ق ر ينۆەستيسيالار جانە دامۋ مينيسترلىگى ازاماتتىق اۆياسيا كوميتەتى ۇشاق ىشىندە ءتارتىپ بۇزعان جولاۋشىلارعا قانداي جازالار قولدانىلاتىنىن جاريالادى.

ۆەدومستۆودا ق ر اكىمشىلىك قۇقىق بۇزۋشىلىق تۋرالى كودەكسىنە سايكەس اۋە كەمەسىنىڭ بورتىندا ءتارتىپ ەرەجەلەرىن بۇزعان ادامدارعا قانداي شارالار قولدانىلاتىنى تۋرالى ينفوگرافيكا جاريالانعان.

«ماسەلەن، سالون ىشىندە ءجۇرىپ-تۇرۋعا، اۋە كەمەسىن اسپانعا كوتەرىپ نەمەسە جەرگە ءتۇسىرىپ جاتقان ۋاقىتتا تۇرىپ تۇرۋعا تىيىم سالىنادى. ەرەجەگە باعىنباعان جاعدايدا 3 اەك (ايلىق-ەسەپتىك كورسەتكىش) كولەمىندە ايىپپۇل سالىنادى. »، - دەلىنگەن كوميتەت حابارلاماسىندا. ال ۇشاق بورتىندا شىلىم شەككەن جولاۋشىعا 200 اەك كولەمىندە ايىپپۇل سالىنادى نەمەسە 15 تاۋلىككە دەيىن اكىمشىلىك تۇتقىنعا الىنادى»، - دەلىنگەن كوميتەت حابارلاماسىندا.

ەكيپاج مۇشەلەرى مەن جولاۋشىلاردىڭ ومىرىنە ءقاۋىپ ءتوندىرىپ نەمەسە ار-نامىسىنا تيەتىن ارەكەتتەرگە بارعان جولاۋشى دا 200 اەك كولەمىندە ايىپپۇل تولەيدى.

بۇعان قوسا اۋە كەمەسى بورتىندا وزگە جولاۋشىعا ءتىل تيگىزىپ، بالاعاتتاپ، قورقىتسا 10 اەك كولەمىندە ايىپپۇل سالىنادى نەمەسە 10 تاۋلىككە اكىمشىلىك قاماۋعا الىنادى.

ۇشاق ىشىندەگى مۇلىككە قاساقانا زالال كەلتىرۋ نەمەسە ونى اۋە كەمەسىنەن الىپ كەتۋ ارەكەتتەرىنە 200 اەك ايىپپۇل نەمەسە 15 تاۋلىككە اكىمشىلىك تۇتقىنعا الىنادى.