جامبىلدا نارەستەسىن ناجىسكە تۇنشىقتىرىپ ولتىرمەك بولعان ايەل مەرزىمەن بۇرىن تۇرمەدەن بوسايتىن بولدى. ءسابيىن اجەتحاناعا تاستاپ كەتكەنى ءۇشىن 1 جارىم جىلعا سوتتالعان ءامينا ءماجىعۇلوۆا راقىمشىلىققا ءىلىنىپ وتىر، دەپ جازادى كتك تەلەارناسى.

ونىڭ ەركىندىككە شىعۋى جونىندەگى ءوتىنىشىن وسكەمەن قالالىق سوتى ماقۇلداعان. ءبىراق، كەلىنشەكتىڭ ۇيىنە كەلگەن-كەلمەگەندىگى جايىندا ازىرگە مالىمەت جوق. ءبىر انىعى، وسى قۋانىشتى حابارىمەن ءامينا ءماجىعۇلوۆانىڭ اناسى، «ءۇمىت» بالالار ءۇيى قىزمەتكەرلەرىمەن بولىسكەن.

بىلتىر قاڭتاردا تۇرار رىسقۇلوۆ اۋدانىنىڭ 21 جاستاعى تۇرعىنى كۇرە جول بويىنداعى دارەتحانانىڭ بىرىنە ءسابيىن بوسانىپ قالدىرىپ كەتكەن. ايازدا ءناجىس اراسىندا شىرىلداپ جاتقان شاقالاقتى جولاۋشىلار تاۋىپ الىپ، قۇتقارىپ العان ەدى.

وسى وقيعادان سوڭ قاتىگەز انا سوتتالىپ، تاستاندى ءسابي بالالار ۇيىنە ورنالاستىرىلعان. بيىل ءبىر جاسقا تولعان جانسايانىڭ ءحالى جاقسى، وعان اجەسى ءجيى-جيى كەلىپ تۇرادى ەكەن.

ءبىراق، وسى كۇنگە دەيىن زەينەتكەرگە نەمەرەسىن قامقورلىعىنا الۋ مۇمكىن بولماپتى.

ماليكا دۇيسەيەۆا، مامانداندىرىلعان بوبەك ءۇيىنىڭ پەدياتورى:

-اناسى انالىق قۇقىنان ايىرىلعان جوق. ول جاعىن ەندى سوت شەشەدى. باۋىرىنا باسا ما، جوق پا سول جاعىن شەشۋى كەرەك. ال، اجەسى بالانى كورۋگە اپتاسىنا بىر-ەكى رەت كەلىپ تۇرادى.