قابىلەتى جوعارى كاسىبي ماماندار دايىنداۋ. ينستيتۋتتا وسى باعىتتا تولىققاندى ۆەدومستۆولىق جوعارى ءبىلىم الۋعا بارلىق جاعداي جاسالعان. جۇرگىزىلىپ وتىرعان وقۋ-ادىستەمەلىك، كادرلىق جانە تاربيەلىك جۇمىستاردا ەلباسىمىزدىڭ بەلگىلەپ بەرگەن باعدارلامالارىنا، جولداۋلارىنا، تەوريالىق ءبىلىمدى تاجىريبەنىڭ قاجەتتىلىگىن وتەۋگە مەيلىنشە جاقىنداتىپ وقىتۋ تۋرالى ءىىم بۇيرىقتارىنا، ەرەجەلەرى مەن نۇسقاۋلارىنا سايكەس ءبىلىم الۋشىلاردىڭ زاماناۋي ءبىلىم مەن قاجەتتى تاجىريبەلىك داعدىلارىن قالىپتاستىرۋعا اسا كوڭىل بولىنەدى. سونىمەن قاتار، يننوۆاسيالىق قۇرال-جابدىقتارمەن جانە تەحنيكالىق قۇرىلعىلارمەن جابدىقتاۋ جۇمىستارى دا بولاشاق مامانداردى ءىىو قىزمەتىنە قاتىستى زاماناۋي، جەتىلدىرىلگەن اقپاراتتىق تەحنولوگيالارمەن ءتيىمدى وقىتۋعا باعىتتالعان. ايتا كەتسەك، ينستيتۋتتىڭ پروفەسسورلىق-وقىتۋشىلىق قۇرامى سالامىزعا بايلانىستى كوپتەگەن الىس جانە تاياۋ شەتەلدەردىڭ وزىق تاجىريبەلەرىن وقۋ ۇدەرىسىنە ەنگىزۋ ماقساتىندا حالىقارالىق، رەسپۋبليكالىق، وبلىستىق دەڭگەيدەگى عىلىمي-تاجىريبەلىك كونفەرەنسيالاردى ءجيى وتكىزىپ، ناتيجەسىندە عىلىمي جاڭاشىلدىقتار مەن ىزدەنىستەرگە ارقاۋ ەتىپ، ەڭبەكتەرىن ۇنەمى جاريالاپ، ەلىمىزدەگى قۇقىق قورعاۋ سالاسىنىڭ ماماندارىن دايارلاۋ ىسىنە ولشەۋسىز ەڭبەك ءسىڭىرىپ كەلەدى.
ەلباسىنىڭ «100 ناقتى قادام» – جاھاندىق جانە ىشكى سىن-قاتەرلەرگە جاۋاپ جانە سونىمەن ءبىر مەزگىلدە، جاڭا تاريحي جاعدايلاردا ۇلتتىڭ دامىعان مەملەكەتتەردىڭ وتىزدىعىنا كىرۋى جونىندەگى جوسپارىنىڭ 30-قادامىندا «جەرگىلىكتى اتقارۋشى ورگاندارعا جانە جەرگىلىكتى قوعامداستىققا ەسەپ بەرەتىن جەرگىلىكتى پوليسيا قىزمەتىن قۇرۋ. جەرگىلىكتى پوليسيا قىزمەتىنىڭ وكىلەتتىلىگى: قوعامدىق ءتارتىپتى قورعاۋ ماسەلەلەرى، تۇرمىستىق قىلمىسقا قارسى تۇرۋ، جول-باقىلاۋ قىزمەتى، ۇساق قۇقىق بۇزۋشىلىققا اتىمەن توزبەۋشىلىك» دەلىنگەن.
قازىرگى تاڭدا ينستيتۋتىمىزدا جەرگىلىكتى پوليسيا قىزمەتىنە دە ماماندار دايىندالىپ، بۇل قادامنىڭ دا جۇزەگە اسىرىلۋ جۇمىسىنا قاتىسىپ وتىرمىز. بۇل دا وقۋ پروسەسىنىڭ ءبىر ورىندا تۇرالاپ قالماي، زامان تالابىنا ساي دامۋىنىڭ جانە ەلباسى بەلگىلەگەن مەجەلەرگە دەر كەزىندە جەتۋ مەن جۇزەگە اسۋىنىڭ ايعاعى.
تاعى ءبىر اتاپ وتەتىن ماسەلە، جاھاندانۋ عاسىرىنداعى ءتۇرلى وزگەرىستەر مەن جاڭالىقتار ەلىمىزدەگى بارلىق سالالارعا تىڭ ىزدەنىستەردى قاجەت ەتىپ وتىر. كەلەشەككە تەرەڭ بىلىممەن قادام باسىپ، الەمدىك ءبىلىم كەڭىستىگىنىڭ قۇپيالارىنا ءۇڭىلىپ، قوعامعا بەيىم، ءوز قابىلەتىن تانىتا الاتىن، جان-جاقتى دامىعان، بىرنەشە ءتىلدى مەڭگەرگەن قۇزىرەتتى تۇلعانى قالىپتاستىرۋ – باستى ماقساتتاردىڭ بىرەگەيى. «جاھاندىق داعدارىستىڭ جالعاسۋىنىڭ اسەرىنەن الەمدە بولىپ جاتقان وزگەرىستەر ءبىزدى ۇرەيلەندىرمەيدى. ءبىز ولارعا دايىنبىز. ءبىزدىڭ ەندىگى مىندەتىمىز – ەگەمەندىك جىلدارى قول جەتكىزگەننىڭ بارلىعىن ساقتاي وتىرىپ، ءححى عاسىردا ورنىقتى دامۋدى جالعاستىرۋ»، – دەپ ەلباسىمىزدىڭ جولداۋىندا ايتىلعانداي، ەلىمىز قاي سالادا بولماسىن قارقىندى دامۋدا. ءبىلىم بەرۋ جۇيەسىندە مودەرنيزاسيالانعان زاماندا كوپ ءتىلدى مەڭگەرتۋگە باسا نازار اۋدارىلىپ، جان-جاقتى جول اشىلدى. ۇشتىلدىلىك – باسەكەگە قابىلەتتى ەلدەر قاتارىنا اپارار باستى باسپالداقتاردىڭ ءبىرى.
ەلباسىمىزدىڭ «جاڭا الەمدەگى جاڭا قازاقستان» اتتى جولداۋىندا: «تىلدەردىڭ ءۇشتۇعىرلىعى مادەني جوباسىن كەزەڭدەپ جۇزەگە اسىرۋدى قولعا الۋدى ۇسىنامىن. قازاقستان بۇكىل الەمگە حالقى ءۇش ءتىلدى پايدالاناتىن مادەنيەتتى ەل رەتىندە تانىلۋعا ءتيىس. بۇلار: قازاق ءتىلى – مەملەكەتتىك ءتىل، ورىس ءتىلى – ۇلتارالىق قاتىناس ءتىلى جانە اعىلشىن ءتىلى – جاھاندىق ەكونوميكاعا ويداعىداي كىرۋ ءتىلى» دەپ كورسەتكەندەي، الەمدىك كەڭىستىككە ەنۋدە اعىلشىن ءتىلىنىڭ ماڭىزى زور. اعىلشىن ءتىلىن ءبىلۋ ءبىزدىڭ جاستارعا شەكسىز مۇمكىندىكتەر اشادى. ول – جاھاندانۋدىڭ كەپىلى. بۇگىندە ونى قولدانۋعا جان-جاقتى كۇش سالىنۋدا. وسى جوبانى يگەرۋ ماقساتىندا ءبىزدىڭ وقۋ ورنىمىز دا ۇشتىلدىلىكتى ەنگىزۋدىڭ، ونى ءتيىمدى جۇرگىزۋدىڭ تىڭ جولدارىن ىزدەنىپ، ەنگىزۋگە قادامدار جاساۋدا.
سونىمەن قوسا، «بولاشاققا باعدار: رۋحاني جاڭعىرۋ» اتتى ماقالاسىن دا حالىق دامۋ فاكتورلارىن ايقىندايتىن نەگىزگى باعدارلامالىق قۇجات ىسپەتتەس قابىلدادى. ماقالادا كورسەتىلگەن قازىرگى تاڭداعى وزەكتى قوعامدىق-ساياسي جانە مادەني-ادامگەرشىلىك باعىتتاعى ناقتى شارالار – يدەيانى شىنايى ىسكە اسىرۋعا باعىتتالعان. سەبەبى، قازاق ەلىنىڭ رۋحاني مادەنيەتى – قۋاتتى يدەولوگيا. رۋحتى جاڭعىرتۋ – ءبىزدىڭ ەلىمىزدىڭ بىرەگەيلىگىن ساقتاۋعا جانە ءدىني ەكسترەميزم مەن تەرروريزمگە، الەمدىك قاقتىعىستاردىڭ جاڭا تۇرلەرىنە قارسى مىقتى قالقان بولماق. الەمدەگى جاھاندانۋ ۇدەرىسى، قولجەتىمدى اقپاراتتار لەگى جاستاردىڭ بويىندا تەرىس اعىمداعى يدەولوگيالارعا قارسى تۇرا بىلەتىن قابىلەتتى تاربيەلەۋدى قاجەت ەتەدى. ادامداردىڭ تەرىس ارەكەتتەرگە بارىپ، قوعام مەن ازاماتتاردىڭ ومىرىنە ءقاۋىپ توندىرەتىن ارەكەتتەرگە بارۋى جان-جاقتى ساۋاتتىلىقتىڭ جەتىسپەۋشىلىگى.
قارقىندى دامۋدىڭ ايقىن جولدارىنىڭ ءبىر تارماعى بولىپ وتىرعان ءبىزدىڭ تاۋەلسىز جاس مەملەكەتىمىز ءۇشىن ەكسپو-2017 كورمەسى ءوتۋىنىڭ ماڭىزى وتە زور، ول بۇكىلالەمدىك ارەنادا قازاقستاننىڭ تانىلۋى مەن تۋريستىك تارتىمدىلىعىن ارتتىرۋعا، ءبىزدىڭ حالقىمىزدىڭ قوناقجايلىلىعىن كورسەتۋگە باعىتتالعان. وسىنداي اۋقىمدى شارانىڭ ناتيجەسىندە ءاربىر قازاقستاندىق جەڭىسكە جەتەتىنىمىزگە سەنەدى. كورمە وتكىزۋ، سونىمەن قاتار، ەلوردانىڭ، تۇتاستاي ەلىمىزدىڭ ەكونوميكالىق جانە ينفراقۇرىلىمدىق دامۋى ءۇشىن قوسىمشا سەرپىلىس بولىپ، العا جەتەلەيدى. ويتكەنى، ءبىز ءۇشىن قاي ىستە، قاي سالادا بولماسىن جەڭىس ماڭىزدى.
ينستيتۋت قابىرعاسىندا بەرىلەتىن بىلىممەن قاتار مادەني، رۋحاني-ادامگەرشىلىك تاربيە جۇمىستارى دا جالعاستىرىلۋدا. ارينە، العا قويىلعان ەڭ باتىل جوسپارلار مەن يدەيالاردىڭ، مىندەتتەر مەن ماقساتتاردىڭ وڭتايلى جۇزەگە اسىرىلۋى ينستيتۋت ۇجىمىنىڭ ماقساتكەرلىگى، جاسامپاز جىگەرى، ۇلكەن شىعارماشىلىق ىزدەنىسى مەن جوعارى كاسىبي شەبەرلىگىنە تىكەلەي بايلانىستى. «ەركىن ەلدە وسكەن ۇرپاقتىڭ رۋحى ءاردايىم بيىك بولۋى ءتيىس. جاستارى جالىن جۇرەكتى، ءورشىل نامىستى، بيىك رۋحتى بولسا – ول ەلدىڭ ەڭسەسى دە بيىك بولادى. ءورشىل، نامىسشىل جاس وتانشىل، پاتريوت كەلەدى، حالقىنا، ءوز ۇلتىنا ادال قىزمەت ەتۋگە ۇمتىلادى»، – دەپ ەلباسىمىز ن.ءا. نازاربايەۆ اتاپ كورسەتكەندەي، قازاقستان پوليسياسىنىڭ 25 جىل ىشىندە جۇرگەن جولىن شولىپ وتسەك، قوعامدىق قاۋىپسىزدىكتى ساقتاۋ جۇيەسىن بارىنشا ىلگەرىلەتىپ، الەمدىك وزىق تاجىريبەلەردى جيناقتاپ، ىسكە قوسۋ ارقىلى جانداندىرىلۋى مەن تىنىمسىز جۇمىستار ارقىلى حالىق سەنىمىن ارتتىردى. ەلدىگىمىزبەن قاتار بوي كوتەرىپ، بەيبىت ومىردە قاراپايىم حالىقتىڭ اماندىعى ءۇشىن كەز كەلگەن ۋاقىتتا قورعاۋعا بەرىلە كىرىسىپ، ءوز ومىرلەرىن قاتەرگە تىگۋگە ءارقاشاندا دايىن ءتارتىپ ساقشىلارىنىڭ بارشا قازاقستاندىقتاردىڭ الدىندا ابىرويلارى كۇن ساناپ ءوسىپ وتىرعاندىعى – ساقشىلاردىڭ كۇندەلىكتى تابىستى ەڭبەكتەرىنىڭ ناتيجەسى. پوليسيا ساپىنداعى ساقشىلاردىڭ ىستەرى وتاندىق جاستارعا ۇلگى بولىپ، ۇلتتىق رۋحى بيىك تۇلعالار جەتىلە بەرسىن!

سالىمگەرەي قاراكۇشيەۆ،
ءىىم م. بوكەنبايەۆ اتىنداعى
اقتوبە زاڭ ينستيتۋتىنىڭ باستىعى،
ز.ع.ك.، پوليسيا پولكوۆنيگى