رەسەيلىك مەتاللۋرگتەر قازاقستاندىق ونىمدەردى رەسەي نارىعىنا جەڭىلدىكپەن جەتكىزۋ ەسەبىنەن 25،2 ملرد رۋبل جوعالتقان. بۇل تۋرالى ريا نوۆوستي نارىقتاعى دەرەككوزگە سىلتەمە بەرىپ حابارلادى.

«25،2 ملرد رۋبل – سۋبسيديالانعان جەتكىزىلىمدەردىڭ ءوسۋى نەگىزىندە رەسەيلىك نارىقتاعى باعانىڭ كۇرت تومەندەۋىنە بايلانىستى مەتاللۋرگتەردىڭ تىكەلەي شىعىنى. بۇل جوعالعان تابىس، تيىسىنشە بەس ملرد دوللار – رەسەي بيۋدجەتىندەگى جەتىسپەيتىن سالىقتىڭ ەسەبى»، - دەلىنگەن اگەنتتىكتىڭ حابارلاماسىندا.

رەسەي نارىعىنداعى ەڭ ءىرى بولات ءوندىرۋشى «رۋسسكايا ستال» كاسىپورىنى رەسەيدىڭ يندۋستريا جانە ساۋدا مينيسترلىگىنە جۇگىندى. مەتاللۋرگتەر مينيسترلىكتەن رەسەيلىك نارىقتاعى قازاقستاندىق جەتكىزىلىمدەرگە ەاەو ستاندارتتارىنا سايكەس اناليز جاساۋدى سۇرادى.

رەسەيلىك كومپانيالاردىڭ ويىنشا، قازاقستاندىق مەتاللۋرگتەرگە بەرىلگەن سۋبسيديالار ەاەو نورمالارىنا سايكەس كەلمەيدى. تەرگەۋ نىسانى تەگىس سۋىق پروكات، يلەنگەن ىستىق جانە بەتى جابىق تەگىس پروكات بولدى، دەپ جازدى ريا نوۆوستي.