10 تامىز قازاقتىڭ ءبىرتۋار ۇلى، كورنەكتى مەملەكەت جانە قوعام قايراتكەرى، ءىرى ۇيىمداستىرۋشى-باسقارۋشىنىڭ، بۇرىنعى مينيسترلەر كەڭەسىنىڭ ءتوراعاسى، سوسياليستىك ەڭبەك ەرى بايكەن ءاشىموۆتىڭ تۋعانىنا 100 جىل، دەپ حابارلايدى Qamshy.kz اقپارات اگەنتتىگى اقمولا وبلىسىنىڭ ىشكى ساياسات باسقارماسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

ونىڭ ومىرگە كەلگەن ۋاقىتى ەلىمىز ەڭ كۇردەلى جاعدايلاردى باستان وتكەرىپ جاتقان كەز - 1917 جىلمەن تۇسپا-تۇس كەلەدى.

تۋعانىنا التى اي تولار-تولماستان اياق استىنان ونىڭ اكەسى ءاشىم اۋىرىپ، قايتىس بولعان. ءبىراز ۋاقىت وتكەن سوڭ، تۋىستارى اناسىن امەڭگەرلىك سالتى بويىنشا اكەسىنىڭ ىنىسىنە تۇرمىسقا بەرەدى. قابدوللا اعاتايى بايەكەن اعامىزدىڭ ناعىز تىرەگى، قولداۋشىسى، ءارى ومىرلىك تالىمگەرى بولا بىلگەن.

اتا-اناسىنىڭ  ايتۋى بويىنشا، ون بەس جاسىندا، 1932 جىلى، تۇڭعىش رەت تۋعان ۇيىنەن جىراققا اتتانادى. اۋىل مەن كوكشەتاۋدىڭ ارالىعى 150 شاقىرىم. جاياۋلاتىپ بىرنەشە كۇن ءجۇرىپ، اقىرى قالاعا جەتەدى. بۇل جايلى اعامىز: «كىم بىلەدى، ولاردىڭ شەشىمى بولماسا، مەنىڭ تاعدىرىم قالاي قالىپتاسار ەدى، مەنىڭ ءتىرى ءجۇرۋىم مۇمكىن بە ەدى...» دەگەن.

قازاق ءۇشىن تۋىستىق قاتىناستار – قاسيەتتى سەزىم. كوكشەتاۋدا جاماعايىن اعايىندارى تابىلىپ،  جاس بايەكەن اعامىزعا پەتروپاۆل قالاسىنا بارۋعا، تەمىرجول فزو مەكتەبىنە ورنالاسۋعا كومەكتەسەدى. وندا وقۋشىلارعا كۇنىنە 800 گرامم نان مەن ءبىر رەت ىستىق تاماق بەرىلگەن. اۋىلدا كورگەن اشارشىلىقتان كەيىن فابريكا-زاۋىتتىق ۋچيليششە وعان ناعىز پەيىشتىڭ جۇماعىنداي كورىنەدى.

تەك ءبىر قيىندىق - ول ورىس ءتىلىن بىلمەگەن. مۇلدەم بىلمەگەن. ءبىراق ورىس بالالارمەن ارالاسىپ ءجۇرىپ، اقىرى، ۇيرەنگەن. بىرتە-بىرتە وقۋ مەن جازۋدى دا ۇيرەندى...

وقۋىن اياقتاپ، پاروۆوز جوندەۋشى سلەسار ماماندىعىن السا دا، تەمىر جولدا جۇمىس ىستەمەگەن. ءوز ءىسىنىڭ ناعىز شەبەرى بولعىسى كەلەتىن ءۇمىتى ونى اۋىل شارۋاشىلىعى تەحنيكۋمى بار پوكروۆكاعا جەتەلەگەن. وندا ەكى جىل وقىعان سوڭ، 1938 جىلى اسكەر قاتارىنا شاقىرىلىپ، كييەۆ ەرەكشە اسكەري وكرۋگىندە اسكەري قىزمەتىن اتقارادى. ال 1939 جىلى گيتلەرلىك گەرمانيا ەكىنشى دۇنيەجۇزىلىك سوعىستى پولشاعا شابۋىلىنان باستاعاندا باتىس ۋكراينا مەن باتىس بەلورۋسسيانى بوساتۋ بويىنشا وپەراسيالارعا قاتىسقان.

ەلگە ورالىپ، ايىرتاۋ اۋدانىندا اسكەري دايىندىقتان ساباق بەرىپ جۇرگەن كەزىندە سۇيگەن جارى عانا ەمەس، دوسى، سەنىمدى سەرىگى بولا بىلگەن باقىت اپايىمىزدى كەزدەستىرەدى. جاڭا تانىسىپ، سەزىمدەرىن بىلدىرە باستاعان كەزدە 1942 جىلدىڭ 9 شىلدەسىندە بايكەن ءاشىموۆتى قىزىل اسكەر قاتارىنا قوسىلۋعا شاقىرتۋ كەلەدى. پراگا بەكىنىسىندەگى ۇرىستا ءجۇرىپ قاتتى جارالانعان اعامىز ون اي بويى گوسپيتالدا جاتقان.

ءوزىنىڭ ەڭبەك جولىن ساۋمالكولدە باستاعان بايكەن اعامىز قاراعاندىعا قىزمەت بابىمەن اۋىسىپ، سول جەردە جاس مەتاللۋرگ نۇرسۇلتان نازاربايەۆپەن تانىسادى. زەينەتكەرلىككە شىققان شاعىندا ەلىمىزدە بولىپ جاتقان وقيعالاردى مۇقيات باقىلاپ، قالام تەربەگەن ساتتەرى دە بولعان.

قازاقستان تاۋەلسىزدىك الىپ، ءوز پرەزيدەنتىن سايلاعاندا، ءاشىموۆ نۇرسۇلتان نازاربايەۆتىڭ ەلدىڭ ەكونوميكاسىن، تۇراقتىلىق جانە ۇلتارالىق كەلىسىمنىڭ، قازاقستاندىق قوعامدى نىعايتۋعا دەگەن تالپىنىسىن ءسوزسىز قولدادى. سونىمەن قاتار استانانى الماتىدان كوشىرۋدى قولداپ، پرەزيدەنتىمىزگە باتا-تىلەگىن بەرەدى.

قازاقستاننىڭ جارقىن بولاشاعىنا سەنگەن جانە ءومىرىنىڭ سوڭعى كۇندەرىنە دەيىن ەلدىڭ اماندىعىن تىلەۋمەن بولعان بايكەن ءاشىموۆتىڭ تىلەگى قابىل بولعانىنا سەنىمدىمىز.