قازاقستان ءتۋريزمىن دامىتۋعا الماتى وبلىسى بەلسەندى قاتىسادى. تۇمسا تابيعاتى تالايدىڭ كوز جانارىن جاۋراعان ايماق پەن تاۋلى دەمالىس ورىندارىنا ينۆەستيسيا قۇيىلىپ، ارقانجولدار تارتىلادى. ماجىلىستەگى ۇكىمەت ساعاتىندا وزگە ەلدىڭ ازاماتتارىن ەلىمىزگە قالاي تارتىپ، قىزىقتىرۋ كەرەك ەكەنى ءسوز بولدى. دەپۋتاتتار ول ءۇشىن اۋە كەمەسىنە بيلەت قۇنىن ارزانداتىپ، تاريحي ورىنداردى قالىپقا كەلتىرۋدى ۇسىندى.

مادەنيەت جانە سپورت ءمينيسترى ارىستانبەك مۇحامەدي ۇلى الداعى 6 جىلدا ەل ءتۋريزمىن مىقتاپ قولعا الماق. بۇگىندە جالپى ىشكى ءونىمىنىڭ 1،3 پايىزىن قۇرايتىن ءتۋريزمنىڭ ۇلەسى 2023 جىلى سەگىز پايىزعا جەتەدى. ول ءۇشىن مينيستر ون جوبا اتاپ ءوتتى. قۇجاتقا بالقاش، الاكول كولدەرى، شارىن شاتقالى، ەجەلگى تۇركىستان ايماعى، ماڭعىستاۋداعى اششىسور، كۋرورتتىق مەكەندەر – يمانتاۋ-شالقار مەن باياناۋىل، استانا ماڭىنداعى كوشپەندىلەر ورتالىعى ەنگەن. ولاردىڭ اراسىندا ەڭ باستى ەكپىن الماتى وبلىسىندا سالىناتىن تاۋ شاڭعىسى كلاستەرىنە ءتۇسىپ وتىر. ونىڭ اياسىندا تاۋلى كۋرورتتار – اقبۇلاق پەن شىمبۇلاقتى، قاسكەلەڭ مەن تۇرگەندى بايلانىستىراتىن ارقانجول تارتىلماق. بۇل باستاما جىلىنا 13 ميلليون ءتۋريستى تارتۋعا ىقپال ەتپەك.

«الماتى ءوڭىرىن وتە جاقسى بىلەسىزدەر. اتالعان اۋماق تاۋ شاڭعىسى سالاسىن دامىتۋدىڭ ەڭ ءىرى ورتالىقتارىنىڭ ءبىرى بولا الادى. سەبەبى، قازىرگى كەزدە بىزدە شىمبۇلاق، تاباعاندا تاۋ شاڭعىسى كلاستەرى، سونداي-اق وزگە دە نىساندار بار. ەگەر ءبىز ءبىرىنشى كەزەڭدە ولاردى ءوزارا ارقانجولمەن بايلانىستىرساق، وندا تاۋ شاڭعىسى جەلىسىنىڭ ينفراقۇرىلىمى پايدا بولادى. ءسويتىپ، قىسقى دەمالىس تۇرلەرىنەن بولەك، جازعى كەزدە جاياۋ ءجۇرۋ، اتپەن جانە ۆەلوسيپەدپەن سەرۋەندەۋ باعىتتارىن دا دامىتا الامىز»، – دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.

ال شەت ەل ازاماتتارىن قازاقستانعا تارتۋ ءۇشىن جىل سايىن 800 ميلليارد دوللار ينۆەستيسيا تارتىلادى. بۇل ءىس بولاشاقتا دا جالعاسىن تاپپاق. الداعى ۋاقىتتا كاسىپكەرلەر تۋريزمگە ىڭعايلى 100 ورىنعا اقشا قۇيادى. ينۆەستيسيالىق پورتفەلى 4 ميلليارد 900 ميلليون تەڭگەدەن اسقان بيزنەس وكىلى كورپوراتيۆتىك تابىس سالىعىنان – 10، جەر سالىعىنان 8 جىلعا بوساتىلماق. قۇجاتتى تىڭداعان حالىق قالاۋىلارى مينيسترگە ءوز ۋاجدەرىن ايتتى.

«مىسالى، بەكەت اتا مەشىتىن الايىق. ادامدار بارادى، كوپتەپ بارادى، اكىم جول سالىپ بەردى. ءبار جاقسى. ءبىراق زيارات ەتۋشىلەر كورپەدە وتىرىپ، وزدەرىمەن اكەلگەندى اس ەتەدى. ول جەردە بىردە-بىر كادەسىي، تۋى بار دۇڭگىرشەكتەردى تاپپايسىز. قاراپايىم اجەتحانا دا جوق. ينفراقۇرىلىم جوق. بۇل جەردى بۇكىل الەم بىلەدى عوي»، – دەگەن ماسەلە كوتەردى ق ر پارلامەنتى ءماجىلىسىنىڭ دەپۋتاتى تۇرسىن سىزدىقوۆ.

«بۇل ورىندار يۋنەسكو-نىڭ مادەني قۇندىلىعىنا جاتپايدى. قازاقستاندا ونداي تەك ءۇش نىسان بار. ولار – قوجا احمەت ياسساۋي كەسەنەسى، قامقورلىق جانە ۇلى جىبەك جولىنىڭ ءۇشىنشى بولىگى. ارينە، بۇل وتە از. ءبىز مادەني نىسانداردى رەتكە كەلتىرۋ جۇمىستارىن رەسپۋبليكالىق تىزىمگە كىرەتىندەرىنە عانا جۇرگىزە الامىز»، – دەدى ارىستانبەك مۇحامەدي ۇلى.

دەپۋتات يرينا سميرنوۆا ىشكى ىستەر مينيسترلىگىنە توتەسىنەن سۇراق قويدى. ساۋالىندا، ءتارتىپ ساقشىلارىنىڭ ساياحاتشىلارمەن سويلەسۋ مادەنيەتى جوق ەكەنى ايتىلعان. ۆەدومستۆو وكىلدەرى بۇل جەكەلەگەن جاعدايدا عانا ورىن الادى دەپ قىسقا قايىردى. وسى رەتتە جاۋاپتىلار ەلىمىزگە ساياحاتتاپ كەلگەندەردىڭ قاۋىپسىزدىگىن قامتاماسىز ەتۋ ءۇشىن «تۋريستىك پوليسيا» قۇرماق. ولاردىڭ اتقاراتىن قىزمەتتەرى ءقازىر ناقتىلانىپ جاتىر. مادەنيەت جانە سپورت مينيسترلىگىمەن بىرگە قولعا العان بۇل شارا تۋريستەردىڭ ەلىمىزدە ءجۇرىپ-تۇرۋ قاعيدالارىنا دا اسەر ەتۋى مۇمكىن.

«ءبىز مادەنيەت جانە سپورت مينيسترلىگىمەن وسى سۇراق بويىنشا بىرگە جۇمىس ىستەپ جاتىرمىز. بىرنەشە سۇراقتى قامتىدىق. ولاردىڭ ءبىرى – تۋريستىك پوليسيا قىزمەتى. اتالمىش قىزمەت وكىلدەرى بەلگىلى مىندەتتەردى ورىندايتىن بولادى. ءقازىر شەتەلدىك تاجىريبەنى زەرتتەپ جاتىرمىز»، – دەدى ق ر ءىىم كوشى-قون قىزمەتى كوميتەتىنىڭ ءتوراعاسى مۇرات قابدەنوۆ.

جىل سوڭىنا دەيىن استانا مەن الماتى ارقىلى ۇشاتىن ءۇندىستان، جۇڭگو، يران سىندى 128 ەلدىڭ ازاماتتارىنا 72 ساعاتقا ۆيزاسىز رەجيم ەنگىزىلەدى. تۋريستەردى تارتۋدىڭ تاعى ءبىر تەتىگى – ۇشاق بيلەتتەرىنىڭ باعاسىن ارزانداتۋ. ينۆەستيسيالار جانە دامۋ ۆيسە-مينيسترى تيمۋر توقتابايەۆتىڭ ايتۋىنشا، ۆەدومستۆو بۇگىنگە دەيىن بالالارعا، زەينەتكەرلەرگە، مۇمكىندىگى شەكتەۋلى جاندارعا، جاستارعا ارنالعان جەڭىلدىكتەر ەنگىزگەن. بيلەت قۇنىن ودان دا تومەندەتۋ بىرنەشە ينديكاتورلارعا بايلانىستى. ونىڭ ءبىرى – اۆياوتىن باعاسى.