زاڭگەر ابزال قۇسپان ءوزىنىڭ Facebook پاراقشاسىنا تۇركيا ازاماتى وعىز دوعان مەن "ەير-استانا" اۋە كومپانياسى قىزمەتكەرى اراسىنداعى تىلگە قاتىستى كيكىلجىڭگە زاڭ تۇرعىسىنان تۇسىنىكتەمە بەردى دەپ جازادى Qamshy.kz اقپارات اگەنتتىگى. ابزال قۇسپاننىڭ ايتۋىنشا، تۇركيالىق جۋرناليست اتالمىش كومپانيانى سوتقا بەرەر بولسا، جەڭىسكە جەتەدى. وعان ءوزى كەپىل بولىپ وتىر. 

"كەز كەلگەن سالادا ولاردىڭ قىزمەتىن رەتتەپ وتىراتىن ءوزىنىڭ سالالىق، ياعني ءپروفيلدى زاڭدارى بولادى. اۋە سالاسىنا قاتىستى زاڭ، ول – «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياسيا قىزمەتى تۋرالى» قازاقستان رەسپۋبليكاسىنىڭ 2010 جىلعى 15 شىلدەدەگى №339-IV زاڭى بولىپ تابىلادى. اتالعان زاڭنىڭ 56-بابى، 6-بولىگىندە بىلاي دەپ كورسەتىلگەن (سوزبە-سوز) «قازاقستان رەسپۋبليكاسىنىڭ ازاماتتىق اۋە كەمەسىنىڭ كابينا ەكيپاجىنىڭ مۇشەلەرى جولاۋشىلارعا قىزمەت كورسەتۋدە قازاق ءتىلىن ەركىن مەڭگەرۋگە مىندەتتى». 
ودان بولەك، وعىز دوعان «ەير استانا» كومپانياسىنىڭ قىزمەتىن تۇتىنۋشى، ال كومپانيا قىزمەت كورسەتۋشى رەتىندە، ەكەۋارا قارىم-قاتىناسى «تۇتىنۋشىلاردىڭ قۇقىعىن قورعاۋ تۋرالى» قازاقستان رەسپۋبليكاسىنىڭ 2010 جىلعى 4 مامىرداعى №274-IV زاڭىنىڭ 24، 25، 26-باپتارىندا قىزمەت كورسەتۋشىنىڭ تۇتىنۋشىعا اقپاراتتاردى قازاق جانە ورىس تىلىندە جەتكىزۋ مىندەتى تايعا تاڭبا باسقانداي انىق كورسەتىلگەن!" – دەپ جازدى ابزال قۇسپان. 
سونىمەن قاتار، زاڭگەر ءتىل ماسەلەسىن تەك بيلىككە ىسىرىپ قويماي، وعان قاتىستى زاڭداردى جۇمىس جاساتۋ حالىقتىڭ قولىندا ەكەنىن ايتادى. 
"ەگەر ءبىز، ءوز قۇقىعىمىزدى تالاپ ەتۋدەن قورىقساق، ءبىر بەت ارىز جازۋعا ەرىنسەك، مەملەكەتتىك ورگاندار ءقايتىپ ىسكە ارالاسپاق؟ ءسىزدىڭ قۇقىعىڭىزدىڭ بۇزىلىپ جاتقانىن ولار پال اشىپ بىلمەك پە؟ 
ۇزىن ءسوزدىڭ قىسقاسى، اۋەدە جۇرسەڭىز دە، جەردە جۇرسەڭىز دە ءوز انا تىلىڭىزدە، مەملەكەتتىك تىلدە قىزمەت كورسەتىلۋىن تالاپ ەتىڭىز، ەگەر ول تالابىڭىز ورىندالماسا، ءتيىستى مەملەكەتتىك ورگانعا نەمەسە سوتقا ارىز، تالاپ قويۋدى جاپپاي قولعا الايىق. انا ءتىلىمىزدىڭ ابىرويىن اسقاقتاتۋعا سوزبەن ەمەس، ىسپەن ۇلەس قوسايىق!" – دەپ ءسوزىن تۇيىندەدى زاڭگەر. 

ابزال قۇسپان ءوزى دە "ەير-استانا" اۋە كومپانياسىنىڭ پرەزيدەنتى پيتەر فوستەرگە شاعىم تۇسىرگەن. وندا اتالعان كومپانيا ۇشاعىمەن ۇشقاندا قازاق تىلىندە قىزمەت كورسەتىلمەگەندىگىن جازىپ، شاعىمدانعان. 

ايتا كەتەيىك، وسىدان ەكى كۇن بۇرىن "ەير-استانا" كومپانياسى ۇشاعىمەن ۇشقان تۇركيالىق جۋرناليست وعىز دوعان جولسەرىكتەن قازاق تىلىندە قىزمەت كورسەتۋىن تالاپ ەتكەن. الايدا تالابى ورىندالمادى.