2 جىل بۇرىن 10 جىلعا قامالعان 69 جاستاعى جاكلين ساۆاجدى(Jacqueline Sauvage) بوساتۋ كامپانياسى اقپان ايىندا باستالعان ەدى.

فرانسيادا 47 جىل جۇبايلىق عۇمىرىندا وزىندە زورلىق-زومبىلىق كورسەتكەن كۇيەۋىن ولتىرگەن جاكلين ساۆاجعا فرانسيا پرەزيدەنتى فرانسۋا وللاند كەشىرىم جاسادى. بۇل تۋرالى BBCء-دىڭ تۇرىك قىزمەتى جازدى.

ساۆاجدىڭ كۇيەۋى نوبەرت ماروت ايەلىمەن قاتار بالالارىنا دا زورلىق كورسەتكەن. ءۇش قىزىنىڭ ەكەۋىن بىردەي زورلاعان. ول ۇرىپ-سوققاننان كەيىن كۇيەۋى اسىلىپ ولگەن.

فرانسيادا تولقۋ تۋعىزعان وسى قىلمىسقا بايلانىستى پرەزيدەنت فرانسۋا وللاند اقپان ايىندا ساباجعا ءىشىنارا راقىمشىلىق جاساعان بولاتىن.

وللاندتىڭ تولىقتاي كەشىرىمىمەن جاكلين ساۆاج كەشە بوستاندىققا شىقتى. وللاند Twitter حابارلاماسىندا «جاكلين ساباجدىڭ قالعان جازاسى ءۇشىن كەشىرىم جاسايمىن. بۇل راقىمشىلىقپەن قاماۋدان دەرەۋ بوساتىلادى» دەپ جازدى.

سوڭىنان ەليسەي سارايىنان جاسالعان مالىمدەمەدە وللاند «ايەلدىڭ ورنى تۇرمە ەمەس، وتباسىندا بولۋعا ءتيىس دەپ ويلايمىن» دەگەن.

پرەزيدەنتتىڭ بۇل شەشىمى ساباجدى بوساتۋ ءۇشىن كامپانيا باستاتقان توپتار اياسىندا سۇيىنىشپەن قابىلداندى. ايتا كەتسەك، ساباج ۇلى اسىلىپ قالعان كۇننىڭ ەرتەسىندە كۇيەۋىن تاپانشامەن اتىپ ولتىرگەن. ال، ونى بوساتۋ كامپانياسىن قولداعاندار سانى ىشىندە دەپۋتاتتارمەن قوسا 430 مىڭ ادامدى قۇراعان. كامپانيانى قولداۋشى رەتىندە پرەزيدەن وللاند ساباجدىڭ ءۇش قىزىمەن كەزىككەننەن كەيىن شارتسىز تۇردە انالارىنىڭ بوستاندىققا شىعۋىن قامتاماسىز ەتتى.

ايتا كەتسەك، نوبەرت ماروتتان 47 جىل ءزابىر كورگەن ايەل 4 رەت اۋىر جاعدايدا اۋرۋحاناعا تۇسكەن.

2012 جىلدىڭ 9 قىركۇيەگىندە ۇلى ءوزىن اسىپ ءولتىردى.

2012 جىلدىڭ 10 قىركۇيەگىندە كۇيەۋىن تۋ سىرتىنان ءۇش وق اتىپ ءولتىردى.

2014 جىلى قازان ايىندا «قاستىقسىز ادام ولتىرۋدەن» 10 جىل تۇرمەگە كەسىلدى.

2015 جەلتوقسان اپەللياسيالىق سوت شەشىمىن كۇشىندە قالدىردى.

2016 قاڭتار پرەزيدەنت وللاند ساۆاجدىڭ قىزدارىمەن كەزدەسىپ، قۇقىقتىق ورىنداردان ساۆاجدى مەرزىمىنەن بۇرىن بوساتۋدى ءوتىندى. كونستيتۋسيالىق قۇقىن پايدالانىپ، ءىشىنارا راقىمشىلىق جاسادى. دەگەنمەن سوت ساۆاج «جاساعان قىلمىسىنا كەشىرىم سۇراماعانى» ءۇشىن ساۆاجدى تولىقتاي بوساتپادى.

2016 جىل، 28 جەلتوقسان، ساۆاج پرەزيدەنتتىڭ راقىمشىلىعىمەن تولىقتاي بوساپ شىقتى.