“I am a Singer” جوباسىنىڭ ءتورتىنشى كەزەڭىندە ديماش قۇدايبەرگەنوۆ گونكونگتىق ءانشى ءارى اكتەر دجەكي چۋننىڭ تانىمال ءانىن جۇڭگو تىلىندە ورىندادى، دەپ حابارلايدى قازاقپارات قىتايداعى «سينحۋا» اگەنتتىگىنە سىلتەمە جاساپ.
ەل اراسىندا دجەكي چۋندى «كىشكەنتاي دجەكي چان» دەپ اتاپ كەتكەن.

«تىنباي جاتتىققانىنىڭ ارقاسىندا ديماش ءاندى جۇڭگو ءتىلىنىڭ سەگىزىنشى دەڭگەيىندە (HSK دەڭگەيىن تەكسەرۋگە ارنالعان بىرەگەي ەمتيحان) ورىندادى»، – دەپ جازادى جۇڭگو باسىلىمى.

قىتايلىق جۋرناليستەر ديماشتىڭ كەزەكتى وبرازىنىڭ دا وتە تارتىمدى بولعانىن اتاپ وتكەن. ەۋروپالىق ۇلگىدەگى V-كەسكىندى پيدجاك پەن وعان ۇيلەسىپ تۇرعان جىبەك شارف. ال قارا ءتۇستى باس كيىم ونىڭ رەڭىن ودان سايىن اشا ءتۇستى.

زالدا وتىرعان كورەرمەندەر جۇڭگو جۋرناليستەرىنە ديماشتىڭ جۇڭگو ءانىن ورىنداۋىنا قاتىستى ءوز ويلارىن ايتىپ، جوعارى باعالاعان. ولاردىڭ ايتۋىنشا، ديماش ۇلكەن ساحنادا العاش رەت جۇڭگو تىلىندە ءان سالعانىنا قاراماستان، تاعى دا ءبىر رەت ءوزىنىڭ كاسىبيلىگىن دالەلدەدى. تىڭدارماندار ديماش ءاندى جۇڭگو ءتىلىنىڭ 8ء-شى دەڭگەيىندە (جوعارى دەڭگەي) ورىنداعان دەپ باعا بەردى.
ال ديماش ءوزىن بارىنشا سەنىمدى ۇستاعانىمەن، ساحناعا شىقپاس بۇرىن قاتتى قوبالجىعانىن جانە بارىن سالعانىن ايتىپ بەردى. ديماش العاشقى ەكى كەزەڭنىڭ بىرىندە ءدال وسى جۇڭگو ءانىن ورىنداعىسى كەلگەن ەكەن. الايدا قازاق ءانشىسى ءتىلدىڭ ايتىلۋىندا اعاتتىق جىبەرىپ الامىن با دەپ قورىققانىندىقتان ونى كەيىنگە قالدىرعان.

“مەن ءان ايتا باستاعان كەزدە تىڭدارماندار ءسوزدىڭ ماعىناسىن تۇسىنبەي قالا ما دەپ قورىقتىم”، – دەيدى ديماش جۇڭگو اگەنتتىگىنە بەرگەن سۇحباتىندا.

“قىسقى ۋنيۆەرسيادا اشىلۋىنا قاتىسسا دا، ديماش ءار ءساتتى قالت جىبەرمەي، جۇڭگو ءتىلىن وقي بەردى. جۇڭگو ءتىلى مۇعالىمىمەن ساحنادا دا، ساحنادان تىس تا كوپ دايىندالدى. دايىندىق كەزىندە زالدا وتىرعان كورەرمەندەردىڭ پىكىرىنە دە زەر سالىپ وتىردى. ءبىر سوزبەن ايتقاندا، ديماش قاتتى تىرىستى، جانىن سالدى”، – دەپ جازادى “سينحۋا”.

ديماش نە سەبەپتى دجەكي چۋن حوك-ياۋدىڭ «كۇزگى مۇڭ» اتتى ءانىن تاڭداعانىن بىلايشا ءتۇسىندىردى:

“العاش تىڭداعان ساتتە-اق ول ءان ماعان قاتتى ۇناپ قالدى. ءاننىڭ ماعىناسى دا جاقسى”.

ايتا كەتەيىك، “I am a singer” جوباسىنىڭ ءتورتىنشى كەزەڭىنىڭ ءتۇسىرىلىمى 2 اقپاندا بولىپ ءوتتى. ەفيردەن ول  11 اقپاندا ساعات 20:30-دا كورسەتىلەدى. شامامەن وسى ۋاقىتتا ديماشتىڭ جۇڭگو تىلىندە ورىنداعان ءانىنىڭ ۆيدەوسى پايدا بولادى.

ايتا كەتەىن جايت، اتالعان ءاندى وسى جوبادا 2013 جىلى قىتايلىق ءانشى شا باوليان ورىنداعان.

تۋىندى ماحاببات پەن ايىرىلىسۋ جايىندا.

“ءۇنسىز ۋادەڭدى ەستە ساقتاعىنىڭدى قالايمىن، مەن جالعىزدىقتان قورىقپايمىن، تەك سەن جالعىز قالا ما دەپ ۇرەيلەنەمىن”، – دەيدى ءان ءماتىنى.

“كۇزگى مۇڭنىڭ” اۆتورى ءارى العاشقى ورىنداۋشىسى دجەكي چۋن حوك-ياۋ (Jacky Cheung) ءقازىر 55 جاستا. ونىڭ ءان الەمىندەگى اتاق-ابىرويى 1984 جىلعى ءان بايقاۋىنان كەيىن شارىقتادى.