ادامنىڭ ساۋلىعى - قوعامنىڭ بايلىعى. وسى ورايدا ەلىمىزدە دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان مەملەكەتتىك «دەنساۋلىق» باعدارلاماسى ەنگىزىلگەن بولاتىن.
«دەنساۋلىق» باعدارلاماسى - دەنساۋلىق ساقتاۋ سالاسىنا ەنگىزىلگەن «سالاماتتى قازاقستان» مەملەكەتتىك باعدارلاماسىنىڭ زاڭدى جالعاسى ىسپەتتەس. ادامنىڭ ءومىر ءسۇرۋ ۇزاقتىعىن ارتتىرۋدى ماقسات تۇتقان .بۇل باعدارلامانىڭ ناتيجەسىن ءوڭىر تۇرعىندارى دا كورىپ وتىر. وبلىستىق دەنساۋلىق ساقتاۋ باسقارما باسشىسىنىڭ ورىنباسارى نۇردانات بەركىنعاليدىڭ مالىمەتىنشە، 2017 جىلدىڭ جەتى ايىندا انا ءولىمى تىركەلمەگەن. جالپى ءولىم-جىتىم 6،5 %-عا، نارەستە ءولىمى 6،3%–عا، قان اينالىم جۇيەسى اۋرۋلارىنان ءولىم-جىتىم 6،2%-عا، تۋبەركۋلەزبەن سىرقاتتانۋشىلىق 4،2 %-عا، تۋبەركۋلەزدەن ءولىم-جىتىم 12،5%-عا تومەندەگەن. دەنساۋلىق ساقتاۋ سالاسىنىڭ بيىلعى وبلىستىق بيۋدجەتى 15 594 379،0 مىڭ تەڭگەنى قۇراپ وتىر. مەديسينا ۇيىمدارىن ماتەريالدىق-تەحنيكالىق جاراقتاندىرۋعا 1،6 ملرد. تەڭگە سومادا قاراجات (76 بىرلىك مەديسينالىق تەحنيكا، 10 سانيتارلىق اۋتوكولىك، اۋداندىق مەديسينا ۇيىمدارى ءۇشىن 636 بىرلىك كومپيۋتەرلىك تەحنيكا ت.ب) قاراستىرىلعان. سونداي-اق ادام ءومىرى مەن دەنساۋلىعىنا ءقاۋىپ تونگەندە ءومىرىن ساقتاپ قالۋ ءۇشىن قالالىق جەدەل جاردەم ستانسياسىندا 94، سانيتارلىق اۆياسيادا جەتى اۋتوكولىك پەن ءبىر بىرلىك «ان-2» سانيتارلىق ۇشاعى قىزمەت كورسەتۋدە. بريگادالار ديسپەچەرلىك قىزمەتپەن جانە ستاسيونارلاردىڭ قابىلداۋ بولىمدەرىمەن سكايپ جانە IP-تەلەفونيا ارقىلى بايلانىس ورناتۋعا ارنالعان پلانشەتتەرمەن جابدىقتالعان. جەدەل مەديسينالىق جاردەم بريگاداسى تاۋلىگىنە 24 ساعات بويى قىزمەت ەتەدى. ورتاشا ەسەپپەن جەدەل جاردەم قىزمەتىنە تاۋلىگىنە شامامەن 500 شاقىرتۋ تۇسەدى ەكەن. سونىڭ ىشىندە 36%-ى، ياعني 180ء-ى بالالارعا شاقىرتۋلار. بارلىق جەدەل جاردەم شاقىرتۋلارىنىڭ 20%-ى قالالىق ەمحانالار جانىنداعى جەدەل كومەكتىڭ دەڭگەيىندە اتقارىلىپ، جەدەل شاقىرتۋلار تۇگەل قامتىلادى. وبلىستا تراۆماتولوگيا، كارديولوگيا، كارديوحيرۋرگيا، وفتالمولوگيا، نەيروحيرۋرگيا، ونكولوگيا، گينەكولوگيا بويىنشا جوعارى تەحنولوگيالىق مەديسينالىق قىزمەتتەردىڭ 65-تەن استام ءتۇرى كورسەتىلۋدە.
گۇلىم اقاپ،
باتىس قازاقستان وبلىسى
پىكىر قالدىرۋ