Búgin Almatyda ál-Farabı atyndaǵy Qazaq ulttyq ýnıversıtetiniń ǵylymı kitaphanasynda «Eýropalyq odaq pen Qazaqstan Respýblıkasy arasyndaǵy joǵary bilim salasyndaǵy yntymaqtastyq» atty halyqaralyq ǵylymı konferensıa bastaldy. Bul týraly Qamshy portaly Inform.kz-ke silteme jasaı otyryp habarlaıdy.

Oǵan QR Bilim jáne ǵylym mınıstrligi, Qazaqstandaǵy Eýropalyq Odaqtyń delegasıasy, Eýroodaqqa múshe elderdiń Qazaqstandaǵy dıplomatıalyq ókildikteri jáne Eýrodaq elderiniń aldyńǵy qatarly 60-tan astam ýnıversıtetteriniń ókilderi qatysýda. 

«Búgingi ǵylymı konferensıany uıymdastyrýdaǵy maqsatymyz - Qazaqstan men Eýropa elderiniń aldyńǵy qatarly ýnıversıtetteri arasyndaǵy yntymaqtastyqty keńeıtý jáne nyǵaıtý. Sondyqtan búgingi jıyn barysynda osy másele jan-jaqty talqylanady. Sonymen qatar, otandyq joǵary oqý oryndarynyń basshylyǵy búgingi ǵylymı forýmǵa kelgen shet eldik áriptesterimen tikeleı baılanys ornata alady. Óıtkeni, Eýropa elderinen 60-tan astam ýnıversıtettiń ókilderi keldi», - dedi óz sózinde QR Bilim jáne ǵylym mınıstrligi JOO jáne JOO-dan keıingi bilim berý departamentiniń dırektory Serik Ómirbaev.

Sonymen qatar, ol mundaı deńgeıdegi ǵylymı forým stýdentter men oqytýshylardyń mobıldi bolýyna septigin tıgizetindigin jetkizdi.

«Qazaqstan men Eýropalyq Odaq arasynda tyǵyz qarym-qatynas ornaǵan. Elimizde mundaı dárejedegi forým osymen altynshy ret ótkizilip jatyr. Buǵan deıin mysaly, Qazaqstan-Brıtan jáne Qazaqstan-Fansıa forýmyn ataýǵa bolady. Mundaı kezdesýler stýdentter men oqytýshylardy barynsha mobıldi bolýyna, tájirıbe almasýǵa jáne birlesken ǵylymı jobalardy júzege asyrýǵa múmkindik beredi», - dedi S. Ómirbaev.