قۇتقار مەنى،جالعىزدىق
سەنەن وزگە ىزدەر دەيسىڭ كىم ءبىزدى،
جىلدار ءمۇجىپ تاۋىسقان سىندى جۇلدىزدى.
قاراڭعىلىق جەتىپ مىسىق تابانداپ،
كولەڭكەمەن قول الىسىپ ۇلگەردى.
وزگە اعىتقان تۇيمەسىندەي مەڭدىمنىڭ،
كوكجيەكتەن كولبەپ سۋسي بەردى كۇن.
جابىعادى جارتاستا وسكەن جاس تەرەك،
ءوز تامىرى تەسىپ ەنىپ ءوز ءدىڭىن...
سۇرتىلگەن مىڭ قۇرعاق بۇلتپەن ىسقىلاپ،
اسپانىمنان تۇسكەندەي بار قۇس قۇلاپ.
جالبىر - جۇلبىر جاپىراقتار اۋاعا
قول جايادى كۇمىس جارماق – شىق سۇراپ.
جارالى جىر جىلان – تۇنمەن ارباسىپ،
الاسۇردىم تابا الماي ايلا تۇك.
قۇتقار مەنى جالبىزىڭمەن، جالعىزدىق،
قاسىرەتتىڭ قازانىنا قايناتىپ.
سەكەم
جارىم، مەنى جابىقسىن دەگەنىڭ بە،
سوندىرمەشى شىراقتى، كەرەگى نە؟!
قايناعان قارا مايداي ءتۇندى بىرەۋ،
قۇيارداي اي – وجاۋمەن كومەيىمە!
ءتۇتىنى بەينە تۋعان جەردىڭ بۇلتى،
شىلىممەن اشىلار-اۋ مۇڭنىڭ قۇلپى.
كوتەرمە تەلەفوندى،
ونسىزداعى
قاپتاعان قۇلاعىما ءسوزدىڭ قۇرتى.
قيالىم قايدا مەنىڭ شىڭدى ارباعان،
شەكسىزدىكتەن شەڭگەلىم مۇڭ قارماعان.
دالاعا شىقپايىنشى،
مەن ءبىر پەندە
اق قاردان باسقاسىندا ءىزى قالماعان.
قالدىردىم تىم الىستا بار اسىلدى،
تاپپادىم سەنەن باسقا جاناشىردى.
تاستايىن تەمەكىمدى،
ورتەپ الىپ
جۇرمەيىن قارا مايداي قارا ءتۇندى.
تۇيىق ءالەم
سول الەم،
تۇيىق الەم...
جاردا كۇلىپ
تۇرامىز ادىرا قاپ ارمان - ءۇمىت.
كۇندەر كەيىن قاشادى،
وتىزىنشى
بىرەۋى السا باسىن ايعا ۇرىپ.
سول قالا، ول باياعى بۇرىشتامىز،
بۇرىشتان باسقا جەردى ۇمىتقامىز.
جانىمدى ەزدى - اۋ سىلبىراڭ دالامەن ءبىر،
جىلاعان جاپىراق– ەرنى جىرىق تامىز.
قۇم – قايعى جاس ءومىردىڭ ءورتىن كومىپ،
عاجاپ - اۋ،جىلدار بويى سەرپىلمەدىك.
جاڭا جىل وتشاشۋدان بەتى كۇيىپ،
كەتەدى ساتتە كارى كەمپىر بولىپ .
باراتقان اقساي باسىپ جونىنە ءبىر ،
جاڭالىق، ەي، جاڭالىق! ۇيىمە كىر.
تۇنشىعىپ جاتىرىم تاعى تىرمالانىپ ،
سول الەم،
تۇيىق الەم،
تۇيىق ءومىر...
التاي اڭىزى
اردا التاي مەن الماتىنىڭ اراسىن،
جالعاماساڭ قالاي تىنىم تاباسىڭ؟!
ءدوڭ باسىندا بۇعى تۇر ما،
جارتى ايمەن
ءمۇيىزىنىڭ كوبەيتىپ ءبىر سالاسىن؟!
اناڭ مەن تەك اق الەمدى كورەسىڭ،
سانا قايدا سەرگەلدەڭدى سەزەتىن؟
قاينار – كوزى ۇزىلسە دە اق بۇلاق،
قۇيىرىعى جوق كەسىرتكەدەي بەزەتىن!..
عاجايىپ بوپ كورىنسىن دەپ قارا ءتۇن،
جانارىڭا جۇلدىز سۋرەت سالاتىن.
سامال تەربەپ وتسە سىلقىم گۇلدەر دە،
شىق – مونشاعىن اۋىستىرىپ تاعاتىن.
تاستا وت شاشىپ تۇلپارلاردىڭ تاعاسى،
جان وتىم دا تۇتانعان - اۋ شاماسى.
جارتاستارعا ايعايلاساڭ،
ءۇنىڭنىڭ
جەتەر شاۋىپ كوپ جاڭعىرىق – بالاسى.
التاي!
التاي!
اڭىزداعى ءبىر ۇعىم،
شىڭعىرادى قۇرىق بۋناپ ق ۇلىنىڭ.
مەدەت تۇتام كورىپ كوكتەن جارتى ايدى،
كەر بۇعىمنىڭ ءمۇيىزىنىڭ سىنىعىن...
*****
بىرەۋدىڭ جولىن قۋىپ ءجۇرسىڭ دەمە،
جارالعان جۇرەك دارا دۇرسىلدەۋگە.
تۇيسىكتىڭ تولقىنى بوپ تىرىلگەنمىن،
تەڭىزگە كوكتەگى كۇن كۇرسىنگەندە.
پاكيزات ونەر سىيلاپ پاڭ بالاعا،
ءوزى سۇيرەپ كەلەدى ارمان العا.
كوكتەگەن كوڭىل گۇلىم ،
اڭساۋ دەيتىن
انامنىڭ ءسۇتى تامىپ اق دالاعا.
سۇلاتىپ سۇر دالاعا كارى قىستى،
ەمدەيمىن جانارتاۋىم جانىپ ىشكى.
كوپ جاتىپ جارتاستاردا،
كوكىرەگىمە
ءجۇز جىلدىق دالا جىرى جازىلىپتى.
قولتىققا تاسقا اينالعان تەڭدى قىسىپ،
تاۋلار ماعان ەرمەكشى ەنتىگىسىپ.
كىم ءبىلسىن قاشان توقتار ،
تويىمسىزداۋ
جۇرەگىم كەلە جاتىر جولدى جۇتىپ ...
******
بۇلت – مۇڭدى قاۋزاي بەرەمىن،
نوسەر بوپ ساتكە قۇيىلماي.
ءولدى عوي تالاي ولەڭىم،
اق پاراق – كەبىن بۇيىرماي.
كەتىپپىن تاس بوپ، بىلمەدىم،
مۇڭ شاعىپ ءجۇرىپ تاسقا دا.
جوعالدى بىرگە كىر دەيىن
دوستارىم سىڭگەن اقشاعا.
قايتاتىن قانداي قاقىم بار،
قالدىرىم ءبارىن الىستا.
عارىپ بوپ كەتەر اقىندار،
كەتەم دەپ ءجۇرىپ عارىشقا.
قاراۋسىز قالعان قالقادا،
جاتىر عوي جىرىم جوتەلىپ.
ءماز بولادى الاۋ ارقاعا،
الباستى – ءتۇندى كوتەرىپ...
*****
ەڭكەيەر شىبىق تابىلعان
سۇيمەك بوپ جەرىڭ ءار تاسىن.
جاتادى تاۋلار اۋىرعان
باستىرىپ بۇلتقا ارقاسىن.
جازادى ساعىم باسقا ەشكىم
تۇسىنبەس جىرىن استارلاپ.
جاعاعا كەلگەن اق تولقىن
كوتەرىپ قايتار باس بارماق.
اياسىنا اينا-باستاۋدىڭ
كەتەردەي سىيىپ عارىشىڭ.
شىرماۋىق ورلەر جاس تالدىڭ
جانىنىڭ سىيپاپ اعىسىن.
ارتىقتاي مىناۋ الاپتا،
بارادى ادام جولدا اعىپ.
ارقاسىن سۇيەپ اعاشقا
كولەڭكە وتىر ويلانىپ...
قالاۋ سالەمەتباي ۇلى
