قاراعاندى وبلىسىندا تاعى ءبىر ءۇي ءىشىنارا وپىرىلدى  دەپ حابارلايدى tengrinews.kz.

توتەنشە جاعداي قاڭتاردىڭ 27-نە قاراعان ءتۇنى قاراعاندى ماڭىندا ورنالاسقان اقتاس اۋىلىندا بولعان. كوۆىلنايا كوشەسى، 43-ۇيدە ورنالاسقان ەكىقاباتتى كوپپاتەرلى ءۇيدىڭ كىبەرىسىندەگى جەرتولەنىڭ قابىرعاسى وپىرىلعان. سالدارىنان ءۇيدىڭ تۇرعىندارىنا ۇلكەن ءقاۋىپ ءتونىپ تۇر.

توتەنشە جاعداي بولعان ءۇيدىڭ تۇرعىندارى ەۆاكۋاسيالاندى. ولار ۋاقىتشا جەرگىلىكتى حقكو-نىڭ عماراتىندا تۇرادى. ءبىراق ولاردىڭ كوبىسى بۇل ۇسىنىستان باس تارتىپ، تۋىستارى مەن كورشىلەرىنىڭ ۇيىنە بارعان. تۇرعىنداردىڭ ايتۋىنشا، قازىرگى ۋاقىتتا جەرتولەنىڭ وپىرىلعان بولىگى ۇلكەيىپ جاتىر.

"مەن وتباسىممەن وسى اپاتتى ءۇيدىڭ ءبىرىنشى قاباتىندا ءۇش بولمەلى پاتەردە تۇردىم. 26 قاڭتاردا تۇنگى ۋاقىتتا جەرتولەدەگى كوتەرگىش قابىرعا وپىرىلىپ كەتتى. ءبىراق ءبىز ونى بىردەن بايقامادىم، تەك تاڭەرتەڭ ايەلىم سونى كورسەتتى. ءبىراق ول بۇرىننان وپىرىلايىن دەپ تۇردى. ءبىز جەرگىلىكتى اكىمدىكتەگىلەرگە بىرنەشە رەت باردىق. كەيىن ءبىز توتەنشە جاعدايلار قىزمەتىندەگىلەر مەن باسقا دا ۆەدومستۆوداعىلاردى شاقىرتتىق. ءبىراق ەندى ءبىزدى ەۆاكۋاسيالادى. سۋ مەن جارىق جوق پاتەردە تۇرا تۇرۋدى ۇسىندى. ارينە، ءبىز باس تارتتىق. ءقازىر دوستارىمىزدىڭ ۇيىندە تۇرىپ جاتىرمىز"، - دەدى تۇرعىن تەمىربەك ماريزا.

سونداي-اق، ول پاتەردەن كەيبىر جيھازدار مەن قاجەتتى زاتتاردى الىپ كەتكەنىن ايتتى. تەمىربەك ماريزانىڭ ايتۋىنشا، پاتەرىندە جاقىندا عانا جوندەۋ جۇمىستارى جۇرگىزىلگەن. قابىرعا جەرتولەدەگى سۋدان وپىرىلىپ وتىر. تۇرعىندار سۋدى وزدەرى تارتىپ شىعارعان. ءقازىر ەندى ولار ساراپشىلاردان تۇرعىن ءۇيدىڭ جارامدىلىعى تۋرالى قورىتىندىنى كۇتىپ وتىر. ءبىراق تۇرعىندار پاتەرلەر جارامدى دەپ تانىلسا دا، ۇيلەرىنە قايتىپ بارۋعا قورقاتىندارىن ايتىپ وتىر.

"بۇل ۇيدە مەنىڭ ءۇش بولمەلى پاتەرىم بار. وندا كۇيەۋىممەن جانە ەكى بالاممەن تۇردىم. توتەنشە جاعدايدان كەيىن بىزگە قارتتار ۇيىنەن بولمە ۇسىندى، ءبىراق ءبىز باس تارتتىق. ءقازىر ۇلكەن ۇلىمنىڭ ەكى بولمەلى پاتەرىندە تۇرىپ جاتىرمىز. ۇلىمنىڭ وتباسىمەن بىرگە سەگىز ادام بولىپ تۇرىپ جاتىرمىز! مەن كۇندە اكىمدىككە بارىپ، پاتەر بەرۋلەرىن سۇرايمىن. ءبىراق ولار تەك ۋادە بەرىپ كەلەدى. ساراپشىلاردىڭ قورىتىندىسىن كۇتۋ كەرەكتىگىن ايتتى. ءۇيدى كىشكەنە جوندەگەن جاعدايدىڭ وزىندە ول جاقتا قالاي تۇراسىڭ؟ توتەنشە جاعداي تاعى دا قايتالانىپ، ادامدار قازا تابۋى مۇمكىن"، - دەدى تۇرعىنداردىڭ ءبىرى ناتاليا پاسەچۋك.

تۇرعىنداردىڭ ايتۋىنشا، بۇل ءۇي 1954 جىلى پايدالانۋعا بەرىلگەن. سول كەزدەن بەرى ءۇيدىڭ جەرتولەسى بىردە-بىر رەت جوندەلمەگەن. سوڭعى كەزدەرى جەرتولەنى ءتىپتى سۋ باسىپ كەتكەن. جەرگىلىكتى اكىمدىكتەگىلەر Tengrinews.kz تىلشىسىنە تۇرعىندارعا زاڭناما اياسىندا كومەك كورسەتىلەتىنىن ايتتى. ءبىراق ول ءۇشىن ساراپشىلاردىڭ ءۇيدىڭ جارامدىلىعىنا قاتىستى قورىتىندىسىن كەرەك.

"تۇرعىندارعا ۋاقىتشا ءۇي بەردىك. كەيبىرەۋلەرى ودان باس تارتتى. تۇرعىندارمەن كۇندەلىكتى سويلەسىپ جاتىرمىز، ولارعا نە قاجەت بولىپ جاتقانىن بىلەمىز. ولار بۇل جاعدايعا تۇسىنىستىكپەن قارادى. كومەك جايلى ايتاتىن بولساق، الدىمەن ساراپشىلاردىڭ قورىتىندىسىن كۇتەيىك"، - دەدى اقتاس اۋىلىنىڭ اكىمى قويشىباي سۇلەيمەنوۆ.

ەسكە سالايىق، 1 قاڭتاردا شاحتينسك قالاسىنداعى شاحان اۋىلىندا كەشكى ۋاقىتتا تۇرعىن ءۇيدىڭ ءبىر بولىگى وپىرىلىپ، 9 ادام قازا تاپقان بولاتىن. ولاردىڭ ۇشەۋى ەر ادام، ۇشەۋى ايەل، تاعى ۇشەۋى بالالار ەكەن. ال كەيىن اپاتتىڭ الدىن الا سەبەبى اتالعان ەدى