ق ر دەنساۋلىق ساقتاۋ ءمينيسترى ەلجان ءبىرتانوۆ سولتۇستىك قازاقستان وبلىسىنىڭ مەديسينا قىزمەتكەرلەرىمەن كەزدەستى، دەپ حابارلايدى Qamshy.kz اقپارات اگەنتتىگى قازاقپارات مالىمەتىنە سۇيەنىپ.

مينيستر مىندەتتى مەديسينالىق ساقتاندىرۋ سالاسىنداعى باستى ماسەلە ساقتاندىرىلماعان ازاماتتاردىڭ كوپتىگىندە (2،7 ملن ادام) ەكەنىن ايتتى.

«بۇل، ەڭ الدىمەن، مەديسينا قىزمەتكەرلەرى ءۇشىن قيىندىق تۋىنداتادى. ەرتەڭ ولار كەلىپ، مەديسينالىق كومەك تولىق كولەمدە كورسەتىلمەيتىنىن بىلەدى. سوندىقتان دا ولاردى بارىنشا قامتۋدى ويلاستىرۋ ۇستىندەمىز»، - دەدى ە. ءبىرتانوۆ.

دەنساۋلىق ساقتاۋ ءمينيسترى ديسپانسەرلىك ەسەپتە تۇرعان سىرقاتتار ءتىزىمىن قىسقارتۋ جايلى تۋرالى دا ايتتى. ءقازىر ول تىزىمدە 263 اۋرۋ بار.

«2 مىڭ ناۋقاسقا قارايتىن ۋچاسكەلىك دارىگەر 263 اۋرۋدىڭ بارلىعىن باقىلاپ وتىرۋى مۇمكىن ەمەس. ونى 30-عا دەيىن قىسقارتۋ جونىندەگى بۇيرىق دايىنداپ جاتىرمىز. رەسەيدە ول تىزىمگە 36-38 اۋرۋ كىرگىزىلگەن، كەيبىر ەلدەردە ءتىپتى 10 اۋرۋ بار. ءبىراق بۇدان باسقالار باقىلاۋدا بولمايدى دەگەن ۇعىم تۋمايدى. مۇندا ناۋقاستىڭ ءوزى دە جاۋاپتى بولۋى قاجەت. ۋاقتىلى تەكسەرۋگە كەلمەيتىن بولسا، ونىڭ سالدارى ءۇشىن، تولەم بولىگى بويىنشا، وعان دا جاۋاپكەرشىلىك جۇكتەلەدى»، - دەيدى ە. ءبىرتانوۆ.

مەديسينا مەكەمەلەرىن سيفرلاندىرۋ جايىنا توقتالا كەلە، مينيستر بيىل قاعازسىز قۇجات اينالىمىن تولىقتاي ەنگىزۋ جوسپارلانىپ جاتقانىن ايتتى. مينيسترلىك وكىلدەرى بۇل دارىگەرلەردىڭ جۇمىسىن جەڭىلدەتەتىنىنە سەنىمدى بولىپ وتىر. ە. ءبىرتانوۆ كادرلار جانە جالاقى سالاداعى باستى ماسەلەلەردىڭ ءبىرى ەكەندىگىن تىلگە تيەك ەتتى.

«مەملەكەتتە دەنساۋلىق ساقتاۋ سالاسىنا قۇيىلىپ جاتقان قارجىنى 20-30%-عا ارتتىرۋ مۇمكىندىگى جوق. ءبىز ىشكى رەزەرۆتەردى قاراستىرۋىمىز قاجەت. تۇراقتى (ستاسيونارلىق) مامانداندىرىلعان مەديسينالىق كومەككە قارجىنىڭ 60%-ى كەتەدى. ءبىز اقشانىڭ كوپ بولىگىن اۋرۋلاردىڭ الدىن الۋعا ەمەس، سالدارىمەن كۇرەسۋگە جۇمساپ جاتىرمىز. جاڭا نورماتيۆ بويىنشا ستاسيونارلاردىڭ سانىن ەكى ەسەگە قىسقارتامىز»، - دەدى ول.

سونىمەن قاتار قىسقارتۋ اۋداندىق اۋرۋحانالارعا قاتىسى جوق ەكەنىنە سەندىرىپ وتىر. اۋرۋحانالاردىڭ تيىمدىلىگىن ارتتىرۋ جونىندە مينيستر 10 ۇساق اۋرۋحانا سالۋدىڭ ورنىنا ۇنەمدى رەجيمدە جۇمىس ىستەيتىن 5-6 ءىرى اۋرۋحانا سالعان ءجون، اۋرۋحانالاردى ماتەريالدىق-تەحنيكالىق جابدىقتاۋدىڭ دا ايتارلىقتاي قيىندىقتارى بار ەكەندىگىن ايتتى.

ە. ءبىرتانوۆ دارىگەرلەردىڭ جالاقىسىن ۇيىمداردىڭ ءوز رەزەرۆتەرىنىڭ ەسەبىنەن ارتتىرۋعا كەڭەس بەردى. كوپتەگەن اۋرۋحانالار شارۋاشىلىعى ەسەبىنەن جۇمىس ىستەيدى، ولار لاۋازىمدىق ەڭبەكاقىلار مەن سىياقىلار جۇيەسىن وزدەرى بەلگىلەيدى. ونداي اۋرۋحانالاردا جالاقى بيۋدجەتتىك اۋرۋحانالارعا قاراعاندا 20%-عا جوعارى.

ونىڭ ايتۋىنشا، اكىمشىلىك شىعىنداردى، سونىڭ ىشىندە باس دارىگەردىڭ ورىنباسارلارى سانىن دا قايتا قاراۋ قاجەت. ال شاعىن اۋرۋحانادا باس دارىگەردىڭ ورىنباسارى بىرەۋ بولسا دا جەتكىلىكتى.