سولتۇستىك كورەيادان قاشىپ كەلگەن اسكەري قىزمەتكەر ارمياداعى ايەلدەردىڭ اۋىر تاعدىرى تۋرالى BBC جۋرناليسىنە ايتىپ بەردى. ونىڭ ايتۋىنشا، زورلاۋ، ۇرۋ جانە تويىپ تاماق ىشپەگەندىكتەن ايەلدەردىڭ ەتەككىرلەرى توقتاپ قالادى ەكەن.

لي سو ءون 10 جىل بويى 20 شاقتى ايەلمەن ءبىر بولمەدە تۇرىپ كەلگەن. ءارقايسىسىنىڭ فورما قوياتىن تۋمبوچكاسى بولدى. ونىڭ ۇستىنە كيم ير سەن مەن ونىڭ مۇراگەرى كيم چەن ءيردىڭ فوتوسىن قوياتىن.  

ۋنيۆەرسيتەت وقىتۋشىسىنىڭ قىزى سو ءون ەلدىڭ سولتۇستىك بولىگىندە وسكەن. ونىڭ وتباسىنداعى ەر ادامداردىڭ كوبى اسكەري قىزمەتتە بولعان. 1990-شى جىلدارى كحدر-دا اشتىق باستالعاندا ول ارميادا تۇسكى استى تەگىن بەرەتىنىن ەستىپ،  ەرىكتى تۇردە ارمياعا بارعان.

باستاپقى كەزدە 17 جاستاعى لي سو ءونعا ارمياداعى ءومىر ۇنادى. ايەلدەر مەن ەركەكتەردىڭ كۇن ءتارتىبى بىردەي بولدى. ايەلدەرگە فيزيكالىق كۇشتى قاجەت ەتەتىن جۇمىستاردىڭ بارلىعىن ىستەتپەيتىن، ءبىراق تاماق جاساۋ، تازالىق جۇمىستارىن ايەلدەردىڭ موينىندا بولدى.  

اۋىر جاتتىعۋ مەن تاماقتى شەكتەۋ لي سو ءوننىڭ جانە باسقا دا قىزداردىڭ دەنساۋلىعىنا كەرى اسەر ەتتى.

«اسكەري قىزمەتتە جۇرگەن 6 اي نەمەسە 1 جىلدان كەيىن تويىپ تاماق جەمەگەندىكتەن جانە سترەسستەن ەتەككىرىمىز توقتايتىن. ايەلدەر وعان قۋاناتىن. سەبەبى جاعدايدىڭ اۋىر بولعانى سونشالىق ەتەككىر كەلسە ول ودان بەتەر ۋشىعا تۇسەتىن» دەيدى ول.

لي سو ءوننىڭ ايتۋىنشا، ارمياداعى قىزمەت كەزىندە ايەلدەرگە جەكە باس گيگيەناسىنا قاجەتتى زاتتار بەرىلمەگەندىكتەن ءبىر رەتكى زاتتى بىرنەشە مارتە قولدانۋعا تۋرا كەلەتىن.

2015 جىلى «18 جاسقا تولعان بارلىق قىزدار 7 جىل اسكەري قىزمەتتە بولۋ كەرەك» دەگەن زاڭ شىقتى.

لي سو ءون 1992-2001 جىلدار ارالىعىندا قىزمەتتە بولدى. وسى ۋاقىت ارالىعىندا تالاي قىزدىڭ زورلانعانىن كورگەن.  

«روتا كومانديرى كەشكى ۋاقىتتا كابينەتىندە قول استىنداعى سولدات قىزداردى زورلايتىن. مۇنداي جاعداي ءجيى-جيى قايتالاناتىن» دەيدى ول.

كحدر ارمياسىنىڭ وكىلى اتالمىش ماسەلەنى شەشۋ ءۇشىن قىزۋ جۇمىس ىستەپ جاتقاندارىن جانە ايەلدەرگە زورلىق كورسەتكەندەر 7 جىلعا تۇرمەگە وتىراتىنىن ايتادى. سولتۇستىك كورەيانى زەرتتەۋشى دجۋلەتت موريلونىڭ مالىمەتىنشە، كوبى قورىققاننان كۋاگەر رەتىندە كورگەنىن ايتۋعا قورقادى، سوندىقتان زورلىقشىلار كوبىنە  جازادان جالتارىپ كەتەدى.

لي سو ءون 28 جاسىندا قىزمەتتەن كەتتى. 2008 جىلى ول وڭتۇستىك كورەياعا قاشپاق بولعان، ءبىراق شەكارادا ونى ۇستاپ الىپ، 1 جىلعا تۇرمەگە وتىرعىزدى. تۇرمەدەن شىققاننان كەيىن ول قايتا قاشۋعا ارەكەت جاسادى. تۋمانگان وزەنى ارقىلى قىتايعا بارىپ، ول جەردەن وڭتۇستىك كورەياعا قاشقان.