رۋحتى قازاقتاردان الاڭداما!

/uploads/thumbnail/20170708204128438_small.jpg

ءسوزىڭىز بولساداعى قۇرىش ناعىز،

ايبارلى ارىستانعا جۇعىسپاڭىز.

ادامعا باستى پالە تىلدەن دەگەن،

كوبىندە اۋىزىمىزدى قۇلىپتايمىز.

دانالاردىڭ ءۇڭىلىپ تاعىلىمىنا،

بابالاردىڭ ءداستۇرىن ۇلىقتايمىز.

قىتايداعى قازاقتان الاڭداما،

داۋىل مەن جاۋىن كورىپ شىنىققانبىز.

ءۇيسىن، عۇندار، تۇرگەشتەر كىندىك قانى،

توگىلگەن جەردە جۇرگەن تۋىستارمىز.

تاۋعا قاراپ ۇليتىن بولتىرىكپىز،

سوندىقتان، تەگىمىزدى ۇمىتپايمىز.

داۋىلداردا قۇلاعان بايتەرەكتىڭ،

تۇعىلىنان كوكتەگەن شىبىقتايمىز.

 

ءۇيسىن تاۋ، بوعدا، جايىر اراسىندا،

بابالار ءىزى قالعان ناناسىڭ با؟

اۋناعان دۇلدۇلدەردىڭ تۇگى قاپتى،

ەمىل، ىلە، قىراننىڭ جاعاسىندا.

قابانباي، رايىمبەك، جانىبەكتەر،

حالقى ءۇشىن مايدان قۇرعان ءدال وسىندا.

اقتەكە، اكبار - سەيىت ەسىمدەرى،

قازاقتىڭ ساراي سالعان ساناسىنا.

تاڭجارىق، اقىت، كودەك - الىپ شىنار،

ەر جەتتىك ءبىز سولاردىڭ ساياسىندا.

سولاردىڭ رۋحىمەنەن ەل سەرپىلىپ،

ءداستۇردىڭ ءدانىن ەككەن دالاسىنا،

"رۋحتىلار مويىماس قيىندىققا"،

دەگەن ءسوز بار قۇراننىڭ اياتىندا.

اقىنداردىڭ ارناۋلى مەكتەبى بار،

قىتايدىڭ كۇيتۇن دەگەن قالاسىندا،

احمەت بايتۇرسىنوۆ جازۋىمەن،

جاستاردىڭ ءوز تىلىندە ءبارى وقۋدا.

ەكى ءتىلدى شەتىنەن مەڭگەرگەنمەن،

ابايداي قۇرمەتى مول باباسىنا.

قازاقتىڭ پاك كوڭىلى كىرلەمەسە،

قالمايدى جات بىرەۋدىڭ تاباسىنا،

مەندە سول سايرام كولدىڭ اققۋى ەدىم،

حات بايلاپ ۇشىردى ەلىم قاناتىما.

جايلاعان ازيانىڭ اپاي ءتوسىن،

اق سالەم الا كەلدىم الاشىما!

 

ارزىگۇل قايىڭبەك قىزى

ايتىس اقىنى ايبەك قالييەۆپەن بولعان ايتىسىندا ارىپتەسىنىڭ «قىتايداعى قانداستاردىڭ تاعدىرىنا الاڭدايمىن» دەگەنىنە جاۋابى.

پىكىر قالدىرۋ

قاتىستى ماقالالار