بۇگىندە قۇلتەمىرلەر (روبوت) سانى جونىنەن الەمدە الدىڭعى ورىندا تۇرعان جاپونيادا ادام ءتارىزدى ءىس-قيمىل جاسايتىن روبوتتىڭ كوپتەگەن تۇرلەرى تانىمال. ەندى سولاردىڭ بىرنەشەۋىنە توقتالايىق.

سايا ەسىمدى حاتشى روبوت

توكيوداعى جاراتىلىستانۋ عىلىمدارى ۋنيۆەرسيتەتىندە سايا ەسىمدى حاتشى جۇمىس ىستەيدى. ءبىراق ول ادام ەمەس، حاتشى قىز بەينەسىندە جاسالعان روبوت.  ۋنيۆەرسيتەتتىڭ تەحنولوگيا فاكۋلتەتىنىڭ عىلىمي-زەرتتەۋ لابوراتورياسىنا كەلۋشىلەردى قابىلداپ، تىركەپ،  اقپارات جيناۋمەن اينالىساتىن حاتشى  روبوت سويلەيدى، كۇلەدى، ءتىپتى رەنىشىن دە جاسىرمايدى. ول قابىلداۋ بولمەسىنە كەلگەن ادامعا باسىن يزەپ، سالەم بەرەدى دە، “بۇل نەعىلعان جان؟” دەگەندەي جاقسىلاپ قارايدى. سودان سوڭ كىسىنىڭ قانداي شارۋامەن كەلگەندىگىن سۇرايدى. كەلۋشىنى تىركەگەن سوڭ، مەكەمەگە كىرۋگە رۇقسات بەرەدى ەكەن. ءارى اقىلدى، ءارى ەڭبەكقور، جالاقى تالاپ ەتپەيتىن سايا سياقتى حاتشى  روبوت قاي مەكەمەگە بولسا دا قاجەت-اۋ.

حيرۋرگ-روبوتتىڭ قىزمەتى وراسان

جاپونيادا كىسى حيرۋرگتىڭ ءالى قولى جەتە قويماعان مۇمكىندىكتەرىن حيرۋرگ  روبوت تولىقتىرۋدا. مم1 جۇيەسى بويىنشا ىسكە قوسىلعان عاجايىپ  روبوت  ميداعى اقاۋلىقتى جىلدام تاۋىپ، ۇساق-تامىرلارعا ەم جاسايدى ەكەن. ەگەر دارىگەر مونيتورعا قاراپ وتىرىپ، قۇرال-سايماندار ارقىلى 100 مم مولشەردەگى تامىرلارعا قوزعاۋ سالسا، حيرۋرگ  روبوت 5مم-لىك وتە ۇساق كولەمدەگىنى كورە الادى ەكەن. سونداي-اق، ونىڭ تەرەڭدىگى 60 مم، ەنى 0،8 مم وتە جىڭىشكە قان تامىرىنا وپەراسيا جاساۋ مۇمكىندىگى بار. حيرۋرگ - روبوت توكيو ۋنيۆەرسيتەتىنىڭ تەحنيكالىق زەرتتەۋلەر ينستيتۋتىندا جاسالىپ، ۋنيۆەرسيتەتتىڭ مەديسينا فاكۋلتەتىنە قاراستى اۋرۋحانانىڭ مي جانە جۇيكە جۇيەسىن ەمدەيتىن بولىمشەسىندە ىسكە قوسىلعان.

وتتان، سۋدان، ۇرىدان... بارىنەن قورعايتىن كۇزەتشى روبوت

جاپونياداعى «گادروبو-د1» دەپ اتالاتىن پاترۋل ساقشىسى كەز-كەلگەن مەكەمە، زاۋىت-فابريكا، قويمالاردى قاراۋىلداي الادى ەكەن. ونىڭ كەۋدەسىنە، ارقاسىنا جانە قوس بۇيىرىنە ءتورت بەينەكامەرا ورناتىلعان. روبوت ءوزىنىڭ كامەراسى ءتۇسىرىپ العان بەينەلەردى اۆتوماتتى تۇردە «قاۋىپسىزدىك ورتالىعىنداعى» ماماندارعا جىبەرەدى. ول سونىمەن قاتار كۇدىكتى كىسىنى بايقاسا نەمەسە ءورت پەن سۋ شايۋ ءقاۋپىن سەزسە دەرەۋ دابىل قاعادى. كۇزەتشى روبوتتىڭ تاعى ءبىر كەرەمەتى — كەنەتتەن ءورت شىعا قالسا ءورت سوندىرگىش قۇرالىمەن بىردەن سوندىرە قويادى. امبەباپ كۇزەتشىنىڭ دەنە تۇرقى 110 سانتيمەتر، سالماعى 80 كيلوگرامم. بۇل روبوتتى كۇنشىعىس ەلىندەگى «كۇزەت قىزمەتى» دەپ اتالاتىن اكسيونەرلىك كومپانيا پايدالانۋدا.

شارافات جىلقىبايەۆا