قازاقستانداعى  تۋركود جۇيەسىن ءالى دە جەتىلدىرۋ كەرەك.  مۇنداي پىكىردى  قازاقستان تۋريستىك  اگەنتتىكتەر قاۋىمداستىعىنىڭ پرەزيدەنتى اسەل نۇركەبايەۆا ءبىلدىردى. 

مامانداردىڭ اتۋىنشا، اتالعان جۇيە تۋريستەرگە عانا ەمەس، بانكتەر مەن تۋريستىك وپەراتورلاردىڭ وزدەرىنە تۇسىنىكسىز بولىپ وتىر. «مەنىڭ ويىمشا، تۋركودتى ەنگىزۋدىڭ  قاجەتتىلىگى جوق ەدى.  حالىقتىڭ تۇسىنىگى ءار ءتۇرلى. تۋريستەر زاڭدا كورسەتىلگەن جارتى ايلىق ەسەپتىك كورسەتكىشتى تولەۋمەن قاتار،  قوسىمشا تولەمدى  قولداماۋى مۇمكىن.  زاڭدا دا، تۋركودتى ەنگىزگەن «تۋريستىك قامقور» قورىنىڭ  قاۋلىسىندا دا  ول تۋرالى ايتىلماعان»،- دەيدى ول.

ايتا كەتەيىك،  11 ساننان تۋراتىن تۋريستىك كود 2016 جىلدىڭ 7 قاراشاسىندا ەنگىزىلدى. كودتى ساتىپ الۋ قۇنى  1060 تەڭگەنى قۇرايدى. ەگەر ساياحات جولداماسىن ساتقان اگەنتتىك  «تۋريستىك قامقور» قورىنا تىركەلگەن بولسا، وندا تۋركود اۆتوماتتى تۇردە  ساتىپ الۋعا تۋرا كەلەدى. جانە  جولدامانى ساتىپ العان ادام تۋرالى بارلىق اقپارات «تۋريستىك قامقور» قورىنىڭ سايتىنا (fondkamkor.kz) تىركەلەدى. شەتەلدە توسىن جاعداي بولىپ قالسا،  اتالعان قوردان قوسىمشا كومەك الۋعا قۇقى بار. ال كومەك «تۋريستىك قامقور» قورىنا جينالعان قارجى ەسەبىنەن كورسەتىلەتىن بولادى. 

الايدا، قازاقستان تۋريزم قاۋىمداستىعىنىڭ پرەزيدەنتى  راشيدا شايكەنوۆانىڭ ايتۋىنشا، تۋركودتى الۋ  بارىنە بىردەي  مىندەتتى ەمەس.  «قازىرگى تاڭدا كوپ تۋريستەر  اۋە بيلەتتەرىن وزدەرى ساتىپ الىپ، ءقوناقۇيدى ونلاين تاڭدايدى.  ال ولاردى  تۋركود الۋعا  مىندەتتەمەۋگە  ەشكىمنىڭ قۇقى جوق. تۋركود تەك تۋريستىك وپەراتورلار ارقىلى تۋر ساتىپ الاتىنداردىڭ قاۋىپسىزدىگىن قامتاماسىز ەتۋ ءۇشىن جاسالىپ وتىرعان شارا،»- دەدى شايكەنوۆا.

مالىمەتتەرگە سۇيەنسەك،  ءقازىر قورعا 40 تۋركومپانيا تىركەلىپ، 180 ميلليون تەڭگە قارجى جينالعان.  ايتا كەتەيىك، «تۋريستىك قامقور» قورى تۋريستەردىڭ قۇقىن قورعاۋ ماقساتىندا قۇرىلعان.