كينكي پرەفەكتۋراسىنىڭ اڭىزى
تادجيما ەلىندەگى دجوۋگاحانا تاۋىندا يگاكي دەگەن ساراي بار. قاي پاتشادان قالعان ساراي ەكەنى بەلگىسىز، ايتەۋىر سوندا دجيندجيۋروۋ دەگەن سامۋراي تۇرعان ەكەن. ءوز زامانىندا يمپەراتورعا ادال قىزمەت ەتكەن داڭقتى سامۋراي بولىپتى. يمپەراتور دا دجيندجيۋروۋعا سەنىم ارتىپ، وعان ۇنەمى ءىرى ىستەردى تاپسىرادى ەكەن. دجيندجيۋروۋدى كورە الماعان وزگە سامۋرايلار «ءبىز تۇرعاندا بۇنى نەگە سونشا اسپەتتەيدى. بۇكىل داڭق تا، سىي-قۇرمەت تە دجيندجيۋروۋدىكى» دەپ ۇنەمى قىزعانىپ ءجۇرىپتى. سودان ولار بىرىنەن سوڭ ءبىرى يمپەراتورعا كىرىپ دجيندجيۋروۋدى جامانداي بەرىپتى. العاشىندا ولاردىڭ ءسوزىن تىڭداماعان يمپەراتور بىرتە-بىرتە دجيندجيۋروۋدىڭ ادالدىعىنا كۇمان كەلتىرە باستايدى. ءبىر كۇنى ءبىر سامۋراي يمپەراتورعا بارىپ:
— دجيندجيۋروۋ قازىناعا قول سالدى، — دەيدى.
يمپەراتور دجيندجيۋروۋدى دارعا اسۋدى بۇيىرادى.
دجيندجيۋروۋ «جاقسى، ءبىراق باسىمدى وزەنگە تاستا»، — دەيدى. ءسويتىپ، جازالانعان دجيندجيۋروۋدىڭ باسى تاكينويا وزەنىنە تاستالادى. ءبىراق ءبىر قىزىعى باس سۋعا باتىپ كەتپەي، اعىسقا قارسى جۇزگەنىن كورگەن جۇرتتىڭ تاڭقالىسىندا شەك بولماپتى. بىرەۋ تاس لاقتىرعان ەكەن. دجيندجيۋروۋدىڭ باسى كوزى باقىرايىپ، زور ەكپىنمەن ورگە قاراي ءجۇزىپ بارادى دەيدى. بۇل وزەن بىرنەشە اۋىلدان اعىپ وتەدى. باسى تاۋدان باستالادى ەكەن. سامۋرايدىڭ باسى تاۋداعى بۇلاققا دەيىن جەتىپ، جەتى كۇن بويى وزىنەن ءوزى اينالىپ تۇرىپ الىپتى دەيدى. سودان سول جەر ناناكامەگۋري (جەتى اينالىم) دەپ اتالاتىن بولىپتى. سەگىزىنشى كۇنى سامۋرايدىڭ باسى وويا دارياسىنا دەيىن اعىپ بارىپ، سۋدى ورلەي، ءداۋ تاستىڭ ۇستىنە شىعىپ، سارايعا تەسىلە قاراپ قالعان ەكەن. اساۋ تولقىندار ۇرسا دا باس ءمىز باقپاي تۇرىپ الىپتى. يمپەراتور سارايىنا تەسىلگەن تۇڭعيىق قارا كوزدەر كورگەن جۇرتتىڭ جۇرەگىن قان جىلاتىپتى. اۋىل حالقى ەڭىرەپ ءجۇرىپ سامۋرايدىڭ باسىن كاۆارا دەگەن جەرگە كومگەن ەكەن. دجيندجيۋروۋدىڭ كىناسىزدىگىنە كوزى جەتكەن يمپەراتور اح ۇرىپ، سامۋرايدىڭ قۇرمەتىنە گورين مۇناراسىن سالدىرىپتى دەيدى.
جاپون تىلىنەن اۋدارعان
شارافات جىلقىبايەۆا
