قازاقستان رەسپۋبليكاسى اۋىل شارۋاشىلىعى مينيسترلىگىنىڭ باسپا ءسوز ورتالىعىندا اۋىل شارۋاشىلىعى ۆيسە-مينيسترى ە.نىسانبايەۆتىڭ قاتىسۋىمەن ورمان شارۋاشىلىعى جانە جانۋارلار دۇنيەسى كوميتەتىنىڭ اۋماقتىق بولىمشەلەرى مەن ۆەدومستۆولىق باعىنىستاعى ۇيىمدارىنىڭ قىزمەتىنە ىشكى باقىلاۋ جاساۋ جونىندەگى جەدەل توپتىڭ جۇمىسى تۋرالى بريفينگ ءوتتى دەپ حابارلايدى Qamshy.kz اقپارات اگەنتتىگى.

جەدەل توپتىڭ نەگىزگى مىندەتتەرى ورمان شارۋاشىلىعى جانە ەرەكشە قورعالاتىن تابيعي اۋماقتاردى قورعاۋ، مولىقتىرۋ جانە پايدالانۋ سالاسىنداعى مەملەكەتتىك باقىلاۋ مەن قاداعالاۋدى ۇيىمداستىرۋ جانە جۇزەگە اسىرۋ جونىندەگى قىزمەتىنە ىشكى باقىلاۋ جاساۋ، سونداي-اق قاجەت بولعان جاعدايدا ولاردىڭ لاۋازىمدى تۇلعالارى تاراپىنان وسى سالالاردا جاسالعان قۇقىق بۇزۋشىلىقتاردى انىقتاۋ بولىپ تابىلادى.

بريفينگ بارىسىندا ە. نىسانبايەۆ جەدەل توپتىڭ قۇرامى قازاقستان رەسپۋبليكاسى پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى ا. مىرزاحمەتوۆپەن قۇرىلعانىن ءارى بەكىتىلگەنىن اتاپ ءوتتى.

جەدەل توپ 12 ادامنان تۇرادى. 4 جوعارعى وتكىشتى اۆتوكولىكپەن، زاماناۋي بايلانىسپەن، سەرىكتىك بايلانىستى قوسا العاندا، نىساندى كيىممەن جانە تابەلدىك قارۋمەن جابدىقتالعان.

سونىمەن قاتار، لاۋازىمدى تۇلعالارىنىڭ تاراپىنان جاسالعان سىبايلاس جەمقورلىق قۇقىق بۇزۋشىلىقتارىن انىقتاۋ جانە الدىن الۋ؛ جانۋارلار دۇنيەسىن قورعاۋ، ءوسىمىن مولايتۋ جانە پايدالانۋ، ورمان شارۋاشىلىعى جانە ەرەكشە قورعالاتىن تابيعي اۋماقتار سالاسىندا جاسالعان قۇقىق بۇزۋشىلىقتاردى، جەدەل توپ اۋىل شارۋاشىلىعى مينيسترىنە راستايتىن ماتەريالداردى قوسا تىركەپ، ۇسىناتىن بولادى.

«2017 جىلدىڭ ماۋسىم ايىنان باستاپ بۇگىنگى كۇنگە دەيىن جەدەل توپتىڭ اتقارعان جۇمىسىنىڭ ناتيجەسى بويىنشا تابيعاتتى قورعاۋ زاڭناماسىن بۇزعان 18 فاكت تىركەلدى. انىقتالعان فاكت بويىنشا 3 قىلمىستىق ءىس جانە 15 اكىمشىلىك قۇقىقبۇزۋشىلىق ءىس قوزعالدى»، – دەپ اتاپ ءوتتى ە. نىسانبايەۆ.

بۇدان بولەك، ق ر اشم ورمان شارۋاشىلىعى جانە جانۋارلار دۇنيەسى كوميتەتىنىڭ لاۋازىمدى تۇلعالارىنا، اۋماقتىق بولىمشەلەرى مەن ۆەدومستۆولىق باعىنىستاعى ۇيىمدارىنىڭ قىزمەتكەرلەرىنە ءتارتىپ جازالار قولدانىلدى.

وسى قابىلدانىپ جاتقان شارالاردىڭ بارلىعى مينيسترلىك تاراپىنان تابيعاتتى قورعاۋ زاڭناماسىنداعى قۇقىق بۇزۋشىلىقتاردىڭ تومەندەۋىنە باعىتتالعان.