فەتە حاميل(اقش)

ولار ءۇش بويجەتكەن، ءۇش بوزبالا 34ء-شى جول اۆتوبۋسىنا ازىق-تۇلىكتەرىمەن قوسا ىشىمدىك جانە قاعاز سۋمكالارىن سالىپ، فلوريدا شتاتىنىڭ فورت لاۋدرليل قالاسىنا بارۋعا جولعا شىقتى. ولاردىڭ باعىتى تەڭىز قايراڭىنىڭ جاعاسىنا بارىپ ساياحاتتاۋ ەدى. بۇل شاقتا نيۋ-يوركتىڭ سالقىن كوكتەمى كەتىپ، جايدارلى جازى كەلە باستاعان بولاتىن. ولارمەن بىرگە اۆتوبۋسعا شىققان ۋينگو الدىڭعى ورىندىققا كەلىپ وتىردى. تەز قارقىنمەن زاۋلاعان اۆتوبۋس ىلەزدە نيۋجەرسي قالاسىنان وتىپ ۇلگىردى .ولار ءۇنسىز وتىرعان ساپارلاستارى ۋينگوعا سويلەمەكشى ەدى، ءبىراق ءۇنسىز كۇيدە وتىرعان ۋينگو ەشقانداي ىڭعاي بىلدىرمەدى. شاڭ-توزاڭ باسقان بەتىنەن ونىڭ جاسىن ايىرۋ قيىنداۋ، ال ۇستىنە كيگەن قوڭىر شينەلى وعان مۇلدە جاراسپاعان، اربيعان ساۋساقتارى تەمەكىنىڭ سارعىشىنان سارعايىپ كەتكەن ەدى. ول ەرنىن جىمىرعان كۇيى قۇددى نە بولعانىن بىلە الماعان جانداي ءالى دە ءۇنسىز كۇيدە وتىر. ىمىرت ۇيرىلە بەرگەندە اۆتوبۋس حوۆارد جونسون تاعامجايىنىڭ الدىنا كەلىپ توقتادى. وسى كەزدە ۋينگودان باسقا جولاۋشىلار اۆتوبۋسدان تۇسە باستادى. جاستار جاعى جول بويى ءۇنسىز كەلگەن ساپارلاستارى ۋينگونىڭ جاعدايىن بىلگىلەرى كەلدى. بالكىم ول تەڭىز كاپيتانى بولعان بولۋ كەرەك، بالكىم ول ايەلىنەن ايىرىلعان جالعىز باس پەندە شىعار نەمەسە ۇيىنە ورالعان قارت سولدات پا دەگەن كۇدىكتى ويلار ولاردى ءجيى مازالادى. سالدەن سوڭ ولار اۆتوبۋسعا قايتا شىققاندا ارالارىنداعى ءبىر جاس قىز توساتتان ۋينگومەن اڭگىمەلەسكىسى كەلدى دە ونىڭ الدىنداعى ورىندىققا وتىرا سالىپ ءسوز باستادى: – ءبىز فلوريداعا بارا جاتىرمىز، سىزدە سوندا باراسىز با؟ – بىلمەيمىن. – مەن فلوريداعا بارىپ كورمەپپىن، ەستىۋىمشە ول جەر كوركەم دە كەلىستى جەر دەيدى . – سولاي شىعار، - دەدى ۋينگو ءۇنى باسەڭ شىعىپ . – ءسىز سول جەردە تۇراسىز با؟ – ءيا، مەن سول جەردەگى دجەكسلنيل بازاسىندا تەڭىز اسكەرى بولعانمىن. – اراق ىشەسىز بە؟ - دەدى قىز. ول كۇلىمسىرەگەن بەينەمەن قىز بەرگەن اراقتى الىپ قاۋىپ ءبىر ۇرتتادى دا، قىزعا راحمەتىن ايتىپ قايتادان ءۇنسىز كۇيگە اۋىستى. سالدەن كەيىن قىز ورىننا قايتقان سوڭ ۋينگو قالعىپ كەتتى. ماناۋراپ تاڭ اتىسىمەن ولار ءبىر-بىرىن وياتىپ تاڭعى اس ىشۋگە دايىندالدى. ۋينگو بۇل ساتتە الدەقاشان تاعامجايعا كەلىپ العان ەدى. الگى جاس قىز ۋينگونى استى بىرگە وتىرىپ ىشۋگە شاقىردى، ءبىراق ۋينگو داياشىعا قارا كوفە بۇيىرتىپ، تەمەكى شەگىپ ءوز ويىمەن ءوزى ابىگەر. ال جاستار جاعى تەڭىز قايراڭى جاعاسىندا راحات ۇيىقتاعان اسەرلەرىن كوڭىلدى اڭگىمە ەتىپ جاتتى. سالدەن سوڭ اۆتوبۋس قوزعالعاندا الگى قىز تاعى دا ۋينگونىڭ قاسىنا كەلىپ وتىردى. ارادا ءسۇت ءپىسىرىمداي ۋاقىت وتكەندە اۋىر كۇرسىنگەن ۋينگو ءوز كەشىرمەلەرىن وعان ايتىپ بەردى. الدىمەن ول وتكەن ءتورت جىلدا نيۋ-يوركتا تۇرمەدە جاتىپ، ءقازىر بوساپ ۇيىنە قايتىپ كەلە جاتقانىن اڭگىمەلەدى . – ۇيلەندىڭىز بە؟ – بىلمەيمىن. – نەلىكتەن بىلمەيسىز؟ – مەن تۇرمەدەگى كەزىمدە ايەلىمە حات جازىپ، ەگەر ول مەنىمەن جالعاستى ءۇي ۇستاۋعا شاراسىز قالىپ، باسقا بىرەۋمەن نەكەلەنۋ ويى بولسا، ءارى ول تۇرمىستىڭ سوققسىنا شىداي الماسا، بالالارىمىز اكەمىز قايدا دەپ سۇراپ مازاسىن الا بەرسە مەنى ۇمىتىپ كەتىپ باسقا بىرەۋمەن نەكەلەنۋىنە قوسىلاتىندىعىمدى، ءارى ماعان بۇدان بىلاي حات جازباۋىن ايتقانىمىن. ءبىراق كەرىسىنشە ول ءتورت جىلدان بەرى مەنىڭ كەلەر جولىما ءۇمىت كوزىمەن قاراۋمەن ءومىر وتكىزىپ كەلدى. ەشقاشان ماعان حات جازۋدان جالىققان ەمەس. – وندا ءسىز بۇگىن ۇيىڭىزگە قايتاتىن شىعارسىز؟ نەگە بىلمەيمىن دەيسىز؟ – ءيا، دەدى ول ىڭعايسىزدانعان بەينەدە. الدىڭعى اپتادا مەنىڭ تۇرمەدەن شىعۋىم تۇراقتانعان سوڭ مەن وعان حات جازىپ ەگەر ول باسقا بىرەۋمەن نەكەلەنگەن بولسا ونى تۇسىنەتىندىگىمدى، بولماسا مەنى ءالى دە كۇتىپ وتىرعان بولسا مەن كوپ وتپەي ۇيگە قايتاتىندىعىمدى ايىتقانمىن. ءبىز بۇرىن برانسۆيك اۋىلىندا وتىرعانبىز، اۋىلعا كىرە بەرىس جەردە ءبىر ۇلكەن كاۋچۋك اعاشى بار بولاتىن. مەن وعان ول مەنى ءالى دا توسىپ وتىرعان بولسا الگى كاۋچۋك اعاشىنىڭ باسىنا سارى تورعىن بايلاپ قويۋىن، سارى تورعىن كورىنسە مەن اۆتوبۋستان ءتۇسىپ ۇيگە قايتاتىندىعىمدى، ەگەر سارى تورعىن كورىنبەسە جالعاستى ءوز جولىما كەتە بەرەتىندىگىمدى ەسكەرتكەنمىن . – ۋوۋ، - دەپ اسەرلەنگەنىنەن قاتتى ايعايلاپ جىبەرگەن قىز ۋينگونىڭ اڭگىمەسىن جولداستارىنا ايتىپ بەردى. قاتتى تولىقىپ كەتكەن ۋينگو ولارعا ءۇش بالاسىمەن جانە ايەلىمەن بىرگە تۇسكەن سۋرەتتى كورسەتتى. وسى ساتتە ۋينگومەن بىرگە قاتتى تولقىعان اۆتوبۋسداعىلاردىڭ بارلىعى برانسۆيك اۋىلىنا تەزىرەك جەتۋگە اسىعىپ كەلە جەتتى. ولار ءقازىر برانسۆيك اۋىلىنان 20 شاقىرىم قاشىقتىقتا ەدى. وسى كەزدە اۆتوبۋسداعى بىرنەشە جاستار وڭ جاق ورىندىقتىڭ تەرەزە جاعىنا كەلىپ جايعاسىپ، كاۋچۋك اعاشىن تەزىرەك كورۋگە تاعاتسىزدانىپ كەلە جاتتى. كوڭىل-كۇيى استاڭ-كەستەڭ ۋينگو تەزەزە جاققا قاراۋعا باتىلى بارماي، بەينە الدا كەزدەسەتىن ۇمىتسىزدىككە بەلىن بەكەم بۋعانداي جابىرقاۋ كۇيدە وتىر ەدى. اۆتوبۋس برانسۆيك اۋىلىنا جاقىنداپ كەلەدى. جيىرما شاقىرىم... ون شاقىرىم... بەس شاقىرىم... سالدەن سوڭ اۆتوبۋسداعى جاستار ورىندارىنان تۇرەگەلىپ، شىڭعىرىپ، ايعايلاپ، ءتىپتى كەيبىرى اسەرلەنگەنىنەن جىلاپ تا جىبەردى. تەك جۇدەۋ كوڭىل ۋينگو عانا ءالى دە ءۇنسىز كۇيدە وتىرعان ەدى، كەنەت ول كاۋچۋك اعاشى جاپىراعىنا قاز-قاتار بايلانعان سارى تورعىنداردى كورگەندە ءوز كوزىنە ءوزى سەنبەي قالدى. جالعىز وسكەن كاۋچۋك اعاشىنىڭ جاپىراعى سارى تورعىنعا تولعان ەكەن. وتىز نەمەسە ەلۋ بالكىم ءجۇز تورعىن شىعار... سارى تورعىن بايلانعان كاۋچۋك جاپىراقتارى قۇددى قارسى الامىز دەپ تۇرعانداي سامال جەلمەن باياۋ ىرعالىپ تۇر. جۇزدەرىنەن قۋانىش بايقالعان جاستار ءالى دە ايعايلاپ كەلەدى، ولار ۋينگونىڭ قولىن كەزەك-كەزەك قىسىپ، قيماستىقپەن قوشتاستى.

اۋدارعان: دۇيسەنالى شامەك