الماتى قالاسى كاسىپكەرلەر پالاتاسىنا بيزنەسمەندەر قالانىڭ قۇرىلىمدىق كوركىن جاڭعىرتۋدان زارداپ شەگىپ وتىرعانىن ايتتى، دەپ جازادى Qamshy.kz اقپارات اگەنتتىگى. 

قالا تۇرعىندارىنا 1969 جىلدان بەرى تانىس بولعان «ۆوسحود» ساۋدا ءۇيىنىڭ ديرەكتورى يۋريي كوۆتۋن بۇگىندە دۇكەن بىرتە-بىرتە شىعىنعا ۇشىراپ وتىرعانىنا شاعىمداندى. ساۋدا جاعى وتە تومەن. سوڭعى 3 ايدا جالعا الۋشىلاردىڭ 17% باس تارتقان.

«ماسەلەنىڭ بارلىعى ءبىزدىڭ عيماراتتىڭ جانىنا ۆەلوسيپەد جولاعى جاسالعاننان باستالدى. كولىك قوياتىن ورىن جوق. كليەنتتەردىڭ كەلۋى كۇرت تومەندەدى. ءبىز اكىمدىكتەن ەڭ بولماعاندا جولدىڭ ارعى بەتىنەن اقىلى اۆتوتۇراق جاساۋعا ءوتىنىش بىلدىردىك. ءبىراق كەلىسپەدى. ءبىز قالانىڭ اباتتاندىرىلۋىنا قارسى ەمەسپىز. ءبىراق بىزدە قانشا ادام ۆەلوسيپەد تەبەدى؟!» - دەپ شاعىمداندى يۋريي كوۆتۋن.

«كورەيا» كافەسىنىڭ يەسى نەللي نيگاي «توقتاۋعا بولمايدى» بەلگىسىنىڭ كەسىرىنەن ءدامحاناعا كەلۋشىلەر سانى ازايعانىن، ءتىپتى عيماراتتى ساتا دا الماي وتىرعانىن جاسىرمادى. تابىس 30%-عا تومەندەگەن. قىزمەتكەرلەردىڭ جارتىسى جۇمىستان شىعارىلدى. ال «ماقپال» رەسپۋبليكالىق ءسان ورتالىعىنىڭ جەتەكشىسى بازيليا ءابىلمانوۆانىڭ ايتۋىنشا ءبىرىنشى توپتاعى مۇگەدەك قىزمەتكەر جۇمىستان شىققان، سەبەبى ونىڭ جۇمىسقا قاتىناۋى قيىنداعان.

كاسىپكەرلەر پالاتاسىنا وسىنداي ماسەلەمەن بيزنەستىڭ 95 سۋبەكتىسى شاعىمداندى. ماسەلە كاسىپكەرلەردىڭ قۇقىعىن قورعاۋ كەڭەسىنە شىعارىلىپ، جيىنعا زارداپ شەكككەندەر دە شاقىرتىلدى، سونداي-اق جەرگىلىكتى اتقارۋشى ورگاننىڭ وكىلدەرى دە كەلدى. شاعىمدانعان كاسىپكەرلەردىڭ الدىندا الماتى قالاسى ىشكى ىستەر دەپارتامەنتى اكىمشىلىك پوليسيا باسقارماسىنىڭ باسشىسى جاندوللا شايحييەۆكە جاۋاپ بەردى.

«الماتىدا 530 مىڭ كولىك قۇرالى بار. سونىمەن قاتار سىرتتان كەلۋشىلەر، اسىرەسە وبلىستان قاتىنايتىندار بار. اۆتوكولىكتەر – اۋا لاستانۋىنىڭ باستى سەبەپشىسى. كاسىپكەرلەردى دە تۇسىنەمىز. اۆتوتۇراق جوباسىمەن ءبىز اينالىسپايمىز. بىزگە تەك كەلىسۋگە الىپ كەلەدى. ەگەر سايكەس كەلمەسە، كولىك قۇرالدارىنىڭ تۇراعىنا رۇقسات بەرە المايمىز. ەگەر قاندايدا ءبىر ۇيىم اۆتوتۇراققا قاتىستى ناقتى ۇسىنىس الىپ كەلسە، ءبىز بارىپ كورەمىز. باستىسى ۇسىنىلعان نۇسقا جول قوزعالىسىنىڭ باسقا دا قاتىسۋشىلارىنا كەدەرگى كەلتىرمەۋى ءتيىس»، - دەپ وي ءبولىستى جاندولا شايحييەۆ.

كاسىپكەرلەردىڭ قۇقىعىن قورعاۋ كەڭەسىنىڭ مۇشەلەرى جالپى العاندا قالا تۇرعىندارى اباتتاندىرۋدى قولدايتىندىعىن اتاپ ءوتتى. الايدا الماتى – شاعىن جانە ورتا بيزنەستىڭ قالاسى. مۇندا ءىرى كاسىپورىندار جوق. كاسىپكەرلەر تولەيتىن سالىق قالا بيۋدجەتىنىڭ نەگىزگى بولىگىن قۇرايدى. سوندىقتان اباتتاندىرۋعا قاتىستى شارالاردى بيزنەسپەن كەلىسۋ كەرەك.