باتىس قازاقستان وبلىسى وڭىرىندە اتا-انا مەن بالانى، جالپى وتاندىق مەديسينانى الاڭداتىپ وتىرعان وزەكتى ماسەلە ول – بۇلدىرشىندەردىڭ سەرەبرالدى سال اۋرۋى (دسپ). باتىس قازاقستان وبلىسىندا اتالمىش دەرتكە 560 بالا شالدىققان. سەرەبرالدى سال اۋرۋى كەي نارەستەدە قۇرساقتا دامىسا، ەندى بىرەۋلەرىندە جۇرە پايدا بولادى.
وبلىستىق دەنساۋلىق ساقتاۋ باسقارماسىنىڭ باسشىسى قانات توسەكبايەۆتىڭ مالىمەتىنشە، بالالاردىڭ سەرەبرالدى سال اۋرۋىنا شالدىعۋىنا بىرنەشە فاكتورلار اسەر ەتەدى ەكەن. ەگەر ايەل ادام جۇكتىلىك كەزىندە ءار ءتۇرلى رەسپيراتورلى نەمەسە باسقا ينفەكسيالاردى جۇقتىرسا، شارانا ۋاقىتىنان بۇرىن دۇنيەگە كەلسە، قۇرساقتا ۇزاق ۋاقىت قاعاناق سۋىنسىز جاتىپ قالسا، جۇكتىلىك پەن بوسانۋ پروسەسى اۋىر وتسە، اياعى اۋىر كەلىنشەك جۇكتىلىكتىڭ العاشقى مەرزىمىندە جۇيكەگە اسەر ەتەتىن فاكتورلاردى باستان وتكىزسە وندا اتالمىش كەسەل دۇنيەگە كەلەر نارەستەدە پايدا بولۋى مۇمكىن. سونداي-اق شارانا قاعاناعىنىڭ سۋىن ەرتە جارىپ جىبەرىپ، تولعاق كەزىندە بالانىڭ باسى اناسىنىڭ جامباس سۇيەگىنەن جاراقات السا، ءسابيدىڭ ورتالىق نەرۆ جۇيەسى زاقىمدالعاندىقتان دەرت جۇرە پايدا بولماق. وسى جاعدايلاردا تۋىنداعان نەرۆ جۇيەسىنىڭ پاتولوگياسى اياق-قول ءپاراليچىنىڭ اۋىر تۇرىنە اكەلىپ سوعۋى مۇمكىن ەكەن. بۇل دەرتكە شالدىققان بالالار وبلىستاعى اۋرۋحانانىڭ نيەۆرولوگ دارىگەردىڭ ديسپانسەرلىك ەسەبىندە تۇرىپ، دارىلىك زاتتارمەن ەم الىپ، سونىمەن قاتار ەمدىك دەنە شىنىقتىرۋ، دەنە ىسقىلاۋ، فيزيولىق ەمدەرمەن قامتاماسىز ەتىلۋدە. دەرتتىڭ جەڭىل تۇرلەرىندە نارەستەلەرگە دەنە ىسقىلاۋ، فيزيولىق ەم جاساۋ ارقىلى جاعدايىن جاقسارتۋعا بولعانىمەن، ولاردىڭ تۇپكىلىكتى جازىلۋى مۇمكىن ەمەس ەكەن. مامانداردىڭ ايتۋىنشا، سەرەبرالدى سال اۋرۋىنىڭ ەمىنە مەديكامەنتوزدى ەمنەن بولەك ساۋىقتىرۋ ەمى دە كىرەدى ەكەن. ساۋىقتىرۋ جۇمىستارىن وبلىستىق كوپبەيىندى بالالار اۋرۋحاناسىنداعى 11 ساۋىقتىرۋ ورنى جۇرگىزەدى. سونىمەن قوسا دەنساۋلىق ساقتاۋ ماماندارى شىر ەتىپ دۇنيە ەسىگىن اشقان سابيلەرگە ورتان جىلىكتىڭ ۇرشىق باسى جانە جامباس بۋىندارىنىڭ ديسپلازياسى دياگنوزىنىڭ كوپ قويىلاتىنىن ايتادى. بۇعان اناسىنىڭ جۇكتى كەزىندە ءتۇرلى سىرقاتتارمەن اۋرۋى، جامباسپەن بوسانۋ، ەكولوگيالىق جاعداي، دۇرىس تاماقتانباۋ اسەر ەتەدى ەكەن. دەرتتى دەر كەزىندە ەمدەمەسە، بالا اياعىنىڭ كەمىستىگىنە، ءبىر اياعىنىڭ ەكىنشىسىنەن قىسقا بولۋىنا اكەلىپ سوعادى. ال ەمدەۋ ءۇشىن ورتوپەد دارىگەرلەر نارەستەنىڭ بۋىندارىن سىلاپ-سيپاپ، فيزيوتەراپيا جاساپ، ەمدىك ۇزەڭگى كيگىزەدى. سونداي-اق اتا-انالار دا نارەستە دۇنيەگە كەلگەن سوڭ، ونىڭ بۋىندارىنا ارنايى ماسساج جاساپ، قيمىلداتىپ وتىرۋى قاجەت.
گۇلىم اقاپ،
باتىس قازاقستان وبلىسى
پىكىر قالدىرۋ