ربك انىقتاعان شىعارمالارى ەڭ كوپ ساتىلعان نوبەل سىيلىعىن يەلەنگەن تاعى ءبىر جازۋشى – دجون ستەينبەك. ول 1962 جىلى ادەبيەت سالاسىنداعى نوبەل سىيلىعىن يەلەندى. شۆەد اكادەمياسى بۇل سىيلىقتى وعان «جەڭىل ازىلمەن جانە اششى الەۋمەتتىك كوزقاراسپەن ۇيلەسەتىن رەاليستىك جانە اقىندىق قابىلەتى ءۇشىن» بەردى. ستەينبەكتىڭ قالامىنان شىققان ەڭ ايگىلى روماندارى – «اشۋ شوعىرى»، «جۇماقتىڭ شىعىسىنا قاراي»، «ادامدار مەن تىشقاندار». Barnes &
Noble امەريكالىق دۇكەن جۇيەسى بويىنشا اتالعان تۋىندىلاردىڭ ءبارى دە ەڭ كوپ وقىلاتىن بەستسەللەرلەردىڭ قاتارىنا جاتادى. ءبىر قىزىعى ستەينبەك بۇل سىيلىققا سەگىز رەت ۇسىنىلىپ، 1962 جىلى ونى ازەر الدى. تالاي مارتە بايگەدەن اتى وزباي كەلگەندە، جازۋشى ءوزىنىڭ نوبەل سىيلىعىنا لايىق ەمەس ەكەنىن ايتقان بولاتىن. ادەبيەت سالاسىنداعى الەمدەگى ەڭ جوعارى ماراپاتتىڭ دجون ستەينبەككە بەرىلگەنى اقش سىنشىلارىنىڭ قاتتى نارازىلىعىن تۋعىزدى. سول جىلدارى جارىق كورگەن اقش-تىڭ ادەبي باسىلىمدارىندا سوڭعى ۋاقىتتارى جازۋشىنىڭ قالامىنان شىققان روماندارىنىڭ وتە ءالسىز تۋىندىلار ەكەنى كوپ ايتىلدى. سىنشىلاردىڭ كۇمان كەلتىرۋىندە شىندىق بار ەدى. 2013 جىلى سول كەزدەگى شۆەد اكادەمياسى قۇجاتتارىنىڭ قۇپياسى اشىلعاندا (زاڭ بويىنشا ول قۇجاتتار 50 جىل قۇپيادا ۇستالادى) – امەريكاندىق ادەبيەتتىڭ مويىندالعان كلاسسيگى – دجون ستەينبەكتىڭ ۇمىتكەرلەر قاتارىنداعى، «ەڭ ناشار توپتىڭ ىشىندەگى ۇزدىگى» بولعانى ءۇشىن نوبەل سىيلىعىن العانى انىقتالادى. جازۋشىنىڭ «اشۋ شوعىرى» رومانىنىڭ العاشقى باسىلىمى سۋرەتپەن بەزەندىرىلىپ 50 مىڭ دانامەن جارىق كورىپ، 2،75 دوللار تۇردى. 1939 جىلى بۇل شىعارما بەستسەللەرگە اينالىپ، 75 ملن كىتاپ كوشىرمەسى ساتىلدى. بۇگىنگى تاڭدا جاقسى كۇيدە ساقتالىپ قالعان روماننىڭ ەڭ العاشقى باسىلىمنىڭ قۇنى 24 مىڭ دوللاردان اسادى (جالعاسى بار).امانگەلدى كەڭشىلىك، facebook
