قوڭىر كەشتەر... قوڭىر كۇي... قوڭىر دالا...
قوڭىر اۋەن الديلەر كوڭىلدى انا.
قوڭىر ۇلتقا ءبىر ءتۇرلى مۇسىركەگەن
قوڭىرايىپ قاراي ما، ءومىر-دانا؟..

سياقتى ما زاڭدىلىق ومىردە بۇل،
قوڭىر تارتىپ تۇرعانداي ءوڭىم دە بۇل.
قازاعىم-اۋ، شىنىمەن وسى سەن بە،
قوڭىر دالا... قوڭىر ءۇي... قوڭىر كوڭىل...

قوڭىر مىنەز... قوڭىر وي... ءشوپ تە قوڭىر،
جەر دە قوڭىر، كەشكىلىك كوك تە قوڭىر،
قوڭىر... قوڭىر... بارلىعى تەگىس قوڭىر،
از دا قوڭىر، قاپتاعان كوپ تە قوڭىر...

قوڭىر ءتۇستىڭ ىشىندە جامان بار ما؟
قوڭىر ما ءوزى الماسقان زاماندار دا؟
بۇل قازاقتا بار ءوزى قانشا قوڭىر،
قوڭىر... قوڭىر... ساناعان ادام بار ما؟

قوڭىر مىنەز... قوڭىر وي... قوڭىر قاباق، 
قوڭىر ۇيگە قوناتىن قوڭىر ما ب ا ق؟
وكىنىشتەن قوپ-قوڭىر شارشاپ، ارىپ،
كەتكەندەردىڭ وتىرمىز جولىن قاراپ...

تاۋىسا الماي قىزىعىن ءبىر كۇنىنىڭ،
ءبىر كورە الماي پايداسىن بىرلىگىنىڭ،
بۇل قازاعىم شىنىمەن قوڭىر ۇلت پا،
ءبارى قوڭىر ويتكەنى تىرلىگىنىڭ.

تەك قوڭىردان تاڭدايسىڭ بارقىت ءتۇرىن،
ءتارتىپتىنىڭ، سەن بە ءوزى ءتارتىپتىنىڭ
قازاعىم-اۋ، بۇل سەنىڭ باسقالاردان
شىنىمەنەن بولار ما، ارتىقتىعىعىڭ؟

كەزىڭ قايدا، جارق ەتىپ، وت تا بولار،
كەزىڭ قايدا، قىزدىرار شوق تا بولار؟
قازاعىم-اۋ، ءدال وسى قوڭىرلىعىڭ
دەپ ويلايمىن ەش ۇلتتا جوق تا بولار.

قوڭىر كەشتەي قوپ-قوڭىر كوڭىلىڭ دە،
قوڭىر سالتاق قوپ-قوڭىر وڭىرىڭدە.
قوڭىلتاقسىپ تۇراتىن قوڭىر تىرلىك،
اشىق تا ەمەس، قوپ-قوڭىر ءومىرىڭ دە.

باسەكەگە مىنەزىڭ جاناسا ما،
جاڭاشا ويلار، بار ما ءوزى جاڭا سانا؟
سورى قالىڭ قازاعىم، ويلاپ كورشى،
قوڭىرلىعىڭ وزىڭە جاراسا ما؟

تۇرسا داعى بار بايلىق، قولىڭدا التىن،
بوگدە ۇلتتار كورۋدە-اۋ ونىڭ نارقىن...
قوڭىر تىرلىك كەشۋدەن شارشامايسىڭ،
قويدان جۋاس، قوزىدان قوڭىر حالقىم...

ءتىلىڭ مەنەن دىنىڭە ەم قونبادى،
جاتقا كەتتى قوپ-قوڭىر جەر قولداعى.
25 جىل، كەشەسىڭ قوڭىر تىرلىك،
25 جىل، تاۋەلسىز ەل بولعالى...

ال-دارمەنىڭ كەتكەن بە، راس، بويدان؟
ولەتىنىڭ قازاعىم، راس پا، ويلان...
25 جىل، ۇرىلار ەلى بولدىڭ
قازاعىم-اي، قوپ-قوڭىر جۋاس قويدان.

سەرىگىڭ جوق، بۇگىندە قول ۇستارعا،
قۇل بولدىڭ-اۋ، جاساندى «بولىستارعا».
جەم بولدىڭ-اۋ، قازاعىم، 25 جىل
ءشۇرشىت، جوڭعار جانە دە ورىستارعا...

قازاقتارعا – سانانىڭ جارىعى مۇڭ،
بىلە، بىلسەڭ، قازاقتىڭ تامۇعى بۇل.
مەن ولاردى باسقاشا ايتار بولسام،
شالاقازاق – قازاقتىڭ جاۋى بۇگىن.

قوڭىر كەشتە قوڭىر ۇلت ەڭىرەۋدە،
قىرىن قاراپ كەتكەن بە ءومىر ەلگە؟
ۇرپاقتارى كەشەگى قىزىلداردىڭ
قىزىل قىرعىن جاساۋدا قوڭىر ەلگە.

تۇك كورمەگەن قۇل-قۇتان اساپ جاتىر،
بىر-بىرىنە... قوينىنا تاس اپ جاتىر.
ءدىنسىز، ءتىلسىز، تەكسىزدەر، بيلىكتى الىپ،
ويلارىنا كەلگەنىن جاساپ جاتىر.

كورىنگەنگە جەم بولىپ دالا جاتىر،
جورگەگىندە شىرىلداپ بالا جاتىر.
قوڭىر ۇلتىم، نامىستان قاپ-قارا بوپ،
بىرتە، بىرتە، قارايىپ بارا جاتىر.

اللا بىلەر، نە جوقسىڭ، بار بولارسىڭ،
كىلەڭ قۇلعا – قۇل بولعان جان بولارسىڭ.
سول كەشەگى قوپ-قوڭىر تىرلىگىڭە،
بۇيتە بەرسەڭ، قازاعىم زار بولارسىڭ.

سىرت اينالعان وزىڭنەن تازا قۇداي،
قوڭىر ءتۇستى تاعدىردىڭ مازاعىن-اي...
قوپ-قوڭىر بوپ باراسىڭ قوڭىرايىپ،
قويدان جۋاس قوپ-قوڭىر قازاعىم-اي...

جۇماش كەنەباي