قارىز الۋشىنىڭ نەسيەنى وتەي الماۋى كەشىرىمگە نەگىز بولۋى ءتيىس. بۇل تۋرالى بۇگىن ق ر پارلامەنتى ءماجىلىسىنىڭ «كوللەكتورلىق قىزمەت تۋرالى» زاڭ جوباسى بويىنشا جۇمىس توبىنىڭ وتىرىسىنان كەيىن تىلشىلەرگە بەرگەن سۇحباتىندا ق ر ۇلتتىق بانكى ءتوراعاسىنىڭ ورىنباسارى ولەگ سمولياكوۆ ءمالىم ەتتى، - دەپ حابارلايدى Qamshy.kz قازاقپاراتقا سىلتەمە جاساپ. 

«ءبىر جاعىنان ءبىز بىلەمىز، نەسيە الۋشىلاردا اتالمىش كرەديتتى تولىق اتقارۋعا كەدەرگى كەلتىرەتىن ومىرلىك جاعداياتتار بولادى. بۇل جاعدايلار نەسيە زايمدارىن قايتا قاراۋعا جانە ونى تالاپ ەتۋگە نەگىز بولا المايدى. بۇل كەرىسىنشە، كەشىرىمگە نەگىز بولا الادى. اتالمىش زايمدى وتەۋگە جاعدايى بولماسا، بانك كوللەكتورلىق ۇيىمدى تارتپاي-اق، اتالمىش زايمدى نەسيە الۋشىدان قايتارۋدى تالاپ ەتۋ قۇقىعىنان باس تارتا الادى»، - دەدى و.سمولياكوۆ.

ونىڭ سوزىنە قاراعاندا، ۇلتتىق بانك دەپۋتاتتاردىڭ نەسيە الۋشىنىڭ ومىرلىك جاعدايىنا بايلانىستى نەسيەنى وتەۋ قابىلەتىنەن ايىرىلعاندا كوللەكتورلىق قىزمەتتى تارتپاۋ تۋرالى ۇسىنىستارىن قولدايدى. ۇلتتىق بانك باسشىسىنىڭ ورىنباسارى سونىمەن قاتار، قاراپايىم حالىق كوللەكتورلىق ۇيىمداردى «رەكەت» رەتىندە قابىلدايتىندىقتارىن جاسىرمادى. ءوز كەزەگىندە ولار حالىقتىڭ الەۋمەتتىك از قورعالعان بولىكتەرىمەن جۇمىس جاسايتىن قىزمەت. وسى سەبەپتى اتالمىش زاڭ كوللەكتورلىق قىزمەتتىڭ جۇمىسىن زاڭ جۇزىندە رەتتەۋگە جانە حالىقتىڭ كوللەكتورلىق ۇيىمدارعا دەگەن كوزقاراسىن وزگەرتۋگە سەپتىگىن تيگىزەدى.

ماجىلىسمەندەر زاڭ جوباسىنىڭ 4-بابىنا وزگەرىستەر ەنگىزدى. ول باپتا كوللەكتورلىق قىزمەت اياسى تارالمايتىن جەكە تۇلعالار ءتىزىمى بەرىلگەن. اتاپ ايتقاندا: قارىزدارى جالعىز ۇيلەرىمەن كەپىلدەندىرىلگەن تۇلعالار، ۇلى وتان سوعىسىنىڭ قاتىسۋشىلارى مەن مۇگەدەكتەرى، وعان تەڭەستىرىلگەن تۇلعالار، ءبىرىنشى جانە ەكىنشى توپ مۇگەدەكتەرى، كامەلەتتىك جاسقا تولماعاندار، زەينەتكەرلەر، سوتپەن ارەكەت قابىلەتتىلىگى جوق نەمەسە تومەن دەپ تانىلعان تۇلعالار، پسيحونيەۆرولگيالىق جانە ناركولوگيالىق ديسپانسەردە ەسەپتە تۇرعان تۇلعالار، تۋبەركۋلەز ديسپانسەرىندە ەمدەلىپ جۇرگەن تۇلعالار، كاسىبي جاراقاتتارى بار جانە ەڭبەك مىندەتتەرىن اتقارۋ كەزىندە جاراقات العان تۇلعالار نەمەسە جالپى ەڭبەك قابىلەتتىلىگىن 80-نەن 100 پايىزعا دەيىن تومەندەتكەن ق ر ۇكىمەتىمەن بەكىتىلگەن كەيبىر اۋىر سوزىلمالى اۋرۋلارعا شالدىققان تۇلعالار، باس بوستاندىعىنان ايىرۋ ورىندارىندا جازاسىن وتەپ جاتقان تۇلعالار، ەكولوگيالىق اپات، تابيعي جانە تەحنوگەندى سيپاتتاعى توتەنشە جاعدايلار كەزىندە باسپاناسىنان ايىرىلعان تۇلعالار، مەملەكەتتىك جانە قوعامدىق مىندەتتەرىن وتەۋ كەزىندە، اسكەري قىزمەت بابىندا، عارىشقا ۇشىرىلۋ كەزىندە، ادام ءومىرىن قۇتقارۋ بارىسىندا، قوعامدىق ءتارتىپتى ساقتاۋ كەزىندە قازا تاپقان تۇلعالاردىڭ وتباسىلارى.