17 جىل بۇرىن وزبەكستاننان اتاجۇرتقا ورالعان قانداسىمىز ساندۋعاش تۇرمانوۆا ءالى كۇنگە دەيىن قر-نىڭ ازاماتتىعىن الا الماي ءجۇر. ءقازىر ول الماتى وبلىسى، قاراساي اۋدانىنا قاراستى جاڭاقۇرىلىس ەلدى مەكەنىندە سەگىز بالاسىمەن پاتەر جالداپ تۇرادى.  ىشەرگە اسى، كيەرگە كيىمى جوق كوپبالالى وتباسى كومەك سۇرايدى. بۇل تۋرالى kaztrk.kz حابارلادى.

ساندۋعاش تۇرمانوۆا 2000 جىلى وزبەكستاننان وتباسىمەن بىرگە اتاجۇرتقا قونىس اۋدارعان. سول تۇستا ونىڭ قولىندا وزبەكتىڭ ەمەس، كەڭەس وكىمەتى كەزىندەگى قىزىل پاسپورت بولعان. ءبىراق سول قۇجاتپەن جاڭاوزەنگە تىركەۋگە تۇرعان. ال 2003 جىلى ولار الماتى وبلىسىنا كوشىپ كەلگەن. ۋاقىتشا پاتەر جالداپ، التىن وردا بازارىندا ساۋدا جاساپ كۇن كورگەن.

“بالا ۇستىنەن بالا تۋىپ، پاسپورتتى اۋىستىراتىن، جاسايتىن  ەشقانداي جاعداي بولعان جوق. كۇيەۋىم بازاردا جۇك تاسۋشى بولدى، مەن بالامەن ۇيدە وتىردىم” دەيدى ساندۋعاش تۇرمانوۆا.

ول قازاقستانعا كەلگەلى 7 قۇرساق كوتەرگەن. ونىڭ بىرەۋى ءسابي كەزىندە شەتىنەپ كەتكەن. ەكىنشى پەرزەنتى ءۇيدىڭ جانىنداعى  سۋعا تۇنشىعىپ قايتىس بولدى. ال قالعان 8 بالانى باعىپ-قاعامىن دەپ تىركەۋگە دە تۇرماعان. سودان بەرى 17 جىل وتكەن. كوپبالالى انا اتانعانىمەن ءالى كۇنگە دەيىن ازاماتتىعى جوق. سوندىقتان، التىن القا الماق تۇگىلى، مەملەكەتتەن بەرىلەتىن كومەكتىڭ بارىنەن قاعىلعان.

“بەسەۋىندە دە مەتركەسى جوق. پەرزەنتحانادا ماعان انىقتاما دا بەرگەن جوق”، – دەيدى ول.

بىلتىر جولداسى ەكەۋى بالا-شاعاسىنىڭ اۋزىنان جىرىپ، تاپقان 95 مىڭ تەڭگەسىن "جەكە كۋالىگىڭدى جاساپ بەرەمىن" دەگەن بەيمالىم كەلىنشەكتىڭ قولىنا ۇستاتقان. اقىرى ول الداپ سوعىپ، ۇشتى-كۇيلى جوعالعان. ەندى ەسكى قۇجاتىنان دا قاعىلىپ وتىر.

كوشى-قون پوليسياسى بۇدان حاباردار ەكەنىن جەتكىزدى. ماماندار ولارعا ورالمان مارتەبەسىن الۋعا كومەك بەرەتىندەرىن ايتتى.

ءقازىر تىركەۋ ناۋقانى ءجۇرىپ جاتىر. ساندۋعاش بولسا قۇجات تەكسەرتۋدەن قاشىپ، ۇيدەن شىقپاي وتىر. ايتەۋىر بالالارى مەكتەپكە بارادى. بۇل دا كوڭىلگە مەدەت. الايدا ولاردىڭ كيەرگە كيىمى، ىشەرگە اسى جوق. اياداي بولمەدە بالالاردىڭ اش قۇرساق جۇرەتىن كەزدەرى از ەمەس.

بۇل وتباسى 17 جىلدان بەرى پاتەر جاعالاپ، اركىمنىڭ تابالدىرىعىن توزدىرىپ ءجۇر. سوندىقتان ولار قانداي دا بولماسىن كومەككە مۇقتاج.