قازاقستان رەسپۋبليكاسى پرەزيدەنتىنىڭ 2016 جىلعى 15 قاڭتارداعى №176 جارلىعىمەن دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسى بەكىتىلگەن دەپ جازادى Qamshy.kz اقپارات اگەنتتىگى.
مەملەكەتتىك باعدارلامانىڭ ماقساتى – مەملەكەتىمىزدىڭ الەۋمەتتىك ءال-اۋقاتى مەن ەكونوميكالىق وركەندەۋىنىڭ نەگىزى رەتىندە ازاماتتاردىڭ دەنساۋلىعىن ساقتاۋدىڭ ءتيىمدى جانە ورنىقتى جۇيەسىن دامىتۋدى قامتاماسىز ەتۋ.
العا قويىلعان ماقساتقا قول جەتكىزۋ ءۇشىن مەملەكەتتىك باعدارلامانىڭ نەگىزگى 7 باعىتى انىقتالدى:
1. حالىق دەنساۋلىعىن ساقتاۋدىڭ نەگىزى رەتىندە قوعامدىق دەنساۋلىق ساقتاۋدى دامىتۋ؛
- مساك-تى جاڭعىرتۋ جانە باسىمدىقپەن دامىتۋدىڭ نەگىزىندە بارلىق دەنساۋلىق ساقتاۋ قىزمەتتەرىن پاسيەنت مۇقتاجدىقتارى اينالاسىنا ينتەگراسيالاۋ؛
- مەديسينالىق قىزمەتتەردىڭ ساپاسىن قامتاماسىز ەتۋ؛
- ۇلتتىق دارى-دارمەكپەن قامتاماسىز ەتۋ ساياساتىن ىسكە اسىرۋ؛
- نيەتتەستىكتى ەندىرۋدىڭ نەگىزىندە دەنساۋلىق ساقتاۋ جۇيەسىن جەتىلدىرۋ جانە ونىڭ قارجىلىق تۇراقتىلىعىن ارتتىرۋ؛
- دەنساۋلىق ساقتاۋ سالاسىنداعى ادامي رەسۋرستاردى باسقارۋدىڭ تيىمدىلىگىن ارتتىرۋ؛
- مەملەكەتتىك-جەكە مەنشىك ارىپتەستىك، يننوۆاسيالار مەن قازىرگى زامانعى اقپاراتتىق-كوممۋنيكاسيالىق تەحنولوگيالاردىڭ نەگىزىندە دەنساۋلىق ساقتاۋ ينفراقۇرىلىمىن ودان ءارى دامىتۋدى قامتاماسىز ەتۋ؛
قازاقستان رەسپۋبليكاسى حالقىنىڭ دەنساۋلىق ساقتاۋ كورسەتكىشىنە شولۋدان باستاۋعا رۇقسات بەرسەڭىزدەر.
دەنساۋلىق ساقتاۋ اياسىنداعى مەملەكەتتىك باعدارلامانى ىسكە اسىرۋدىڭ ارقاسىندا سوڭعى ون جىلدا بارلىق نەگىزگى كورسەتكىشتەر وڭ ديناميكاعا يە بولىپ وتىر:
ادامنىڭ ءومىر ءسۇرۋ ۇزاقتىعى 6 جىلعا ۇزارتىلدى.
كۇتىلگەن ءومىر ءسۇرۋ ۇزاقتىعى 6 جىلعا ۇزاردى، جالپى ادام ءولىمى 27%-عا قىسقاردى، انا ءولىمى 4 ەسە تومەندەدى، ءسابي ءولىمى 1،6 ەسە، قاتەرلى ىسىك اۋرۋلارى 20%-عا، تۋبەركۋلەز اۋرۋىنان قايتىس بولعانداردىڭ سانى 5 ەسە ازايدى.
حالىقتىڭ دەنساۋلىعىن نىعايتۋ جانە ساقتاۋ ءۇشىن مينيسترلىك كەلەسى شارالاردى ىسكە اسىرۋدا.
حالىق دەنساۋلىعىن ساقتاۋدىڭ نەگىزى رەتىندە قوعامدىق دەنساۋلىق ساقتاۋدى دامىتۋ
دەنساۋلىقتى نىعايتۋ جانە اۋرۋلاردى الدىن الۋ بويىنشا ءتيىمدى جانە قولجەتىمدى تەتىكتەردى قۇرۋ ماقساتىندا قوعامدىق دەنساۋلىق قىزمەتى قالىپتاستىرىلدى.
وسى تەكتەس قىزمەت ايماقتاردا دا قۇرىلۋدا.
قدق قىزمەتىنىڭ نەگىزگى باعىتتارى – بۇل قولدانىستاعى ادىس-تاسىلدەر ارقىلى قازاقستان تۇرعىندارىنىڭ دەنساۋلىعىن قورعاۋ مەن نىعايتۋ، مۇددەلى مەملەكەتتىك ورگاندارمەن ۆەدومستۆوارالىق ءوزارا ارەكەتتەسۋدىڭ نەگىزىندە سالاۋاتتى ءومىر سالتىن ىنتالاندىرۋ (سانيتارلىق-ەپيدەميولوگيالىق، ەكولوگيالىق، ۆەتەرينارلىق قىزمەتى).
حالىقتىڭ سانيتارلىق-ەپيدەميولوگيالىق الەۋەتىن قامتاماسىز ەتۋ بويىنشا شارالار قابىلدانۋدا.
2017 جىلدىڭ 6 ايلىق قورىتىندىسى بويىنشا رەسپۋبليكا حالقىنىڭ اراسىندا 10 جۇقپالى اۋرۋ بويىنشا جاعداي تىركەلمەگەن، 12 نوزولوگيا بويىنشا ءبىرلى-جارىم جاعداي عانا تىركەلىپ وتىر، 2016 جىلدىڭ وسى تەكتەس كەزەڭمەن سالىستىرعاندا 26 جۇقپالى اۋرۋ بويىنشا دەڭگەيدى تومەندەتۋگە قول جەتكىزىلدى، ونىڭ ىشىندە قىزىلشا اۋرۋى 55 ەسە، تريحينەللەز 20 ەسە، مەنينگوكوكتىق جۇقپا 3،8 ەسە تومەندەتىلدى.
21 جۇقپالى اۋرۋعا قارسى تۇرعىندارعا ەكپە ەگۋ جۇمىستارى جۇرگىزىلۋدە. اعىمداعى جىلدىڭ وتكەن كەزەڭ بويىنشا رەسپۋبليكالىق بيۋدجەت ەسەبىنەن 2 ملن-عا جۋىق ادامعا (2337 241) ەكپە ەگىلدى.
47،5%-عا جۋىعى ەكپەمەن قامتىلدى. بۇل دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسىنا سايكەس كەلەدى. ەكپە ەگۋگە جاتاتىن 11557 ادام ەكپە المادى، ونىڭ ىشىندە 46%-ى ەكپەگە ءوزىنىڭ جەكە كوزقاراسى بويىنشا، 42%-ى ءدىني سەنىم بويىنشا، 8%-ى ەكپەگە سەنىمسىزدىك تانىتۋى بويىنشا، 4%-ى ب ا ق بەتتەرىندەگى جاعىمسىز اقپاراتتاردىڭ ناتيجەسىندە باس تارتقان.
ەكىنشى باعىت – مساك دەڭگەيىندە مەديسينالىق كومەك كورسەتۋ. مساك دامىتۋ مەن جاڭعىرتۋ، جەدەل مەديسينالىق جاردەمدى دامىتۋ، دەنساۋلىق ساقتاۋدىڭ بارلىق قىزمەتىن بىرىكتىرۋمەن ارنايىلاندىرىلعان مەديسينالىق كومەكتى دامىتۋ قاراستىرىلعان.
ەلىمىزدە جىل سايىن مساك دارىگەرلەرىنە 50 ملن-عا جۋىق ادام تىركەلەدى. ق ر 1 تۇرعىنىنا شاققاندا دارىگەرگە 3 رەت كىرۋ تىركەلىپ وتىر. ەكونوميكالىق ارىپتەستىك جانە دامۋ حالىقارالىق ۇيىمىنىڭ (ەادۇ) ەلدەرىندە بۇل كورسەتكىش 6،7-گە تەڭ.
مەديسينالىق كومەكتىڭ قولجەتىمدىلىگىن جانە ساپاسىن ارتتىرۋ جانە كەشەندىلىگىن قامتاماسىز ەتۋ ءۇشىن ەمدەلۋشىلەردىڭ مۇقتاجدىلىعى اياسىنداعى دەنساۋلىق ساقتاۋدىڭ بارلىق قىزمەتىن بىرىكتىرۋ ساياساتى جۇرگىزىلۋدە.
جالپى دارىگەرلىك تاجىريبەسىنىڭ كىشى ءتۇرىن دامىتۋعا باعىتتالعان مساك مودەلى مەن قۇرىلىمى قايتا قارالدى. ءبىر دارىگەردىڭ جۇكتەمەسىن ەادۇ ەلدەرىنىڭ دەڭگەيىنە دەيىن ازايتۋ ءۇشىن 2019 جىلى (1500-گە دەيىن) ەمxانالاردا مساك ۇلگىلىك قۇرىلىمدارى قاراستىرىلعان.
تىركەۋ قۇجاتتارىن ەنگىزۋ بويىنشا مساك مەديسينا قىزمەتكەرلەرىنىڭ جۇكتەمەسىن تومەندەتۋ ءۇشىن باستاپقى مەديسينالىق قۇجاتتاردىڭ نىساندارى بويىنشا وزگەرتۋلەر ەنگىزىلدى. ناتيجەسىندە ەسەپتىك نىساندار 30%-عا قىسقارتىلدى. قولعا العان شارا ايتارلىقتاي مساك ۇيىمدارىنداعى كەزەكتى مەديسينالىق قىزمەتكەرلەردىڭ جۇكتەمەسىن ازايتۋعا، قاعاز جۇزىندەگى قۇجات اينالىمىن قىسقارتۋعا مۇمكىندىك بەرەدى.
بۇگىنگى تاڭدا تەگىن مەديسينالىق كومەكتىڭ كەپىلدىك بەرىلگەن كولەمى اياسىندا تەگىن دارىلىك زاتتارمەن تمكمك شەڭبەرىندە جالپى 68،3 ملرد تەڭگە سوماسىندا مساك دەڭگەيىندە 2 ملن ديسپانسەرلىك ەم الۋشىلار قامتىلعان.
اعىمداعى جىلى دارىلىك زاتتار تەگىن تاراتىلاتىن اۋرۋدىڭ تىزىمدەرى كەڭەيدى.
بىردەن 3 ايعا دارىلىك زاتتاردى جازدىرىپ الۋدى جەڭىلدەتۋدىڭ ارقاسىندا تەگىن دارىلىك زاتتاردى الۋ ءۇشىن ەمxانالاردا دارىگەردىڭ قابىلداۋىندا كەزەكتە تۇراتىن پاسيەنتتەردىڭ ۋاقىتتارى ەدەۋىر ازايتىلدى.
تەگىن دارىلەردى اي سايىن بەرۋ سيرەك ۇشىراساتىن اۋرۋعا شالدىققاندار مەن قىمبات دارىلەر ءۇشىن ساقتالادى.
اۋرۋدىڭ بەس توبى بويىنشا بىرىكتىرىلگەن مودەل ەنگىزىلۋدە. بۇل وبلىس كولەمىندە مەديسينالىق كومەك كورسەتۋدىڭ ءۇش دەڭگەيى بويىنشا دەنساۋلىق ساقتاۋ مەكەمەلەرىن ۇلەستىرۋدى قاراستىرادى.
بىرىكتىرىلگەن مودەلدى ەنگىزۋ پاسيەنتتەردىڭ ءومىر ساپاسىن جاقسارتۋعا جانە وسى اۋرۋلار بويىنشا ءولىم-جىتىم جاعدايلارىن تومەندەتۋگە مۇمكىندىك بەرەدى.
رەسپۋبليكادا جەدەل جاردەم كورسەتۋدى جەتىلدىرۋ ماقساتىندا جەدەل مەديسينالىق كومەك قىزمەتىنىڭ ەكى دەڭگەيلى مودەلى قۇرىلاتىن بولادى.
جەدەل مەديسينالىق كومەكتىڭ ورتالىقتاندىرىلعان قىزمەتىنىڭ جاڭا مودەلى اقپاراتتىق قامتاماسىز ەتۋدىڭ ءبىرىڭعاي جۇيەسىمەن پاۆلودار مەن قىزىلوردا وبلىستارىندا قابىلداناتىن بولادى.
قر-دا كوپ ءپروفيلدى ستاسيونارلارداعى قابىلداۋ بولمەسىنىڭ جاڭا فورماتىن ەنگىزۋ جوسپارلانۋدا: ترياج-جۇيەسىن ەنگىزۋ، پاسيەنتكە باعدارلانعان تاسىلدەرىن ەنگىزۋ، قابىلداۋ بولمەلەردىڭ كادرلىق جانە ماتەريالدىق-تەحنيكالىق جابدىقتاۋلارىن قايتا قاراۋ.
ءۇشىنشى باعىتتىڭ شەڭبەرىندە – مەديسينالىق قىزمەت ساپاسىمەن قامتاماسىز ەتۋ مەديسينالىق كومەكتىڭ ساپاسىن باسقارۋدى جانە ستاندارتتاۋدى، دەنساۋلىق ساقتاۋدا اككرەديتاسيا مەن ليسەنزيا بەرۋدىڭ دامۋىن قاراستىرادى.
مەديسينالىق قىزمەتتىڭ ساپاسى جونىندەگى بىرىكتىرىلگەن كوميسسياسى قۇرىلدى.
2016 جىلى بىرىكتىرىلگەن باقىلاۋ كوميسسياسىندا دياگنوستيكا مەن ەمدەۋدىڭ 281 كلينيكالىق حاتتاماسى، 40 مەديسينالىق تەحنولوگياسى جانە مەديسينالىق كومەك كورسەتۋ ۇيىمىنىڭ 8 ستاندارتى ماقۇلداندى.
2017 جىلدىڭ 1 جارتى جىلدىعىندا دياگنوستيكا مەن ەمدەۋدىڭ 59 كلينيكالىق حاتتاماسى، 14 مەديسينالىق تەحنولوگياسى ماقۇلداندى.
انىقتاما: 59 كلينيكالىق حاتتاما: ىشكى مي قان قۇيىلۋى، تورلى قابىق استىنا قان قۇيىلۋى، ليكۆور اعۋى، جامباس سۇيەكتىڭ زاقىمدانۋى، تەكسەرىس ەندو پروتەزدەۋ بۋىنى، تەكسەرىس ەندو تىزە بۋىندارى، ومىرتقا دەفورماسيياسىنىڭ تۋا ءبىتۋى مەن جۇرە پايدا بولۋى، كرون اۋرۋى، ويىق جارالى كوليتى، جۇقپالى اۋرۋلار (يەرسينيوز، ديفتەريا، تريحينەللەز، ليامبليوز، ەنتەروۆيرۋستى ينفەكسياسى، تۋليارەميا، ستولبنياك) جانە ت.ب.
ستوماتولوگيالىق جانە وتورينولارينگولوگيالىق كومەكتى، اللەرگولوگيالىق جانە يممۋنولوگيالىق كومەكتى كورسەتۋدى ۇيىمداستىرۋ بويىنشا ستاندارتتار بەكىتىلدى.
حيرۋرگيالىق، نەوناتالدى حيرۋرگيالىق كومەكتى، جاق-بەت حيرۋرگيالىق كومەك كورسەتۋدى ۇيىمداستىرۋدىڭ ستاندارتتارى ازىرلەندى.
جىلدىڭ اياعىنا دەيىن 180 كلينيكالىق حاتتامانى جەتىلدىرۋ مەن ازىرلەۋ جوسپارلاندى، ونىڭ ىشىندە 98 جاڭا جانە 82 ەسكى كلينيكالىق حاتتاماسى، مەديسينالىق كومەك كورسەتۋدى ۇيىمداستىرۋدىڭ 8 ستاندارتى.
قازىرگى تاڭدا بىرىكتىرىلگەن باقىلاۋ كوميسسياسىن ءوزىن-وزى رەتتەيتىن ۇيىمعا كوشىرۋ بويىنشا جۇمىستار جۇرگىزىلۋدە. بۇل ءباتۋالاسۋدا كاسىبي قاۋىمداستىقتىڭ مەملەكەتپەن بىرلەسە شەشىم قابىلداۋعا مۇمكىندىك بەرەدى.
سونداي-اق، الداعى ۋاقىتتا ولارعا مەملەكەتتىك ورگانداردىڭ كەيبىر مىندەتتەرىن تاپسىرۋ جانە ىرىكتەۋ ءۇشىن بەكىتىلگەن ولشەمدەرگە سايكەس ولاردىڭ قىزمەتتەرىن باعالاۋ ماقساتىندا كاسىبي مەديسينالىق قاۋىمداستىقتى اككرەديتاسيالاۋ جۇمىستارى جۇرگىزىلۋدە.
قايتا رەتتەۋ شەڭبەرىندە ناقتى ورتاعا جانە ءوزىن-وزى رەتتەيتىن ۇيىمعا 14 مىندەتتى تاپسىرۋ جوسپارلانۋدا (اككرەديتاسيالاۋ، مەديسينالىق كومەكتى كورسەتۋدىڭ ستاندارتىن ازىرلەۋ، بىلىكتىلىك ەمتيحاندارىن وتكىزۋ جانە ت.ب).
ءتورتىنشى – ۇلتتىق دارى-دارمەكپەن قامتاماسىز ەتۋ ساياساتى.
وندىرۋشىلەرمەن تىكەلەي قارىم-قاتىناس ورناتۋ شەڭبەرىندە دارى-دارمەكتى ساتىپ الۋ ارتۋدا. بۇل ۇنەمدەلگەن قارجىنى قوسىمشا دارى-دارمەكتى ساتىپ الۋعا جولداۋعا مۇمكىندىك بەرەدى.
ءبىرىڭعاي ديستريبيۋتوردىڭ جالپى ساتىپ الۋدا وتاندىق وندىرۋشىلەردىڭ ۇلەسى تازا تابيعي ەسەپپەن 75%-دى، قارجىلاي ەسەپپەن 30%- دى قۇراپ وتىر.
اتالعان جولداۋداعى مەملەكەت باسشىسىنىڭ تاپسىرماسى نەگىزىندە دارى-دارمەكتىڭ باعاسىن مەملەكەتتىك رەتتەۋ بويىنشا زاڭنامانى جەتىلدىرۋ بويىنشا جۇمىستار باستالدى.
بەسىنشى باعىت – نيەتتەستىكتى ەندىرۋدىڭ نەگىزىندە دەنساۋلىق ساقتاۋ جۇيەسىن جەتىلدىرۋ جانە ونىڭ قارجىلىق تۇراقتىلىعىن ارتتىرۋ
الەۋمەتتىك مەديسينالىق ساقتاندىرۋدىڭ قورى قىزمەت ەتۋدە، بارلىق وڭىرلەردە ونىڭ بارلىق فيليالدارى قۇرىلدى جانە باسشىلارى تاعايىندالدى.
وزدەرىڭىزگە بەلگىلى، اعىمداعى جىلدىڭ 30 ماۋسىمىندا ءامسق جارناسى مەن اۋدارىمنىڭ مولشەرىن، ءامسق – نا جارنالارى مەملەكەت اۋداراتىن تۇلعالاردىڭ ءتىزىمىن انىقتاۋدى، سونداي-اق، ءامسق جارناسىن تولەۋشىلەردى، ءامسق اكتيۆتەرىن ساقتاۋ مەن قارجىلىق تۇراقتىلىقتى قامتاماسىز ەتۋدى قايتا قاراۋدى قاراستىراتىن زاڭ قابىلدانعان بولاتىن.
ءامسق ەنگىزۋدە قوعام ساناسىن دايىنداۋ مەن قالىپتاستىرۋ ماقساتىندا حالىق، جۇمىس بەرۋشىلەر، مەديسينالىق جۇمىسشىلار اراسىندا كەڭىنەن ءاقپاراتتىق-تۇسىندىرۋ جۇمىستارى جالعاسۋدا.
6 باعىت – دەنساۋلىق ساقتاۋ سالاسىنداعى ادامي رەسۋرستاردى باسقارۋدىڭ تيىمدىلىگىن ارتتىرۋ.
حالىقتىڭ دارىگەرلەرمەن قامتاماسىز ەتىلۋى – ەادۇ ەلدەرىنە قاراعاندا جوعارى، ال مەدبيكەلەرمەن قامتاماسىز ەتىلۋ – كەرىسىنشە تومەن.
سونىمەن بىرگە، نەگىزگى تۇيىتكىلدى ماسەلەلەردىڭ ءبىرى – كادرمەن قامتاماسىز ەتۋ بولىپ تابىلادى، اسىرەسە، اۋىلدى جەرلەردە كادرلىق دايىنداۋدىڭ ساپاسى كوڭىل كونشىتپەيدى.
وسىعان وراي، ءبىز شەتەلدەردىڭ جوعارى وقۋ ورىندارىمەن ستراتەگيالىق ارىپتەستىك ورناتا وتىرىپ، مەديسينالىق ءبىلىمدى جاڭعىرتۋ جۇمىستارىن جۇرگىزىپ كەلەمىز.
مەديسينالىق جوعارى وقۋ ورىندارىنىڭ ستراتەگيالىق شەتەلدىك سەرىكتەستەرى انىقتالدى، 5 جىلعا دامۋدىڭ ستراتەگيالىق جوسپارىن ازىرلەۋ بويىنشا جۇمىستار جۇرگىزىلدى.
قولدانبالى باكالاۆرياتتىڭ فين مودەلىنىڭ نەگىزىندە مەدبيكەلىك ءبىلىمدى جاڭعىرتۋ بويىنشا جۇمىستار جالعاسىن تابۋدا. قازىرگى تاڭدا التى پيلوتتى كوللەدجدە 320 ادام ءدارىس الۋدا.
7 باعىت. مەملەكەتتىك-جەكە مەنشىك ارىپتەستىك، يننوۆاسيالار مەن قازىرگى زامانعى اقپاراتتىق-كوممۋنيكاسيالىق تەحنولوگيالاردىڭ نەگىزىندە دەنساۋلىق ساقتاۋ ينفراقۇرىلىمىن ودان ءارى دامىتۋدى قامتاماسىز ەتۋ.
دەنساۋلىق ساقتاۋ مەكەمەلەرىنىڭ جەلىسىن دامىتۋدى، مەديسينالىق تەحنيكانى پايدالانۋدىڭ تيىمدىلىگىن ارتتىرۋدى، قازىرگى زامانعى اقپاراتتىق-كوممۋنيكاسيالىق تەحنولوگيالاردىڭ ءارى قاراي دامۋىن قامتاماسىز ەتۋدى قاراستىرادى.
دەنساۋلىق ساقتاۋ سالاسىندا 63 ءمجما جوبالارىن ازىرلەنۋدە، ونىڭ ىشىندە 2 رەسپۋبليكالىق كونسەسسيالىق جوباسى، 61 جەرگىلىكتى جوباسى.
قازىرگى تاڭدا جالپى سوماسى 12 ملرد تەڭگە بولاتىن 11 جەرگىلىكتى جوبا بويىنشا ءمجما كەلىسىم – شارتى جاسالدى(ونىڭ ىشىندە 2017 جىلى 10 ملرد تەڭگە سوماسىندا ءمجما 10 جوبا بويىنشا) ونىڭ ىشىندە: پاۆلودار وبلىسىندا 4 جوبا، اقتوبە وبلىسىندا - 3، قوستانايدا - 1، اقمولادا - 1، قىزىلوردا وبلىسىندا - 1، وڭتۇستىك قازاقستان وبلىسىندا - 1.
جوعارىدا اتالعان ءمجما كەلىسىم-شارتتار 5 جىلدان 30 جىلعا دەيىنگى مەرزىمدە جاسالعان.
10 جەرگىلىكتى دەنساۋلىق ساقتاۋ نىسانى بويىنشا سەنىمدى باسقارۋ شارتى جاسالدى، ونىڭ ىشىندە جامبىل وبلىسىندا – 8. اقتوبەدە – 1، الماتى – 1.
2016-2020 جىلدارعا ارنالعان قولدانىستاعى جەكەشەلەندىرۋدىڭ كەشەندى جوسپارىنىڭ شەڭبەرىندە 7 وبلىستىق سالاۋاتتى ءومىر سالتىن قالىپتاستىرۋ ورتالىعى جەكەشەلەندىرىلدى.
اعىمداعى جىلى ەلەكتروندى دەنساۋلىق قۇجاتىن ەنگىزۋ بويىنشا جوبا جالعاسىن تابادى. بۇل ادام ءومىرىنىڭ سوڭىنا دەيىنگى دەنساۋلىعى جايىندا مالىمەتتىڭ تىركەلۋىنە مۇمكىندىك بەرەدى.
ەلەكتروندى دەنساۋلىق قۇجاتى ءبىرىڭعاي بىرىكتىرىلگەن پلاتفورماعا ورنالاستىرىلادى. بۇل پيلوتتى قولدانۋدى ىسكە اسىرۋ 2017 جىلدىڭ اياعىنا دەيىن جوسپارلانۋدا.
سونداي-اق، اعىمداعى جىلدىڭ سوڭىنا دەيىن مەديسينالىق مەكەمەلەر اقپاراتتىق جۇيەمەن 50%-عا، 2018 جىلدىڭ اياعىنا دەيىن 100%-عا قامتاماسىز ەتىلەتىن بولادى. بۇل 2019 جىلدىڭ 1 قاڭتارىنان باستاپ مەديسينالىق مەكەمەلەردىڭ قاعازسىز جۇمىس فورماتىنا كوشۋىنە مۇمكىندىك بەرەدى.
قابىلدانعان شارالار مەملەكەت باسشىسى قويعان مىندەتتى جۇزەگە اسىرۋعا مۇمكىندىك بەرەدى. قازاقستان 2050 جىلعا دەيىن الەمدەگى دامىعان 30 ەلدىڭ قاتارىنا ەنۋى جانە ادامنىڭ ءومىر ءسۇرۋ ۇزاقتىعى 80 جاسقا دەيىن ارتىلۋى ءتيىس. ەلباسىنىڭ ۇكىمەت الدىنا قويىپ وتىرعان نەگىزگى تاپسىرمالارىنىڭ ءبىرى – وسى.
پىكىر قالدىرۋ