ديماش قۇدايبەرگەننىڭ كرەمل ساحناسىنداعى ەكىنشى جەكە كونسەرتى دە انشلاگپەن ءوتتى، دەپ حابارلايدى Qamshy.kz اقپارات اگەنتتىگى ♦Sputnik قازاقستان سايتىنا سىلتەمە جاساپ.
ديماشتىڭ ماسكەۋدەگى ءبىرىنشى كونسەرتى قالاي دۇركىرەپ وتسە، ەكىنشىسى دە جوعارى دەڭگەيدە بولدى. رەسەيدىڭ باس ساحناسى – كرەملدىڭ التى مىڭ ورىندىق ۇلكەن زالى كورەرمەندەرگە لىق تولدى. ديماشتىڭ 56 ەلدەن كەلگەن فاناتتارىنان بولەك، رەسەيدىڭ تۇكپىر-تۇكپىرىنەن ونەرسۇيەر قاۋىم كوپتىڭ اۋزىندا جۇرگەن قازاق ءانشىسىن تىڭداۋعا كەلگەن.
كونسەرت ءۇزىلىسسىز ەكى جارىم ساعاتقا سوزىلدى. ديماش كەش بارىسىندا قازاق، ورىس، اعىلشىن، جۇڭگو، فرانسۋز تىلدەرىندە ءان شىرقادى. ءتىپتى "Screaming" انىمەن كونسەرتتى باستاعان كەزدە قازاقشا رەپ ورىنداپ، جۇرتتى تاڭعالدىردى. "ناعىز قازاق قازاق ەمەس، ناعىز قازاق - دومبىرا" دەگەن ءسوزدى ءجيى ايتىپ جۇرەتىن ءانشى دومبىرانى كۇمبىرلەتىپ، كورەرمەننىڭ ەرەكشە ىقىلاسىنا بولەنگەنى تاعى راس.
"مەن ءوزىمنىڭ قازاق ەكەنىمدى ماقتان تۇتامىن!"، - دەدى ديماش ۇلكەن ساحنادان.
سونداي-اق ءانشى باۋىرلاس ورىس حالقىنا ءىلتيپاتىن جەتكىزە وتىرىپ، "ەكى حالىقتىڭ دوستىعى ماڭگىگە جالعاسادى دەگەن ۇمىتتەمىن" دەدى.
كورەرمەندەر ديماش پەن تانىمال كومپوزيتور يگور كرۋتوي ەكەۋىنىڭ ونەرىن اسىعا كۇتتى. بەكەر ەمەس، ولار ۇسىنعان جاڭا اندەر جۇرەككە جەتكەنى انىق. ال "ليۋبوۆ ۋستاۆشيح لەبەدەي" ءانىن بۇكىل زالدىڭ قوسىلا شىرقاعانى ايرىقشا اسەرلى بولدى.
"ديماشتىڭ كرەمل سارايىندا ونەر كورسەتۋى شىن مانىندە ۇلكەن وقيعا. الدا كوپ كونسەرت، باعدارلاما بار، ءبىراق بۇل كونسەرت ونىڭ ومىرىندە، كورەرمەندەردىڭ ومىرىندە ءبىرىنشى بولىپ قالادى. وتە تالانتتى ءانشى ديماشقا ءان جازۋ مەن ءۇشىن ۇلكەن قۇرمەت. ونىڭ جاڭا باعدارلامالارىن، جاڭا اندەرىن بۇكىل الەم كۇتەتىنىنە مەن سەنىمدىمىن"، - دەدى يگور كرۋتوي.
كونسەرت سوڭىندا ديماش ساحنادان ءتۇسىپ، كورەرمەندەردىڭ اراسىنا باردى. بۇكىل زال ورىندارىنان تىك تۇرىپ، ەرەكشە داۋىس يەسىنەن ىستىق ىقىلاس، قۇرمەت پەن قوشەمەتىن، قۇشاق-قۇشاق گۇلىن ايامادى.
ديماش قۇدايبەرگەننىڭ ەكىنشى كونسەرتىنەن جۇرت "كەرەمەت! 2،5 ساعات بويى جالعىز ءوزى جاندى داۋىسپەن ايتىپ شىقتى"، "جانكۇيەرلەرى جان-جاقتان "ديماش" دەپ ايعايلاپ جاتقان كەزدە، ءوزىمنىڭ ولارعا قالاي قوسىلىپ كەتكەنىمدى بىلمەي قالدىم"، "كورەرمەندەردىڭ ىقىلاسى كەرەمەت بولدى. مۇندايدى ءبىزدىڭ انشىلەردىڭ ەشقايسىسىنىڭ كونسەرتىنەن كورگەن جوقپىن"، "ماسكەۋدى مويىنداتتى" دەگەن سوزدەرمەن تارقاستى.
ۇسىنعان: ماقپال سەمباي
