1. قوس بايتەرەك
احمەت بايتۇرسى ۇلى مەن
ءمىرجاقىپ دۋلات رۋحىنا.
اۆتور.
احاڭ، جاقاڭ — ءبىرىن-بىرى تولىقتىرعان تۇلعالار،
ەكەۋىنىڭ جانىن جەگەن كوزدەرىندە مۇڭ دا بار…
ۇلت جولىندا قاجىماستان ەڭبەك ەتكەن ەكەۋى،
ەكەۋى دە لاپىلداعان جانىپ تۇرعان وت ەدى.
جول باستاعان الاشىنىڭ سەركەلەرى بولاتىن،
قاي جاعدايدا ۇلتپەن ءوسىپ، ۇلتپەن بىرگە تولاتىن.
احاڭ ۇلتىن ۇيقىداعى "ماسا" بولىپ شاعاتىن،
جاقاڭ بولسا، "ويان، قازاق!" دەپ ءبىرىنشى شاباتىن.
ەكى تۇلعا شىن مانىندە – تىرەۋى ەدى ۇلتىنىڭ،
ال جاۋلارى ەكەۋىنە دايارلاعان مىلتىعىن.
احاڭ بولسا، قازاعىنىڭ الىپپەسىن جاسادى،
جاقاڭ بولسا، اق جۇرەگىن ءوز ۇلتىنا اشادى.
ۇشان-تەڭىز بولاتىن-دى ەكەۋىنىڭ ءبىلىمى،
قاي زاماندا قادىر تۇتقان ۇلى عانا — ۇلىنى!
ەكەۋى دە — ءوز ۇلتىنىڭ ازاتتىعىن كورمەدى،
ەشقاشان دا قولدارىنان ۇلت نامىسىن بەرمەدى.
ارمان ەتتى ۇلى ويلارىن بارشا تۇرىك حالقىنىڭ،
تۋى بولدى ەكەۋى دە ۇلتتىق عۇرىپ-سالتىنىڭ.
كوك تۇرىكتىڭ ساربازدارىن ەكەۋى دە ۇلگى ەتتى،
ۇلت جولىندا بۇل پانيدەن ەكەۋى دە بىرگە ءوتتى.
قايدا بولسا قۇتىلماعان جەندەتتەردىڭ تورىنان،
ەكى بوزداق ءولتىرىلدى قىزىلداردىڭ قولىنان.
ولار ءولدى، ءبىراق ۇلتى امان جەتتى بۇگىنگە،
ۇيقتاپ جاتىر ەكى بوزداق قوس بايتەرەك تۇبىندە…
ءبىزدىڭ قازاق ءبىلىپ ايتقان: "تەكتى،-دەيدى، - تەكتىنى!"،
ۇلت قولىندا جەلبىرەيدى كوك تۇرىكتىڭ كوك تۋى!!!
2. انت
سالتىمدى ساقتايمىن،
انتىمدى ساتپايمىن،
ءوزىمدى ساقتايمىن،
حالقىمدى ساقتايمىن!
ۇلتىمدى ساقتايمىن،
تۇركىمدى ساقتايمىن،
قانداي ءبىر داۋىلدان
جۇرتىمدى ساقتايمىن.
ۇلت ءۇشىن مۇزدايمىن،
ۇلت ءۇشىن سىزدايمىن،
كەلسە دە نە زاۋال
سەرتىمدى بۇزبايمىن.
ماقساتقا جەتەمىن
جالعىزبىن، جەكەمىن…
قانشا ءومىر قالسا دا
بەرىك بوپ وتەمىن.
ءتۇرى وسى جايىمنىڭ،
بۇرقانسام – داۋىلمىن.
ۇلت ءۇشىن كەز كەلگەن
كۇرەسكە دايىنمىن.
مەن شىنداپ انت بەرەم،
دەمەيمىن جالت بەرەم،
كۇن كەشەم ولگەنشە
قازاقي سالتپەنەن.
ادالمىن — وزىمە،
ادالمىن — سوزىمە،
سەنبەسەڭ قاراشى،
وت شاشقان كوزىمە؟!
وتىرىك ايتپايمىن،
مەن تىنىش جاتپايمىن،
وسى العان بەتىمنەن
ولسەم دە قايتپايمىن.
الدىمەن — اداممىن،
جاقسىمىن، جامانمىن،
ءسوز بەردىم، بەرگەن سوڭ
انتىما ادالمىن!!!
3. الاشتىڭ ارداگەر ۇلدارى
جانىمدى قوياتىن جىرلاتىپ،
كۇيىمدە ۇلتتىق اۋەن بار.
ءاليحان، احمەت، ءمىرجاقىپ،
مۇستافا، ماعجان، حالەل بار…
ۇلتى ءۇشىن كۇرەسكەن تۇلعالار،
سولارمەن مەن شىنداپ ماقتانام!
ۇلتىمەن قاشان دا بىرگە ولار،
قايدا دا مەن ولار جاق بولام.
قاپاستان قارمانىپ جول تاپقان
ال ولار — ۇلتىمنىڭ سەركەسى.
دىنىمە، تىلىمە شورقاقتار —
ۇلتىمنىڭ بۇگىنگى دەرتى وسى!..
مۇراتى — ۇلتى ءۇشىن بىرگە ءولۋ،
وزىمە ۇلگى ەتەم ولاردى.
ۇلتى ءۇشىن كۇرەستى ۇيرەنۋ
سولاردان باستالعان جول الدى.
قازاقتىڭ ارى مەن نامىسى
شوق جۇلدىز – الاشتىق ەرلەرىم!
قازاقتىڭ ءبىرتۋار ارىسى
سولارداي ەرلەردى كورمەدىم!
اداسسام — جول تاپپاي تۇماندا
سولارعا تۇزەيمىن بەتىمدى.
سولارداي قاسقايىپ تۇرام دا
كەسسە دە جاۋلارىم ەتىمدى.
ولارعا بەرىلگەن تۇتاستاي
سەرتىمنەن ەشقاشان تايمايمىن!
ولارمەن مىنە، مەن ، قاندايمىن،
گۇل بولىپ شاتتانىپ، جاينايمىن!
جۇرە الام ەشكىمنەن تىعىلماي
سوزىمدە تيتتەي دە جالعان جوق!
الاشتىڭ ارداگەر ۇلىنداي
ۇلتىمدى سۇيە السام — ارمان جوق!
سولارعا ەلىكتەپ وتەمىن
از عانا عۇمىرىم جەتكەنشە.
تاڭداعان ءوز جولىم — توتە بۇل
جەك كورسىن جاۋلارىم، جەك كورسە!..
سولارداي مەن دە ۇلمىن الاشقا
ۇلتىما، تەگىمە ادالمىن.
ۇقسايمىن مەن ەمەن اعاشقا
شايقالتپاس داۋىلى زاماننىڭ.
قولداعى تۋىمسىڭ جىعىلتپاس
سەندەرسىڭ، ۇلتىمنىڭ مۇڭ-زارى.
سەندەردى بۇل ۇلتىڭ ۇمىتپاس
الاشتىڭ ارداگەر ۇلدارى!!!
