«ءبىرىڭعاي جيناقتاۋشى زەينەتاقى قورى» اق اكتيۆتەرىنىڭ 15 پايىزعا جۋىعى قازاقستاندىق بانكتەرگە ينۆەستيسيا رەتىندە جۇمىلدىرىلعان. ءساۋىر ايىنىڭ باسىنداعى ينۆەستيسيالىق پورتفەل تۋرالى بجزق-دا ايتىپ بەردى، دەپ حابارلايدى Qamshy.kz اقپارات اگەنتتىگى بجزق باسپا ءسوز قىزمەتىنە سىلتەمە جاساپ

بجزق باسپا ءسوز قىزمەتىنىڭ حابارلاۋىنشا، پورتفەلدەگى نەگىزگى ۇلەستى - ياعني، 44،89 پايىزدى قازاقستان رەسپۋبليكاسىنىڭ مەملەكەتتىك قۇندى قاعازدارى قۇرايدى. ەسەپ بەرىپ وتىرعان ايدا ولاردىڭ اعىمداعى قۇنى 112،03 ملرد تەڭگەگە ءوسىپ، 3 580،47 ملرد تەڭگەنى قۇراعان. ينۆەستيسيالانعان زەينەتاقى اكتيۆتەرىنىڭ مولشەرى بويىنشا ەكىنشى ورىندا «قازاقستان رەسپۋبليكاسىنىڭ ەكىنشى دەڭگەيلى بانكتەرىنىڭ وبليگاسيالارى» تۇر.

ولاردىڭ پورتفەلدەگى ۇلەسى 15،41 پايىزدىق كورسەتكىشتە. بۇل وبليگاسيالاردىڭ اعىمداعى قۇنى 1 229،20 ملرد تەڭگەنى قۇراعان. مولشەر بويىنشا ءۇشىنشى ورىندا - «شەتەل مەملەكەتتەرىنىڭ مەملەكەتتىك قۇندى قاعازدارى» قارجى تەتىكتەرى تۇر. ەسەپ بەرىپ وتىرعان ايدا ولاردىڭ اعىمداعى قۇنى 19،15 ملرد تەڭگەگە ءوسىپ، 1 105،56 ملرد تەڭگەگە، ال پورتفەلدەگى ۇلەسى 13،86 پايىزعا جەتكەن.

بجزق زەينەتاقى اكتيۆتەرىنىڭ ەسەبىنەن الىنعان وسى جانە وزگە دە قارجى ينستيۋتتارىنىڭ تەتىكتەرى تەڭگەمەن (69،42%)، اقش دوللارىمەن (30،03%) جانە رەسەيلىك رۋبلمەن (0،45%) ساقتالعان. ينۆەستيسيالىق پورتفەلدىڭ تولىق قۇرىلىمى بجزق-نىڭ رەسمي سايتىندا بەرىلگەن.

«2018 جىلدىڭ 1 ساۋىرىندەگى جاعداي بويىنشا زەينەتاقى اكتيۆتەرىنىڭ 73،26 پايىزى مينيمالدى تاۋەكەل دەڭگەيىمەن قارجى تەتىكتەرىنە سالىنعان»، - دەلىنگەن باسپا ءسوز قىزمەتىنىڭ حابارلاماسىندا.

ەسكە سالا كەتەيىك، ق ر ۇلتتىق بانكىنىڭ سەنىمدى باسقارۋىنداعى بجزق زەينەتاقى اكتيۆتەرى 2018 جىلدىڭ 1 ساۋىرىندەگى جاعداي بويىنشا 7،97 ترلن تەڭگەنى قۇراعان.

2018 جىلدىڭ العاشقى ءۇش ايى بويىنشا ينۆەستيسيالىق كىرىستىڭ مولشەرى 66 ملرد تەڭگەگە جەتكەن. ۇلەسكەرلەردىڭ ەسەبىنە اۋدارىلعان بجزق زەينەتاقى اكتيۆتەرىنىڭ تۇسىمدىلىگى جىلدىق مازمۇندا (2017 جىلدىڭ ناۋرىزى مەن 2018 جىلدىڭ ناۋرىزى) 8 پايىزدى قۇرايدى.