ەلىمىزدە بالا دۇنيەگە كەلگەننەن باستاپ، 16 جاسقا دەيىن 10 ءتۇرلى اۋرۋعا قارسى 20-دان استام ەكپە الادى. ارينە بۇل ەكپەلەردىڭ كوبىسى ەرىكتى، الايدا ءبىرقاتارى مىندەتتى بولىپ كەلەدى.

 ۆاكسينالىق ەكپە ەگۋگە بايلانىستى قازىرگى قوعامدا ءتۇرلى پىكىرلەر ايتىلۋدا. جالپى ۆاكسينا – بەلگىلى ءبىر ينفەكسيانى جويۋعا باعىتتالعان ميكرواعزالاردان جاسالاتىن پرەپارات. ەلىمىزدەگى وندىرىستە ۆاكسينانى جاساعان كەزدە قاتاڭ باقىلاۋعا الىپ، زياندى ينفەكسيالاردان قورعايتىن قاسيەتىن ساقتاپ، ارتىق جانە زياندى دارىلەردەن تولىقتاي تازارتىلادى. ودان كەيىن پرەپاراتتىڭ قاۋىپسىزدىگى زەرتحانالىق جانە كلينيكالىق تەكسەرۋلەردەن وتەدى. نەگىزىندە، ۆاكسينا ۆيرۋستى اۋرۋلاردىڭ الدىن الادى. وبلىستىق دەنساۋلىق ساقتاۋ ماماندارىنىڭ ايتۋىنشا، ەكپە اۋرۋدى مۇلدەم بولدىرمايدى دەگەن قاتە تۇسىنىك ەكەن. ۆاكسينا – اۋرۋدىڭ جەڭىل ءوتۋىن عانا قامتاماسىز ەتەدى جانە كەسەلدى اسقىندىرمايدى. سونداي-اق وبلىستا ەكپەگە قارسى وتباسىلار سانى دا كوبەيگەن. وبلىستىق دەنساۋلىق ساقتاۋ باسقارما باسشىسىنىڭ ورىنباسارى نۇردانات بەركىنعاليدىڭ مالىمەتىنشە، وڭىردە ەكپە ەگۋدەن  922  وتباسى باس تارتقان. سوندىقتان سالا ماماندارى  ەكپە ەكتىرمەگەن  اتا-انالارمەن كەزدەسۋلەر ۇيىمداستىرىپ، مونيتورينگ جۇرگىزگەن. ناتيجەسىندە  اتا-انالاردىڭ باس تارتۋىنا 88،7 % ءدىني سەنىم اسەر ەتسە، 11،3 %-ى ۆاكسيناعا سەنىمسىزدىك تانىتقان. ءدىني باسىلىمدارعا كوز تاستاساق،  قۇران كارىم مەن پايعامبار سۇننەتىندە اۋرۋدىڭ الدىن الۋعا قارسىلىق كەلتىرىلمەگەن. حاديستە مۇحاممەد پايعامبار (س.ع.س): «كىمدە-كىم ەرتە تۇرىپ، قۇرما جەيتىن بولسا، سول ادام اۋرۋدىڭ الدىن الادى»، – دەگەن ەكەن. بۇل جەردەن يسلام دىنىندە اۋرۋدىڭ الدىن الۋعا ماڭىز بەرىلگەنىن كورۋگە بولادى. دەنساۋلىققا كوڭىل ءبولىپ، سالاۋاتتى ءومىر ءسۇرۋدى ناسيحاتتايدى. بۇدان باسقا، جىل سايىن قاجىلىق كەزىندە ساۋد ارابياسىنا بارعاندارعا اۋرۋ جۇقتىرىپ، سىرقاتتانباۋى ءۇشىن اۋەجايدا ۆاكسينامەن ەكپە جاسالاتىنىن ايتۋعا بولادى. ياعني، ناعىز مۇسىلمان ەلى دەپ ەسەپتەلەتىن ساۋد ارابياسىنىڭ وزىندە ۆاكسينا جۇرگىزىلەدى. سوندىقتان، ەكپەنى قابىلداپ، اۋرۋدىڭ الدىن الۋ دا يسلام دىنىنە ساي نارسە ەكەنى انىق.

سونىمەن قوسا ەلىمىزدە ق ر دەنساۋلىق ساقتاۋ جانە الەۋمەتتىك دامۋ ءمينيسترىنىڭ «حالىقتىڭ نىسانالى توپتارىن پروفيلاكتيكالىق مەديسينالىق تەكسەرىپ-قاراۋدى جۇرگىزۋ ەرەجەسىن بەكىتۋ تۋرالى»  بۇيرىعىنا  سايكەس 0-18 جاستاعى بالالارعا پروفيلاكتيكالىق  تەكسەرۋلەر جۇرگىزىلۋدە. بيىلعى جىلدىڭ جەتى ايى بويىنشا وبلىستا 0-17 جاس ارالىعىنداعى 137 616 بالا پروفيلاكتيكالىق تەكسەرۋدەن وتسە، 16،7% بالانىڭ اۋرۋى  ەرتە انىقتالىپ، 11،7 %-ى ديسپانسەرلىك ەسەپكە الىنىپ، 72،3%-ى  ساۋىقتىرۋ ەمىن  قابىلداعان.  

گۇلىم اقاپ،

باتىس قازاقستان وبلىسى