وقو-دا جوعارى ساپالى «تۇركىستان» ماقتا سۇرىبى شىعارىلدى. مۇنداي جاڭالىق تۇركىستاندا ءداستۇرلى تۇردە وتەتىن «اق كەرۋەن» ماقتا تەرىمى شاراسى كەزىندە ايتىلىپ، جۇرتشىلىققا تانىستىرىلدى. وسىلايشا، قاراشىق اۋىلدىق وكرۋگىندەگى «تۇران» شارۋا قوجالىعىندا وتكەن جيىنعا كەلگەن قاتىسۋشىلار، الدىمەن، ماقتا القاپتارىن ارالاۋدان باستادى، دەپ حابارلايدى وقو اكىمدىگىنىڭ باسپا ءسوز قىزمەتى.

بيولوگيا عىلىمدارىنىڭ دوكتورى A.سۇلتانوۆ پەن اۋىل شارۋاشىلىعى عىلىمدارىنىڭ كانديداتى ءا.الييەۆ سورتتاردىڭ ەرەكشەلىكتەرى تۋرالى اڭگىمەلەپ بەردى. ەرەكشەلىگى سول، بۇل ماقتا تالشىعىنىڭ ۇزىندىعى كادىمگى سۇرىپتاعى ماقتاعا قاراعاندا الدەقايدا جوعارى. ياعني، «تۇركىستان» ماقتاسىنىڭ تالشىعى 4-ۇلگىگە جاتادى. ماقتانىڭ بۇل ءتۇرى توقىما ونەركاسىبىندە كەڭىنەن پايدالانىلادى. ەندى تۇركىستاندىق كاسىپكەرلەر وڭتۇستىكتەگى توقىما كاسىپورىندارىن جەرگىلىكتى شيكىزاتپەن قامتۋعا تولىق كەپىلدىك بەرە الادى.

تۇركىستاندىق ماقتاشىلار بيىل 17 مىڭ توننا ءشيتتى ماقتا جيناۋعا نيەتتى. قالا اكىمىنىڭ ورىنباسارى ت.مۇسايەۆتىڭ ايتۋىنشا، تۇركىستاندا وتكەن جىلى 3500 گەكتار جەرگە ماقتا ەگىلسە، بيىل بۇل كورسەتكىش 6600 گەكتارعا ۇلعايعان.

ال ماقتارالدىق ديقاندار بيىل 28 مىڭ گەكتار جەردەن 610 مىڭ توننا قاۋىن-قاربىز السا، سونىڭ 450 مىڭ تونناسىن شەت ەل نارىعىنا شىعارعان. بۇل گەكتارىنان 263 سەنتنەردەن ءونىم الىپ، وتكەن جىلمەن سالىستىرعاندا 25 سەنتنەرگە ارتىق قاۋىن-قاربىز جيناعان مىرزاشولدىكتەر باقشا داقىلدارىن وسىرۋدەن ورتا ازيانىڭ كوشباسشىسى ەكەندىگىن دالەلدەيدى.