ش.ەسەنوۆ اتىنداعى كاسپيي مەملەكەتتىك تەحنولوگيالار جانە ينجينيرينگ ۋنيۆەرسيتەتى عيماراتىندا مۇرىن جىراۋ سەڭگىربەك ۇلىنىڭ تۋعانىنا 160 جىل تولۋىنا ارنالعان «نوعايلى جىرلارى جانە مۇرىن جىراۋ فەنومەنى» حالىقارالىق عىلىمي-تاجىريبەلىك كونفەرەنسياسى ءوتتى. اتالمىش كونفەرەنسياسى وسىمەن ەكىنشى رەت ۇيىمداستىرىلىپ وتىر.

شارانىڭ شىمىلدىعىن ماڭعىستاۋ وبلىسىنىڭ اكىمى سەرىكباي ترۇموۆ قۇتتىقتاۋ سوزىندە: «ماڭعىستاۋدىڭ گومەرى»! مۇنداي جوعارى باعاعا مۇرىن سەڭگىربەك ۇلى كوزىنىڭ تىرىسىندە يە بولعان. ماڭعىستاۋ ءوڭىرى مۇرىن جىراۋدىڭ 130، 140 جىلدىعىن اتاپ ءوتتى. 160 جىلدىعى قارساڭىندا فورت-شيەۆچەنكو قالاسىندا مۇرىن جىراۋدىڭ زەرگەرلىك شەبەرحاناسى قالپىنا كەلتىرىلىپ، «مۇرىن جىراۋ اتىنداعى مۋزەي» بولىپ اشىلدى. ۇلى مۇرانىڭ جاي-كۇيى تالايعا تىنىشتىق تاپتىرماي كەلگەنى راس. قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا مۇرىن جىراۋدىڭ تۋعانىنا 150 جىل تولۋىنا ارنالعان «جىراۋلىق ءداستۇر جاۋھارلارى» اتتى رەسپۋبليكالىق عىلىمي-پراكتيكالىق كونفەرەنسياسى نەگىزىندە جىراۋ تۋرالى بىرنەشە عىلىمي ەڭبەكتەر جارىق كوردى. ءبىرتۋار تۇلعانىڭ ءومىرى مەن ونەرى ءالى دە بولسا جان-جاقتى زەرتتەۋدى، ناسيحاتتاۋدى قاجەت ەتەدى. ۇلى جىراۋدىڭ 160 جىلدىعىنا وراي ۇيىمداستىرىلعان بۇگىنگى حالىقارالىق عىلىمي-تاجىريبەلىك كونفەرەنسيانىڭ ماقساتى – ادامزات تاريحىندا سيرەك كەزدەسەتىن ەرەكشە دارىن يەسى مۇرىن سەڭگىربەكۇلىن جانە اتالمىش جىردىڭ قازاق مادەنيەتى تاريحىندا الاتىن ورنىن ودان ءارى اشا ءتۇسۋ، جىر بويىنداعى ۇلتتىق قۇندىلىقتاردى كەلەر ۇرپاققا ناسيحاتتاۋ بولىپ تابىلادى»، — دەي كەلە، فورت-شيەۆچەنكو قالاسىنداعى مۇرىن جىراۋ مۋزەيى بۇگىنگى تاڭدا قايتا جاڭعىرىپ، تىڭ مازمۇنمەن تولىقتىرىلىپ، رەسپۋبليكالىق دەڭگەيگە كوتەرۋ باعىتىنداعى جۇمىستاردىڭ اتقارىلىپ جاتقاندىعىن، ۇستىمىزدەگى جىلدىڭ جەلتوقسان ايىندا مۋزەيدىڭ قۇرىلىس جۇمىستارى تولىقتاي اياقتالاتىندىعىن جەتكىزدى.

پلەنارلىق وتىرىس پەن سەكسيالىق ماجىلىستەردەن تۇراتىن كونفەرەنسياعا قازاق عىلىمىنداعى تانىمال پروفەسسورلار مەن عىلىم دوكتورلارىنان بولەك، كورشىلەس شەتەل عالىمدارى قاتىناستى. تاتارستان رەسپۋبليكاسىنىڭ عىلىم اكادەمياسى گ. يبراگيموۆ اتىنداعى ءتىل، ادەبيەت جانە ونەر ينستيتۋتىنىڭ دوسەنتى، فيلولوگيا عىلىمدارىنىڭ دوكتورى، «حالىقتىق ونەر» ءبولىمىنىڭ باس عىلىمي قىزمەتكەرى مۇحامەتزيانوۆا ليليا حاتيپوۆنا «نوعاي ەپوسى مەن نوعاي جىراۋلارى شىعارماشىلىعىنىڭ تاتارلاردىڭ حالىقتىق داستۇرلەرىنە اسەرى» تاقىرىبىندا، م.اكمۋللا اتىنداعى باشقۇرت مەملەكەتتىك پەداگوگيكالىق ۋنيۆەرسيتەتى «باشقۇرت ادەبيەتى جانە مادەنيەتى» كافەدراسىنىڭ دوسەنتى، تاريح عىلىمدارىنىڭ كانديداتى بايازيتوۆا روزاليا رافكاتوۆنا «باشقۇرت ەپوسى «يدۋكاي جانە مۋرادىم» ەتنو-تاريحي قاينار كوز رەتىندە» تاقىرىبىندا، قاراشاي-چەركەس گۋمانيتارلىق زەرتتەۋلەر ينستيتۋتى نوعاي ءبولىمىنىڭ مەڭگەرۋشىسى، فيلولوگيا عىلىمدارىنىڭ دوكتورى، پروفەسسور سۋيۋنوۆا ناسيپحان حۋسينوۆنا «نوعايلاردىڭ باتىرلىق ەپوسىنداعى «ەدىگە» پوەماسى» تاقىرىبىندا بايانداما جاسادى.