الماتى قالاسىندا مىندەتتى الەۋمەتتىك مەديسينالىق ساقتاندىرۋدى ەندىرۋ ماسەلەلەرى جونىندە قازاق ءتىلدى ب ا ق وكىلدەرىنە ارنالعان اقپاراتتىق ءبىلىم بەرۋ سەمينارى ءوتتى، دەپ Qamshy.kz اقپارات اگەنتتىگى جازادى. 

سەميناردى الماتى قالاسى دەنساۋلىق ساقتاۋ باسقارماسى قازاقستان باسپا ءسوز كلۋبىنىڭ قولداۋىمەن ۇيىمداستىردى.

سەميناردىڭ باستى ماقساتى – قازاق ءتىلدى ب ا ق بەتتەرىندە مىندەتتى الەۋمەتتىك مەديسينالىق ساقتاندىرۋ ماسەلەلەرى جونىندە اقپارات جاريالاۋدىڭ  تيىمدىلىگىن ارتتىرۋ، وسى تاقىرىپ اياسىندا جۋرناليستەردىڭ اقپارات كوزىن ىزدەۋ جانە اقپارات جيناۋ داعدىلارىن دامىتۋ، بەيىندىك مەملەكەتتىك ورگاندار باسپا ءسوز قىزمەتتەرىنىڭ بۇقارالىق اقپارات قۇرالدارىمەن سىندارلى ىنتىماقتاستىعىن ورناتۋ.

سەمينار جۇمىسىنا قوعامدىق-ساياسي باسىلىمداردىڭ جۋرناليستەرى، تەليەۆيدەنيە جانە اقپاراتتىق اگەنتتىكتەر قىزمەتكەرلەرى، سونداي-اق، ب ا ق سالاسىنداعى باسقا دا ساراپشىلار قاتىستى.

بەلگىلى قازاقستاندىق جۋرناليس جازيرا بەگالى اقپاراتپەن جۇمىس جاساۋ، اقپاراتتىڭ شىنايىلىعىن تەكسەرۋ، ساراپشىلاردى ىزدەۋ، سۇحبات الۋ تەحنيكاسى، اقپاراتتىق جەلەۋلەر، ماتىنمەن جۇمىس جاساۋ سىندى تاقىرىپتاردى قوزعاعان ترەنينگ پەن تاجىريبەلىك ساباقتى وتكىزدى.

سەمينار ۇيىمداستىرۋشىلارى ەرەكشە اتاپ وتكەندەي، دەنساۋلىق ساقتاۋ ماسەلەلەرى جونىندە اقپارات جاريالاۋ كەزىندە ب ا ق وكىلدەرىنىڭ ءوز بىلىكتىلىكتەرىن كوتەرۋگە، وسى سالا، ونىڭ زاڭدىلىقتارى، قۇرالدارى مەن تەتىكتەرى تۋرالى اقپاراتتى جۇيەلەۋگە ۇمتىلىستارى جوعارى ەكەندىگى بايقالىپ وتىر. ۇيىمداستىرۋشىلار وسىنداي ءىس-شارالاردى وتكىزۋ قازاق ءتىلدى ب ا ق بەتتەرىندەگى ماتەريالدىڭ ساپاسىن كوتەرۋگە جانە دە كاسىبي قازاق ءتىلدى جۋرناليستيكانى دامىتۋ ارقىلى باسەكەگە قابىلەتتى اقپاراتتىق كەڭىستىك قالىپتاستىرۋعا جاعداي جاسايدى دەپ ءۇمىت ءبىلدىردى.

الماتىلىق كارديوحيرۋرگتار كۇنى بۇگىنگە دەيىن 426 ناۋقاسقا وزدىگىنەن ىدىراپ كەتەتىن 500 Absorb ستەنتىن ورناتقان. بۇل تۋرالى بۇگىن ارنايى قالالىق كارديولوگيا ورتالىعىنىڭ ديرەكتورى المات قوداسبايەۆ مالىمدەگەن بولاتىن.

ونىڭ ايتۋىنشا، سوڭعى ءۇش جىلدان بەرى قالالىق كارديولوگيالىق ورتالىق جۇرەككە قان اپاراتىن قان تامىرلارىن ستەنتتەۋگە، ياعني كەڭەيتۋگە وزدىگىنەن ىدىراپ، جويىلىپ كەتەتىن «ابسورب» قانتامىرلىق قاڭقاسىن قولدانىپ كەلەدى. ونىڭ ەرەكشەلىگى سول، «ابسورب» ەكى جىل ىشىندە تولىعىمەن وزدىگىنەن ىدىراپ، جويىلىپ كەتەدى. ال ەڭ باستىسى - بۇدان كەيىن قان تامىرى ءوزىنىڭ كولەمىن ساقتاپ قالادى. ابسورب بۇل قاڭقالىق جۇيە، ياعني ۋاقىتشا سيپاتقا يە. ال بۇعان دەيىن قولدانىلىپ كەلگەن مەتاللدىق ستەنت قان تامىرىندا تۇراقتى يمپلانتانت رەتىندە ساقتالادى.

«وزدىگىنەن ىدىراپ كەتەتىن ستەنت ءوز قىزمەتىن تۇراقتى اتقارادى. ءبىزدىڭ كارديوورتالىقتا 426 ناۋقاستىڭ جۇرەگىنە 500 ستەنت قويىلدى. قازاقستاندا مۇنداي قاڭقانى بىزدەن باسقا، بىرنەشە كارديوورتالىقتار ورناتا الادى. ءبىراق وپەراسيا جاسالعان ناۋقاستاردىڭ سانى بويىنشا ءبىز كوش باسىندا كەلەمىز» - دەدى ا. قوداسبايەۆ.